VOV4.Bahnar - Gơ măng ‘năr 21/3, Trung ương Đoàn hơ druh tơ dăm Cộng sản Hồ Chí Minh hlôi pơ gơ̆r Lêh pô pơ ư, pôk hơ păh 10 ‘nu bơ ngai mơ lôh hơ gei Việt Nam hơ gei sơ năm 2020. ‘Nâu jĭ dôm bơ ngai mơ lôh hơ gei hloh lơ̆m rim tơ drong jang ‘lơ̆ng ăn kơ jơ hnơr mơ lôh chăl hle. Tơ mam hơ păh bơ ngai mơ lôh Việt Nam hơ gei ‘noh jĭ tơ mam hơ păh đơ̆ng Trung ương Đoàn vă pơm tơ drong ‘lơ̆ng hơ tŏk tơ iung tơ drong hơ gei đơ̆ng mơ ngai mơ lôh păng pơ trŭt tơ drong jang pơ jei băl hŏk pơ hrăm, tơ chĕng hơ len khoa hŏk, bơ̆ jang, hơ gei lơ̆m hơ druh tơ dăm hơ ioh; hơ met ming păng hơ tŏk tơ iung khŭl jang Đoàn, khŭl, grŭp păng sơng đei tơ drong bơ ngơ̆t trŭh đơ̆ng tơ pôl hăm tơ drong jang pơ tho pơ hrăm jơ hnơr mơ lôh. Dôm bơ ngai mơ lôh đei pôk pơ ư ‘noh jĭ dôm bơ ngai pơm đei bưng ai tih lơ̆m tơ pôl gơ ang đơ̆ng dôm tơ drong hơ drin đơ̆ng kơ dih kâu hăm dôm jơ nei ‘lơ̆ng hơ iă. Lơ̆m kơ sô̆ 10 ‘nu bơ ngai mơ lôh hơ gei sơ năm 2020, ưh khan lăp đei dôm hơ druh tơ dăm lơ̆m teh đak mă đei hơ druh tơ dăm Việt Nam oei tơ̆ teh đak đe hlôi sơ kơ̆t hơ dăh tơ drong jang hơ gei lơ̆m lơ tơ drong jang.

Thuem: Tơ blơ̆