VOV4.Bahnar - Đơ̆ng rŏng 4 năr bơ̆ jang tơ păt ‘lơ̆ng, tôch tơ năp, kơ sơ̆ 8/7, Hop akŏm mă 3 Khul kơ dră chĕp kơ̆l Trung ương jăl 13 hôp mă hơ tuch, jang kĕh dôm tơ drong đei tơ lĕch, pơ tôch hrôih ƀiơ̆ pơ têng hăm tơ drong tơ dra hơ drol 1 năr. Tổng Bí thư Nguyễn Phú Trọng pơ gơ̆r păng iung pơ ma pơ tôch hop akŏm.

Tổng Bí thư Nguyễn Phú Trọng pơ gơ̆r păng iung pơ ma pơ tôch hop akŏm

Hăm jơ hngâm đon năng tơ păt lơ̆m tơ drong đei tơ pă, hơ len năng dôm tơ drong mă ‘lơ̆ng, khoa hŏk, Hop akŏm drơ̆ng nơ̆r hăm tơ drong jang atŏk tơ iung mŭk drăm, tơ pôl, jên hu, tơ mât jên jang kơ tĕh đak lơ̆m 5 sơ năm 2016 - 2020, păng tơ drong jang atŏk tơ iung mŭk drăm, tơ pôl 6 khei blŭng sơ năm 2021. Atŭm hăm ‘nŏh, tơ gop nơ̆r athei hơ met pơ ‘lơ̆ng Trong jang atŏk tpơ iung mŭk drăm, tơ pôl, jên hu păng tơ mât jên jang tĕh đak 5 sơ năm 2021 - 2025 vă tơ roi ăn Kuô̆k hô̆i jăl XV set hơ len, tơ chơ̆t lơ̆m Hop akŏm mă 1 vă pơ gơ̆r ƀât hơ tuch khei 7 âu.

Tổng Bí thư Nguyễn Phú Trọng oei tơ roi, tơ̆ Hop akŏm Trung ương 3, Khul kơ dră chĕp kơ̆l Trung ương iŏk tơ mât dơ̆ng 2 ‘nu Kơ dră jang lơ̆m Anih Dăr hơ len kơ Trung ương. Atŭm hăm ‘nŏh, Trung ương oei tơ chơ̆t pơm kiơ̆ ki luơ̆t hăm ƀok Trần Văn Nam – Kơ dră jang lơ̆m Trung ương Đảng, Bí thư đảng dêh char Bình Dương kiơ̆ trong kăt đĭ kơ chư̆k lơ̆m Đảng; pơm kiơ̆ ki luơ̆t hăm ƀok Vũ Huy Hoàng, sơ̆ jang lơ̆m Trung ương Đảng, kiơ̆ trong puh tơ lĕch đơ̆ng Đảng.

Dơ̆ng: Tơ blơ̆