VOV4.Bahnar - Năr 20/12, tơ̆ pơlei tơm Buôn Ma Thuột, Khul bơngai phĭn rup Việt nam jang hơdoi hăm Dơnŏ anih vei lăng kon pơlei dêh char Dak Lăk păng Khŭl Jŏh ayŏ kơdŏ soang dêh char Dak Lăk pơgơ̆r blŭng a Pơdă pơơlong rup ‘lơ̆ng tơring Pơbăh Trung Ƀô̆ păng Tây Nguyên ‘măng mă 26 sơnăm 2021.

Tơmoi năm tơmang lăng rup pơdă tơ̆ Hnam mong răk tơmam drăm Dak Lăk

‘Măng pơdă đei chă pơdă 172 hlak rup đơ̆ng rim bơngai phĭn rup kơ Khŭl Jŏh ayŏ kơdŏ soang 10 dêh char, pơlei tơm lơ̆m tơring ‘nŏh đei: Đà Nẵng, Quảng Nam, Quảng Ngãi, Bình Định, Phú Yên, Khánh Hòa, Đắk Lắk, Đắk Nông, Gia Lai păng Kon Tum. Rim hlak rup tơbăt hơdăh tơdrong yan au kơ tơdrong erĭh sa, jang sa; tang găn jĭ Covid-19 kơ rim dêh char tơring. Dôm tơdrong pơgơ̆r, kơ̆m kang kơnang giĕng, jŏh ayŏ kơdŏ soang kon kông tôch ‘lơ̆ng hơ iă. ‘Măng pơdă đei pơgơ̆r tơ̆ Hnam mong răk tơmam drăm Dak Lăk, mĭnh lơ̆m dôm tơdrong jang vă kơ kŭh chơt hơ iă ăn Năr Khŭl Ƀô̆ đôi kon pơlei Việt Nam, sơng kơkŭh sơnăm ‘nao 2022.

Tơblơ̆ nơ̆r: Amazưt