VOV4.Bahnar - Kơ sơ̆ ‘năr 8/4, Kuô̆k hô̆i jăl 14 hlôi pơ tôch ‘măng hop akŏm mă 11. Pơ ma pơ tôch, Kơ dră Kuô̆k hô̆i Vương Đình Huệ tơ roi rơ đăh: đơ̆ng rŏng 12 năr bơ̆ jang tơ tĕnh, tơ păt, tơ năp, ‘Măng hop akŏm mă 11, Kuô̆k hô̆i jăl 14 hlôi jang đang pơ đĭ tơ drong tơm tơ drong jang tơ lĕch ăn păng jơ nei ‘lơ̆ng hơ iă.

Lêh chao kơ pơ tôch ‘măng hop akŏm mă 11, Kuô̆k hô̆i khóa XIV

Kuô̆k hô̆i hlôi pơ tôch ‘lơ̆ng hơ iă, tôm tơ drong jang jăl jang 2016-2021 đơ̆ng rim anih jang lơ̆m khŭl jang teh đak, set hơ len, tơ chơ̆t tơ drong jang rơ̆ih bơ ngai jang păng 1,2 tơ drong tơm gĭt kăl nai. Kuô̆k hô̆i ‘măn lơ jơ ‘năr vă pơ ma dơ nuh, hơ len lăng rim Hla ar tơ roi tơ băt tơ drong jang đơ̆ng Kuô̆k hô̆i, Kơ dră teh đak, Khŭl kơ dră teh đak, rim anih jang kơ Kuô̆k hô̆i, Anih sek tơ lang kon pơ lei gĭt kăl, Anih jang dăr hơ len kon pơ lei gĭt kăl, Anih jô̆ hơ len jên teh đak.

Lơ̆m kơ sơ̆ ‘năr 8/4 mơ̆n, Kuô̆k hô̆i kĭ pơ kăp kiơ̆ nơ̆r athei đơ̆ng Kơ dră tĕh đak găh hơ năn Phó Kơ dră păng 1,2 ‘nu bơ ngai jang lơ̆m Jơ nŭm vei lăng sơ đơ̆ng tĕh đak kiơ̆ trong tăh kơ phĭu srĕp, lơ̆m nŏh, Thủ tướng Phạm Minh Chính pơm Phŏ Kơ dră Jơ nŭm vei lăng sơ đơ̆ng tĕh đak. Kơ dră Kuô̆k hô̆i Vương Đình Huệ, Kơ dră tơm vei lăng Khul linh tĕh đak Phan Văn Giang, Kơ dră tơm jang tơ bôl Bùi Thanh Sơn iŏk jang Kơ dră jang lơ̆m Jơ nŭm vei lăng sơ đơ̆ng tĕh đak.

Kuô̆k hô̆i oei kĭ pơ kăp kiơ̆ trong tăh kơ phĭu srĕp, pôk ƀok Đỗ Văn Chiến (Bí Thứ T.Ư Đảng, Bí thư Đảng Khul MTTQVN) păng yă Võ Thị Ánh Xuân (Kơ dră jang lơ̆m T.Ư Đảng, Phŏ Kơ dră tĕh) pơm Phŏ Kơ dră Jơ nŭm pơ gơ̆r pôk rơih tĕh đak, kŭm hăm lơ bơ ngai jang kăl lơ̆m Jơ nŭm pơ gơ̆r pôk rơih tĕh đak. Đơ̆ng rŏng kơ 'nŏh, Kuô̆k hô̆i drơ̆ng nơ̆r hăm tơ drong tơ chơ̆t găh bơ ngai jang 'nao ăn 1,2 'nu Phŏ Kơ dră păng Bơ ngai jang lơ̆m Jơ nŭm pơ gơ̆r pôk rơih tĕh đak.

Thuem hăm Dơ̆ng: Tơ blơ̆