VOV4.Bahnar - Kơtă ăh tong ane# plei tơm Buôn Ma Thuột ‘nao dang ei, dêh char Dak Lak, duh oei đei minh pơlei kơ bngai  Êđê oei răk vei lơ um ai joh ayo\ kră xơ\ - noh jing pơlei Ako\ Dhông, phường Tân Lợi. ‘Nâu jing minh lơ\m dôm tơring đei lơ tơmoi lơ\m teh đak bơ\n đơ\ng teh đak đe truh tơmang.

Pơlei Ako\ Dhông oei ăh je# tôch jăl trong  Trần Nhật Duật, plei tơm Buôn Ma Thuột, jing um ru\p pơlei pơla kơ kon pơlei Tây Nguyên ăh tong ane# plei tơm hăm dôm bơbu\ng hnam kjung kiơ\ hnam xo kră xơ\ kơ hơdrung kon pơlei Êđê. ‘Nâu jing pơlei xă, đei tơdrong joh ayo\ đunh đai đơ\ng xơ\.

Bơbu\ng hnam kjung jing anih pơgơ\r lơ tơdrong ako\m joh ayo\, xoi [lo\k kơ yă [ok dơnơm păng ako\m rim bngai [ơ\t đei tơdrong et xa tih nhen: pơgơ\r xoi plang apinh kơ pơyan ;mi kial xđơ\ng, xoi [lo\k kơ yang hri, pơgơ\r tôn ching chêng, hri hơnhông, joh ayo\ kơdo\ xuang... Kon pơlei Êđê tơ\ pơlei Ako\ Dhông duh oei răk vei lơ um ru\p joh ayo\ kră xơ\, păng hơnơ\ng pơgơ\r kơmăng ako\m tôn ching chêng. Hăm bngai Êđê, ching chêng jing mu\k drăm ka#m kang, jing pơhngol kơ po. Tơje# hăm ge tơdrô păng jơmu\l unh ăh kơmăng, ang jơva ching chêng nhen tơroi kơ tơdrong tơroi bngai Êđê đơ\ng ‘năr blu\ng iung pơjing pơlei pơla, ang bang jơhngơ\m pran kơtang kơ tơring bri kơdrơ\ng.

‘Măng mă blu\ng truh Việt Nam tơmang, đei năm lăng hnam kjung kră xơ\ păng đei et tơdrô ge, tơdra hơxuang, tôn ching chêng tơ\ Buôn Ma Thuột. Pơmai Natalia, tơmoi đơ\ng teh đak Nga, măh chre\ng kơ măt hăm tơdrong joh ayo\ tơ\ tơring păng akhan âu jing minh trong ‘nao vă pơtho găh joh ayo\ mă pơlei đei băt truh. Pơmai Natalia tơroi: “Âu jing ‘măng mă blu\ng nhôn truh Việt Nam, păng đei hơlen băt lơ tơdrong kăp g^t găh joh ayo\ Việt Nam. {ơ\t truh tơ\ âu, nhôn đei tơmơ\ng minh trong ‘nao găh pơtho vei răk joh ayo\, hăp pha hăm dôm tơdrong mă nhôn đei băt tơ\ teh đak po. Nhôn [ôh tơdrong phara đơ\ng 2 tơdrong joh ayo\, tơdrong mă noh kăp g^t păng hơ iă tơpă”.

Oei ‘nho\ng Nikolai, tơmoi đơ\ng teh đak Nga truh đơ\ng plei tơm Ekaterinburg, teh đak Nga, ‘măng mă blu\ng đei et tơdrô ge păng ako\m lơ\m joh ayo\ Êđê, ‘nho\ng mă chre\ng kơ đon hăm tơdrong ‘lơ\ng [ăt đơ\ng tơdrô ge tơ\ âu. Mă hăt noh [ơ\t tơdrô ge đei pai đơ\ng phe noh ‘nho\ng roi băt hơdăh tơdrong ‘lơ\ng đơ\ng kơloăi tơdrô âu. ‘Nho\ng Nikolai tơroi: “Âu noh ‘măng mă blu\ng inh đei et tơdrô đei pai đơ\ng phe, tơ\ teh đak inh, tơdrô Vodka đei bơ\ đơ\ng tơmam nai. Mă 2 noh trong mă đe et tơdrô tơ\ âu adoi chrih mơ\n, đe ưh kơ đei et adro# lơ\m mo\ng kơli mă et hăm đing, păng et hơtu\m minh ‘măng. Minh tơdrong dơ\ng noh, tơdrô âu ưh kơ đei kơdraih, [ônh et, tơdrong mă âu ‘lơ\ng hăm jơhngơ\m jăn. Kơlih tơ\ Nga bngai mơlôh hơnơ\ng et tơdrô kơdraih, thoi noh ưh kơ ‘lơ\ng hăm jơhngơ\m jăn ôh”.

Atu\m hăm dôm tơdrong hlôi đei găh hnam păng joh ayo\, rim kon pơlei tơ\ pơlei adoi băt hơdăh găh tơdrong vei răk tơ[ăk mong păng tơbang joh ayo\ po ăn tơmoi truh tơmang. {ok Ama Pi, oei tơ\ pơlei Ako\ Dhông, plei tơm Buôn Ma Thuột ăn tơbăt: “Kơlih kiơ mă khul tôn ching chêng kơ pơlei nhôn đei pơtoi hơnơ\ng noh yuơ tôm bngai adoi đei đon, adoi đei kơdih pơ hngol, adoi đei tơdrong tơnăp, hơnơ\ng kơ ‘meh vei răk tơ[ăk mong joh ayo\ kơ po vă tơbang ăn rim bngai, rim tơring jo# hloi teh đak đe păng lơ\m teh đak po băt truh păng hlôh vao găh joh ayo\ kơ Êđê. Păng mă hăt noh ‘meh vă rim bngai băt truh vă atu\m băl pơtoi păng ato\k tơdrong joh ayo\, dôm um ru\p joh ayo\ nhen thoi âu”

Pơlei Ako\ Dhông jing minh lơ\m to\ xe\t pơlei pơla Êđê dang ei oei răk vei đei kjă joh ayo\ kăp g^t kơ kon pơlei Êđê, jing anih bơ\ng pang găh joh ayo\ Êđê lơ\m plei tơm Buôn Ma Thuột. Tơdrong kăp g^t mă blu\ng [ơ\t truh tơ\ pơlei Ako\ Dhông noh jing tơdrong bot păng rơgoh ‘lơ\ng, um ru\p hnam kăp g^t păng cham char guăng ‘lơ\ng nhen um bieh. Tơ\ âu đei lăng jing minh anih năm truh tơmang ưh kơ gơh k[ah lơ\m tơdrong tơmang Ban Mê.

Lan chih păng rapor