VOV4.Bahnar - Kơsơ̆ năr 6/10, Hop akŏm kơdră dơnơm ASEAN găh Sơđơ̆ng mạng ‘măng mă 6 (AMCC-6) kơ yuơ Singapore pơgơ̆r kiơ̆ trong pơgơ̆r trư̆k tuyên đei pơgơ̆r blŭng a. Khŭl tang măt Việt Nam kơ yuơ Trung tướng Lương Tam Quang, Kơ iĕng Kơdră Dơnŏ anĭh tơm Kŏng ang vang năm hop akŏm tơ̆ hơnĭh pơdăh Hà Nội. Giĕng lê̆h Sơđơ̆ng mạng apŭng plĕnh tĕh ‘măng mă 6 (SICW-6) păng Hop akŏm Kơdră dơnơm ASEAN găh Sơđơ̆ng mạng ‘măng mă 6 (AMCC-6) jing tơdrong pơgơ̆r hơnơ̆ng kơ yuơ Singapore pơgơ̆r vă chă pơma dơnŭh dôm trong jang hơ iă, tơbăt hơdăh dôm kơtơ̆ng ang găh tơdrong sơđơ̆ng mạng lơ̆m plei tĕh păng lơ̆m ASEAN. Hơnăn kơ Giĕng pơm lê̆h Sơđơ̆ng mạng apŭng plĕnh tĕh sơnăm au ‘nŏh “Erĭh sa atŭm hăm Covid-19-Ƀô̆h hơdăh dôm tơdrong long păng rơvơn găh sơđơ̆ng kih thuơ̆t sô̆” vă pơma dơnŭh găh tơdrong iung jang hơdoi ƀar păh rim tĕh đak, hơnĭh mơdro sa vă pơgenh rim tơdrong rơvơn kih thuơ̆t sô̆ tim mă đei lơ̆m hơdrol khei ‘năr đei jĭ hơbŭh păng iung tơ jră hăm rim tơdrong pơjoă lơ̆m mạng tŏk bŏk roi kơtang vă sơđơ̆ng ăn tơdrong sơđơ̆ng păng tơdrong pran kơtang kơ mạng.

Tơblơ̆ nơ̆r: Amazưt