VOV4.Bahnar - 4Tơ̆ Hà Nội, Ban Tuyên giáo Trung ương ‘nao jang hơdoi hăm rim hơnĭh bơ̆ jang pơgơ̆r Pơm lêh pôk tơmam hơpăh ‘măng pơlong găh Tơring sơlam tĕh đak hăm hơnăn “Tơring sơlam Tĕh đak ĭnh”. ‘Măng pơlong trư̆k tuyên tơchă băt vao “Tơring sơlam Tĕh đak ĭnh” vă pơtho tơbăt, sơkơ̆t hơdăh trong bơ̆ jang trŏ ƀlep đơ̆ng Đảng, Tĕh đak păng dôm tơdrong hơdrin đơ̆ng rim tơring lơ̆m tơdrong tơlĕch jang kiơ̆ Trong jang kăl vei lăng năng tông tơring sơlam Tĕh đak, tơlĕch jang kiơ̆ Tơdrong tơchơ̆t Pơm lêh hop akom ‘măng mă XIII kơ Đảng. Adoi, tơgop atŏk kơtang jơhngơ̆m đon ‘mêm kơ eng tĕh đak, hưch hanh hơmanh bơnê kơ hơdrech hơdrung; pơtho tơbăt jơhngơ̆m đon ‘lơ̆ng iung jang tơ iung pơjing păng vei lăng Tĕh đak lơ̆m chăl ‘nao. Mă đơ̆ng ‘nau ‘măng mă blŭng đei pơgơ̆r mă lei lơ̆m khei ‘năr kơ đeh, ‘măng pơlong hlôi hơvơn đei vang pơlong đơ̆ng 1 trĭu ‘nu bơngai hăm hlŏh 2 trĭu ‘măng pơlong hăm đĭ đăng kon pơlei pơla vang pơlong. Khŭl chĕp pơgơ̆r hlôi pôk ăn 1 tơmam hơpăh gĭt kăl, 1 tơmam hơpăh dơ̆ng mă blŭng, 1 tơpam hơpăh dơ̆ng mă 2, 1 tơmam hơpăh dơ̆ng mă 3 păng 2 tơmam hơpăh pơchhơp jơhngơ̆m ăn rim khŭl pơlong gơ̆h hơgei hlŏh.

Tơblơ̆ nơ̆r: Amazưt