VOV4.Bahnar - Oei pă dôm năr dơ̆ng, hloh 69 trĭu ‘nu kon pơlei tăh hla jâ̆p teh đak gô jang xơnong chĭnh trĭ kăp gĭt păng graxia hloh ăn kơdih po: kơtă tăh hla pôk rơih bơngai jang tang măt rơgei hloh vang jang Kuôk hô̆i păng Hô̆i dod\ng kon pơlei dôm jăl. Yuơ ƀơm răm kơtang đơ̆ng pơrang jĭ Covid-19, truh dang ei, rim tơring adoi hlôi đei trong pơkăp tăh hla lơ̆m khei năr tang găn păng tơjră pơrang jĭ. Tơchơ̆t noh tôm kon pơlei adoi gơh vang akŏm “Năr xô̆ chơt kơ teh đak” păng pơm jang xơnong pôk rơih.  

89 anih tăh kơphĭu lơ̆m tơring Cầu Giấy, plei tơm Hà Nội truh khei năr âu adoi đei hơmet tơnăp, xơđơ̆ng ăn tơdrong tang găn păng tơjră pơrang jĭ. Tơ̆ dôm anih pôk rơih adoi đei trong mơ̆t lĕch rơhơi păng đei tơroi hơdăh ăn bơngai truh tăh hla, vei xơđơ̆ng tơdrong ataih băl ƀơ̆t iŏk kơphĭu, chih kơphĭu păng tăh kơphĭu; chô̆ che gom ƀŏ, ôp ti hăm đak pơgang pơlôch xơmach adrol păng đơ̆ng rŏng kơ tăh kơphĭu... Yă Trần Thị Phương Hoa, Ƀĭ thư quận ủy, Kơdră Jơnŭm pơgơ̆r pôk rơih tơring Cầu Giấy ăn tơbăt: ‘nguaih kơ vei xơđơ̆ng dôm tơdrong pơkăp tang găn păng tơjră jĭ Covid-19 lơ̆m tơdrong tăh kơphĭu, tơring duh pơkăp hơdăh hăm rim tơdrong đei ƀôh lơ̆m tơring: “Pơkăp vă tang găn păng tơjră jĭ lơ̆m tơdrong pôk rơih duh hlôi đei hơtŏk minh hơyak. Dang ei dôm tơring pôk rơih đei lăm pơkăp oei tơklăh. Khul pôk rơih đei pơhrăm kloh klĕch, ‘nguaih kơ pơhrăm găh tơdrong jang noh y tê̆ tơring đei xơnong pơhrăm ăn rim bơngai jang lơ̆m khul pôk rơih băt hơdăh găh tơdrong tang găn păng tơjră pơrang jĭ vă pơtho ăn bơngai năm tăh hla băt hơdăh vei xơđơ̆ng ăn tơdrong tang găn păng tơjră pơrang jĭ gơh tơnăp hloh”.

Tơ̆ tôm tơring kơ plei tơm Hà Nội adoi hlôi đei dôm trong tang găn păng tơjră pơrang jĭ tơ̆ anih pôk rơih păng đei jang adrô̆ hăm dôm anih pơkăp oei tơklăh, pơvei. Anih pơgơ̆r pôk rơih plei tơm Hà Nội hlôi pơtruh nơ̆r hăm Jơnŭm pơgơ̆r pôk rơih kơ teh đak găh dôm trong jang kăp gĭt vă pơgơ̆r pôk rơih tơ̆ dôm anih pơkăp oei tơklăh.  

Oei tơ̆ plei tơm Hồ Chí Minh, Anih pơgơ̆r pôk rơih plei tơm pơkăl hơmet anih oei xơđơ̆ng ăn tơdrong oei ataih băl, tang găn akŏm lơ bơngai; axong bơngai năm tăh hla ưh kơ hloh 50% măt mơ̆t tăh hla lơ̆m minh ‘măng. Tơrĕk hloh noh tơ̆ Bắc Giang, tơring tŏk bŏk oei hơbuh pơrang jĭ Covid-19 kơtang hloh lơ̆m teh đak bơ̆n dang ei gô ưh đei pơtơm kơdrâ̆m bơngai akŏm lơ̆m ‘năr pôk rơih; axong khul răh rai năm tăh hla lơ ‘măng kiơ̆ jơ, tang găn akŏm lơ bơngai... Ƀok Ngô Sách Thực, Phŏ Kơdră Anih jang Trung ương MTTQ Việt Nam akhan: lơ̆m khei năr âu, rim tơring pơgơ̆r pôk rơih lơ̆m khei năr pơrang jĭ Covid-19 hơbuh hli, noh tơdrong xơkơ̆t, chih hơnăn bơngai tăh hla tơ̆ dôm anih oei tơklăh, tơring hơmet jĭ... kăl vei xơđơ̆ng vă kon pơlei lơ̆m dôm anih âu gơh năm tăh hla jang keh xơnong pôk rơih kơ po: “Nhôn ƀôh ăh đei pơrang jĭ dăh mă ƀơ̆t đei tơdrong ưh kơ ê noh athei hơmŏ tôch tơnăp hơdăh, vă dôm anih pơkăp oei tơklăh athei đei kơthŭng tăh kơphĭu. Duh atŭm minh khul tăh kơphĭu, minh tơring tăh kơphĭu chih hơnăn bơngai tăh hla lơ̆m dôm tơring noh tơdrong iŏk kơthŭng tăh kơphĭu duh athei vei xơđơ̆ng tơdrong tang găn păng tơjră pơrang jĭ păng pơm kiơ̆ ƀlep pơkăp ăn xơnong kon pơlei tơ̆ anih pơkăp oei tơklăh”.

