VOV4.Bahnar - Năr 13/9, Dơnŏ anĭh chĕp pơgơ̆r Kuô̆k hô̆i hlôi pơgơ̆r blung a ‘Măng hop akŏm mă 3 păng gô pơgơ̆r đunh trŭh năr 22/9. Iung pơma lơ̆m pơgơ̆r blŭng a, Kơdră chĕp pơgơ̆r Kuô̆k hô̆i Vương Đình Huệ tơbăt, tơ̆ ‘măng hop akŏm au, Dơnŏ anĭh chĕp pơgơ̆r Kuô̆k hô̆i gô lăng hơlen ăn tơgop nơ̆r rim tơdrong kăl pơtrŭh ăn Kuô̆k hô̆i tơ̆ ‘măng hop akŏm mă 2 păng lăng hơlen mĭnh ƀar tơdrong găh Dơnŏ anĭh chĕp pơgơ̆r Kuô̆k hô̆i gơ̆h tơchơ̆t, đei 5 tơdrong tơm.

Kơdră chĕp pơgơ̆r Kuô̆k hô̆i Vưong Đình Huệ iung pơma tơ̆ hop akŏm

Tơ̆ ‘măng hop akŏm au, Dơnŏ anĭh chĕp pơgơ̆r Kuô̆k hô̆i ăn tơgop nơ̆r găh tơdrong vă pơjing Tơdrong tơchơ̆t găh jang pơlong năng trong jang kăl atŏk tơ iung ăn kơ dĭh dêh char Thanh Hoá; Lăng hơlen, kĭ tơchơ̆t tơdrong pơjing pơlei tơm Từ Sơn, dêh char Bắc Ninh, tơchơ̆t tơlĕch minh ƀar trong jang găh ư̆h kơ thuê̆, tơjur thuê̆ vă tơgŭm ăn dơnŏ anĭh mơdro sa, kon pơlei đei răm đơ̆ng jĭ hơbŭh Covid-19; ăn tơgop nơ̆r găh Trong vă jang vei lăng sơđơ̆ng găh đak păng sơđơ̆ng pơnơ̆t đak, dơnau đak jăl jang 2021-2030, lăng trŭh sơnăm 2045.

Tơblơ̆ nơ̆r: Amazưt