VOV4.Bahnar - Pơ gê 14/10, Anih chĕp kơ̆l pơ gơ̆r Kuô̆k hô̆i pơ tôch hop akŏm ‘măng mă 4. Kơ dră Kuô̆k hô̆i Vương Đình Huệ ăn tơ băt, hăm jơ hngâm đon tơ năp, Anih chĕp kơ̆l pơ gơ̆r Kuô̆k hô̆i hlôi jang đang rim tơ drong đei tơ lĕch lơ̆m hop akŏm. Kơ dră Kuô̆k hô̆i athei dôm anih jang kơ pal jăh chih akŏm tôm nơ̆r pơ ma đơ̆ng bơ ngai tăh hla kiơ̆ đơ̆ng dôm ‘măng tơ ƀâp, chih hơ dăh tơ drong hơ pơi ‘mĕh đơ̆ng kon pơ lei păng bơ ngai tăh hla lơ̆m tĕh đak gơih ăn hop akŏm mă 2, Kuô̆k hô̆i jăl 15.

Kơ dră Kuô̆k hô̆i Vương Đình Huệ pơ ma lơ̆m hop akŏm

Kơ dră Kuô̆k hô̆i oei athei tơ lĕch nơ̆r tơ chơ̆t đơ̆ng Hop akŏm mă 4 kơ Anih chĕp kơ̆l pơ gơ̆r Kuô̆k hô̆i vă pơih trong ăn dôm anih jang kơ Kuô̆k hô̆i, Khul kơ dră tĕh đak gơih ăn rim bơ ngai tang măt Kuô̆k hô̆i. Dôm hla ar chih tơ roi, mă loi hla ar hơ len năng athei chih kơ đĕh, rơ đăh, tơ blang đei rim tơ drong mă bơ ngai tăh hla tơ rĕk truh. Kơ dră Kuô̆k hô̆i Vương Đình Huệ athei hơ met pơ ‘lơ̆ng trong jang, dôm tơ drong kăl vă pơm ‘lơ̆ng ăn tơ drong pơ gơ̆r hop akŏm mă 2 gơ̆h iŏk jơ nei, vei lăng sơ đơ̆ng ‘lơ̆ng.

Dơ̆ng: Tơ blơ̆