VOV4.Bahnar - Pơgê năr 18/10, Jơnŭm vei lăng kon pơlei kơ pơlei tơm Hồ Chí Minh jăl X pơgơ̆r blŭng a ‘Măng hop akŏm mă 3. Kơdră jang lơ̆m Dơnŏ anĭh tơm Chĭnh trĭ, Bí thư Đảng pơlei tơm Hồ Chí Minh Nguyễn Văn Nên vang năm hop akŏm. Hơdrol hop akŏm, rim kơdră tang măt hlôi ‘măn mĭnh pơnĭt jơ vă tơbăt jơhngơ̆m đon ơ̆h sơ ‘ngon ‘mêm mơnat ăn kon pơlei hlôi lôch răm păng rim kang ƀô̆, ƀô̆ đô̆i kŏng ang, rim khŭl bơ̆ jang tang găn jĭ hơbŭh hlôi lôch răm lơ̆m jĭ hơbŭh Covid-19. ‘Nau jei jing ‘măng hop akŏm gĭt kăl vă hơlen đĭ đăng bơ̆ jang tang găn jĭ hơbŭh Covid-19 păng rim trong jang hơmet pơ ‘lơ̆ng muk drăm. Jô̆ trŭh năr 17/10, tơdrong jĭ hơbŭh tơ̆ pơlei tơm Hồ Chí Minh hlôi đei tơplĭh hơ iă, măt bơngai jĭ roi tŏ sĕt, măt bơngai lôch jei tơjur lơ; măt bơngai đei ƀet vaccine jrŭm mă 1 ăn bơngai đơ̆ng 18 sơnăm năm tơ̆ ‘lŏ kră jơnei 99%, jrŭm mă 2 hlŏh 76%. ‘Ngoăih tơdrong iŏk đei jơnei, pơlei tơm jei hơlen dôm tơdrong đei răm kơtang đơ̆ng jĭ hơbŭh pơm ăn. ‘Măng hop akŏm gô ‘măn pơ đĭ jơ’năr pơma dơnuh găh tơdrong jang mŭk drăm-tơpôl 9 khei păng tơdrong jang lơ̆m rim khei uơ oei; pơm hơdăh tơdrong tơm pơm ăn, mă kăl tơdrong ư̆h kơ chăng đơ̆ng rim kơdră tơring, rim hơnĭh jang păng tơlĕch trong jang trŏ ƀlep.

Tơblơ̆ nơ̆r: Amazưt