Tơ̆ Tây Nguyên tơdrong hơmet pôk rơih đei ƀôh hăt hot. Bơngai tăh hla mơlôh H’Sinh Bkrông, sinh viên xơnăm mă 2, Đăi hŏk Tây Nguyên, dêh char Đăk Lăk ăn tơbăt, âu jing ‘măng mă blŭng năm pôk rơih noh H’Sinh hăt hot gô chang truh ‘năr đei chĕp hla kơphĭu lơ̆m ti, pơm jang kăp gĭt kơ po.  H’Sinh tơroi: “’Nâu jing ‘măng mă blŭng inh hơmet năm tăh kơphĭu, noh inh chơt hơ iă pơm jang xơnong kơdih po. Truh âu kơnh năm tăh kơphĭu inh gô rơih dôm bơngai rơgei, tơgop hơtŏk tơ iung mŭk drăm tơpôl tơ̆ tơring”.

Anih jang đoan dêh char Đăk Lăk hlôi pơgơ̆r lơ tơdrong jang xơng kơ kuh tơ̆ dôm apŭng, thĭ xăh, plei tơm hăm tơdrong vang jang đơ̆ng kơ rơbâu đoan viên, hơdruh tơdăm lơ̆m dêh char. Kiơ̆ kơ noh, pơgơ̆r pơm jang ‘mêm bơnat tơ̆ dôm anih pơgơ̆r pôk rơih nhen: tơgŭm vei xơđơ̆ng tơpôl, vei rơgoh cham char anih pơgơ̆r pôk rơih, tơdrong jang tang găn păng tơjră jĭ Covid-19; pơgơ̆r ‘Năr akŏm bơngai tăh hla mơlôh; Tơdrong akŏm  “Bơngai tăh hla mơlôh hăm tơdrong pôk rơih bơngai jang tang măt ăn Kuôk hô̆i jăl 15 păng jang tang măt ăn Hô̆i đŏng kon pơlei dôm jăl jang xơnăm  2021-2026”.

Vă vei xơđơ̆ng ăn bơngai tăh hla năm akŏm “Năr xô̆ chơt kơ teh đak”, Anih pơgơ̆r Pôk rơih kơ teh đak hlôi hơnơ̆ng tơlĕch tơroi tơbăt găh pôk rơih. ‘Nao âu hloh, Jơnŭm pơgơ̆r pôk rơih kơ teh đak pơtoi tơrĕk lơ̆m tơdrong pơgơ̆r pôk rơih athei kiơ̆ kơ tơdrong đei ƀôh, kơsô̆ măt bơngai năm tăh hla tơ̆ tơring tăh kơphĭu păng pơkăl tang găn păng tơjră pơrang jĭ Covid-19 tơ̆ tơring. Hăm bơngai tăh hla ƀơm jĭ Covid-19, Kơdră Anih jang găh Khôi luơ̆t teh đak kơ Kuôk hô̆i Hoàng Thanh Tùng ăn tơbăt:  “Khôi luơ̆t pơkăp rim kon pơlei đei xơnong năm pôk  rơih athei đei chih hơnăn tăh hla vă jang xơnong pôk rơih kơ po. Noh bơngai tăh hla jing bơngai mă hlôi ƀơm jĭ athei oei tơklăh tơ̆ hnam dăh mă tơ̆ anih oei akŏm minh ƀôt noh teh đak duh athei vei xơđơ̆ng bơngai noh đei chih lơ̆m hơnăn bơngai tăh hla. ‘Nâu jing xơnong jang kơ Anih vei lăng kon pơlei xăh, tơring mă bơngai noh erih xa dăh mă anih oei tơklăh vă vei xơđơ̆ng dôm trong pơkăp đei pơm kiơ̆ keh đang xơnong pôk rơih”.

Dang ei rim anih jang, rim tơring lơ̆m jâ̆p teh đak tŏk bŏk oei hơmet dôm trong tơroi tơbăt truh rim unh hnam, rim măt kon pơlei găh vei xơđơ̆ng tơdrong pơkăl tang găn pơrang jĭ ƀơ̆t năm tăh kơphĭu păng trong pôk rơih lơ̆m khei năr pơrang jĭ hơbuh hli. Tơdrong kăp gĭt hloh đei tơrĕk truh noh tôm bơngai tăh hla mă tŏk bŏk oei tơ̆ anih oei hơdrô̆, hơmet jĭ Covid-19, thây pơgang, khul bơngai tŏk bŏk pơm jang... adoi đei đei pơm kiơ̆ xơnong pôk rơih. Tôm tơdrong athei pơgơ̆r trŏ khôi luơ̆t teh đak, vei xơđơ̆ng lơ̆m khei năr pơrang jĭ Covid-19 hơbuh hli.

Lan chih păng pơre nơ̆r