VOV4.Bahnar - Tơ̆ hop akŏm trư̆k tuyên Khŭl kơdră Dơnŏ anĭh chĕp pơgơ̆r Tĕh đak găh tang găn jĭ Covid-19 hăm kơdră chĕp pơgơ̆r pơlei tơm Hồ Chí Minh, Kơ iĕng Thủ tướng Vũ Đức Đam, Kơdră chĕp kơ̆l Dơnŏ anĭh chĕp pơgơ̆r Tĕh đak tang găn jĭ pơma hơdăh: Pơlei tơm Hồ Chí Minh kăl iung jang kiơ̆ kơtang vă khei ‘năr jang kiơ̆ oei hơtăih dĭh băl kiơ̆ Nơ̆r athei jang kiơ̆ 16 đơ̆ng Thủ tướng tĕh đak hăm trong bu oei tơ̆ yơ oei tơ̆ nŏh vă tang găn jĭ. Tơbăt tơ̆ Hop akŏm, ƀok Nguyễn Thành Phong, Kơdră chĕp pơgơ̆r Dơnŏ anĭh vei lăng kon pơlei kơ pơlei tơm Hồ Chí Minh tơbăt: hrei au pơlei tơm tŏk bŏk hơmet ăn tĕnh koăng rim trong jang kiơ̆ oei hơtăih dĭh băl pơ đĭ lơ̆m pơlei tơm lơ̆m 15 năr, iŏk đơ̆ng tŏk bŏk măng năr 9/7 sơđơ̆ng tơdrong erĭh sa ăn kon pơlei, hoei chă vơ̆l dơ̆ng păng đei ƀơm kơnê̆. Iung pơma tơ̆ Hop akŏm, Kơ iĕng Thủ tướng Vũ Đức Đam  athei: Oei hơtăih dĭh băl kăl ƀlep hăm trong jang kiơ̆ mă kơtang hlŏh dơ̆ng, pơgĕnh kiơ̆ dôm năr ăn oei hơtăih dĭh băl kiơ̆ Nơ̆r athei jang kiơ̆ 16 đơ̆ng Thủ tướng tĕh đak vă tang găn kĕ jĭ hơbŭh.

Tơblơ̆ nơ̆r: Amazưt