VOV4.Bahnar - Dơnŏ anĭh tang măt Việt Nam tơ̆ Lào ‘nao tơlĕch nơ̆r tơroi tơbăt găh tơdrong pơdơ̆h ‘mơ̆i ăn mơ̆t tơ̆ tĕh đak Việt Nam hăm dôm bơngai đơ̆ng Lào dĭng trŭh đĭ năr 30/5/2021. Tơ̆ hơnăp kơtơ̆ng ang dôm năr au ki, mĭnh ƀar ‘nu kon pơlei đơ̆ng tĕh đak Lào brŏk vĭh tơ̆ Việt Nam mă lei rim ‘măng jang sơlam tĕh đak Việt Nam ư̆h kơ ăn mơ̆t, Dơnŏ anĭh tang măt Việt Nam tơ̆ Lào tơbăt: tơdrong mă au ‘nŏh pơm kiơ̆ hla bơar tơchơ̆t đơ̆ng Hơnĭh bơ̆ jang ăn Khŭl kơdră chĕp pơgơ̆r tĕh đak Cộng hòa xã hội Chủ nghĩa Việt Nam găh tơdrong “pơdơ̆h ‘mơ̆i ăn mơ̆t lơ̆m tĕh đak hăm dôm bơngai đơ̆ng rim tĕh đak Ấn Độ, Thái Lan, Campuchia, Lào dĭng trŭh đĭ năr 30/5/2021. Dôm bơngai hlôi pơm hla bơar adrol năr 28/4/2021 oei gơ̆h mơ̆t kiơ̆ tơdrong tơchơ̆t. Hăm dôm bơngai kăl hlŏh apĭnh brŏk tơ̆ Việt Nam, kăl đei apĭng Dơnŏ anĭh tơm jang tơbôl Việt Nam drơ̆ng nơ̆r păng pơm kiơ̆ tôm trong pơtho tơbăt đơ̆ng Dơnŏ anĭh tơm vei lăng jang pơgang ‘mơ̆i mă gơ̆h brŏk. Dơnŏ anĭh tang măt athei kon pơlei Việt Nam tŏk bŏk erĭh sa, jang sa păng hok pơhrăm tơ̆ Lào pơm kiơ̆ kơ jăp tơdrong tơchơ̆t đơ̆ng Lào păng đơ̆ng Việt Nam găh tang găn jĭ Covid-19; ư̆h kơ gơ̆h lĕch vĕh đơ̆ng tơring oei, ăp đei tơdrong kăl ‘nŏh mă gơ̆h; ư̆h kơ gơ̆h năm tơ̆ rim ‘măng sơlam tĕh đak tơdăh tim mă đei hla bơar asong brŏk tơ̆ tĕh đak, pơm mơmat tat ăn rim khŭl bơ̆ jang.

Tơblơ̆ nơ̆r: Amazưt