VOV4.Bahnar - Dơnŏ anĭh tơm vei lăng jang pơgang tơbăt, jô̆ trŭh 6 jơ drung kơsơ̆ năr 10/6 trŭh 6 jơ pơgê au năr 11/5, Việt Nam đei dơ̆ng 28 ‘nu bơngai tơpŏh jĭ lơ̆m tĕh đak. Lơ̆m au đei 1 ‘nu bơngai tơ̆ Hnam pơgang Nhiệt đới Trung ương, 13 ‘nu bơngai tơ̆ Bắc Ninh, 7 ‘nu bơngai tơ̆ Vĩnh Phúc, 5 ‘nu bơngai tơ̆ Bắc Giang, 1 ‘nu bơngai tơ̆ Lạng Sơn păng 1 ‘nu bơngai tơ̆ Hải Dương. Jô̆ trŭh 6 jơ pơgê năr au, năr 11/5, Việt Nam đei trŭh 2.056 ‘nu bơngai jĭ tơpŏh lơ̆m tĕh đak păng 1.433 ‘nu bơngai jĭ đơ̆ng tĕh đak đe năm tơ̆ tĕh đak bơ̆n. Măt bơngai ‘nao tơpŏh jĭ jô̆ đơ̆ng năr 27/4 trŭh dang ei ‘nŏh: 486 ‘nu. Jô̆ trŭh 4 jơ kơsơ̆ năr 10/5/2021, pơđĭ lơ̆m tĕh đak hlôi ƀet bơ̆ng vaccine tang găn jĭ Covid-19 ‘măng mă 1 păng mă 2 đei 892.454 kơ liêu vaccine klăh asong, jơnei 97%. Bơngai đei ăn ƀet hơdrol ‘nŏh kang ƀô̆, ƀok thây pơgang tŏk bŏk jang ming hơmet bơngai jĭ Covid-19, rim ƀok thây pơgang bơ̆ jang khăm iŏk pham, khăm hơlen pham, năm tơchă dôm bơngai đei tơ ƀơ̆p bơngai jĭ, rim bơngai jang lơ̆m khŭl Covid-19 lơ̆m kon pơlei, Dơnŏ anĭh chĕp pơgơ̆r tang găn jĭ, Kŏng ang, Ƀô̆ đô̆i. 

Tơblơ̆ nơ̆r: Amazưt