VOV4.Bahnar - Đơ̆ng rŏng 4 năr bơ̆ jang tơ păt ‘lơ̆ng, pơ gê 7/10, tơ̆ Anih jang kơ Trung ương Đảng, hăm tơ drong pơ gơ̆r đơ̆ng Tổng Bí thư Nguyễn Phú Trọng, Hop akŏm mă 4 Khul kơ dră chĕp kơ̆l Trung ương jăl 13 hôp mă hơ tuch. Khul kơ dră chĕp kơ̆l Trung ương drơ̆ng nơ̆r akhan, 9 khei âu ki, mŭk drăm lơ̆m tĕh đak oei sơ đơ̆ng, kơ jă tơ mam đei vei kơ jăp, mă loi ‘nŏh tơ tom tơ jră păng bơ̆ jang lơ tơ drong tơ gŭm vă hơ met pơ ‘lơ̆ng, sek tơ lang tơ drong mơ mat tat ăn kon pơ lei păng anih tĕch mơ dro pŭ răm đơ̆ng jĭ hơ buh.

Tổng Bí thư Nguyễn Phú Trọng pơ ma hơ dăh, Trung ương akŏm jơ hngâm tơ blang dôm tơ dỏng hiong răm yoa đơ̆ng jĭ tơ pŏh ‘măng mă 4, pơ ma găh dôm trong jang, tơ drong tơ gŭm tôch trŏ, ‘lơ̆ng hơ iă vă tang găn, vei lăng jĭ, tơ lĕch trong jang tŏk dơ̆ng mŭk drăm, tơ pôl tơ̆ hơ năp kơnh. Găh tơ drong pơ jing đảng, lơ̆m ƀai iung pơ ma pơ tôch hop akŏm Tổng Bí thư Nguyễn Phú Trọng pơ ma, hop akŏm drơ̆ng nơ̆r tơ lĕch tơ dỏng hơ găt ‘nao găh dôm tơ drong mă đảng viên ưh gơ̆h jang; năng ‘nâu jĭ tơ drong kăl vă set hơ len, sek tơ lang dôm tơ drong glăi đơ̆ng kăn ƀô̆, đảng viên.

Dơ̆ng: Tơ blơ̆