VOV4.Bahnar - Tơ̆ pơ long khŭl linh apŭng plĕnh teh Army Games 2021, Khŭl linh kon pơ lei Việt Nam dơ̆ng mă 7/42 teh đak păng tơ ring vang pơ long. ‘Noh jĭ kơ tơ̆ng ang tơ̆ Lêh pơ tôch tơ drong pơ long Khŭl linh apŭng plĕnh teh ‘măng mă 7 (Army Games 2021) hlôi đei pơ gơ̆r tih tơ̆ Mát-xcơ-va, Liên bang Nga. Đơ̆ng rŏng lơ năr pơ long, Khŭl linh kon pơ lei Việt Nam vang pơ long Army Games 2021 tơ̆ teh đak đe hlôi jang đang ‘lơ̆ng rim hơ năp jang đei pơ jao, iŏk đei dôm jơ nei ‘lơ̆ng hloh kiơ̆ 4 ‘măng vang pơ long Khŭl linh apŭng plĕnh teh. Lơ môn vang pơ long tă kơ đei jơ nei ‘lơ̆ng hloh dăh mă dang ăi sơ năm sơ̆ mă đơ̆ng kơ sô̆ khŭl pơ long đơ̆ng rim teh đak vang pơ long lơ hloh păng tơ drong môn pơ long kŭm hơ nat hloh. Dôm bơ ngai hơ lam tơ̆ Army Games 2021 hơ len lăng rim khŭl linh kon pơ lei Việt Nam đei pơ hrăm ‘lơ̆ng, đei gơh hơ gei ‘lơ̆ng păng đei tơ drong ki luơ̆t tôch kơ kơ tang. Army Games jĭ tơ drong hiôk vă rim khŭl linh Việt Nam hŏk pơ hrăm, akŏm đei tơ drong hlôh vao lơ̆m pơ hrăm khŏm iung jang, mă loi ‘noh jĭ tơ drong sơng iŏk, bơ̆ jang, iŏk yua păng vei lăng dôm kơ loăi ƀrơ̆m phao, kơ măy kơ mŏk ‘nao, hơ gei.

Thuem: Tơ blơ̆