VOV4.Bahnar - Pơlei tơm Hồ Chí Minh pơm lơ liơ vă iŏk đei tơdrong ‘mĕh vă atŏk tơ iung pơdrŏng hơtŏ hăm rim tơring kơdrơ̆m lơ̆m tơring Đông Nam Á. ‘Nŏh dôm nơ̆r pơma mă rim bơngai tang măt đei pơma dơnŭh tơ̆ Hop akŏm Khoa hŏk “Pơchŏh trong atŏk tơ iung pơlei tơm Hồ Chí Minh jăl jang 2021-2030 păng lăng trŭh sơnăm 2045" kơ yuơ Dơnŏ anĭh vei lăng kon pơlei kơ pơlei tơm pơgơ̆r pơgê năr 5/5. Hop akŏm hlôi sơng iŏk đei hlŏh 80 tơdrong pơma dơnŭh đơ̆ng rim bơngai joăt jang, bơngai jang khoa hŏk, kơdră chĕp pơgơ̆r rim hơnĭh tơm, hnam trương, rim dêh char lơ̆m Tơring jang mŭk drăm gĭt kăl găh Pơbăh. Rim nơ̆r pơma đei pơma hơdăh, pơlei tơm Hồ Chí Minh pơm jŭk yŭk trong hơlau jang mŭk drăm, pơjing hơyak pran ăn tơring jang Mŭk drăm tơm tơring Pơbăh păng pơđĭ lơ̆m tĕh đak. Kơna, tơdrong atŏk tơ iung pơlei tơm ‘nŏh jing hơyak pran ăn atŏk tơ iung pơđĭ lơ̆m tơring păng pơ đĭ lơ̆m tĕh đak. Pơlei tơm hlôi sơkơ̆t hơdăh atŏk tơ iung kiơ̆ tơring kơdrơ̆m kơ jăp ‘lơ̆ng, tơring kơdrơ̆m gơ̆h hơgei oei sa ‘lơ̆ng hơ iă ‘nŏh kăl atŏk kơtang jang kiơ̆ kmăi kmok kơsô̆, jang kiơ̆ lơ̆m khŭl kơdră chĕp pơgơ̆r kơsô̆, tơpôl kơsô̆, atŏk kơtang bơ̆ jang tĕh đak ‘lơ̆ng kơ jăp.

Tơblơ̆ nơ̆r: Amazưt