VOV4.Bahnar – Pơgê năr 2/7, tơ̆ Hà Nội, pơgơ̆r Hop akŏm trư̆k tuyê̆n jâ̆p teh đak xơnơ̆t tơdrong jang nô̆i vŭ 6 khei blŭng xơnăm păng tơlĕch tơdrong jang kơ 6 khei jê̆ đĭ xơnăm kơ anih jang nô̆i vŭ. Ƀô̆ trưởng Anih tơm Nô̆i vŭ Phạm Thị Thanh Trà pơgơ̆r hop akŏm. 6 khei kơ âu, anih jang nô̆i vŭ hlôi tơgŭm kăp gĭt ăn tơdrong đei jơnei kơ tơdrong pôk rơih Bơngai jang tang măt ăn Kuôk hô̆i jăl 15 păng jang tang măt lơ̆m Hô̆i đŏng kon pơlei dôm jăl jang 2021-2026; hơnơ̆ng tơplih 'nao tơdrong jang, trong pơgơ̆r jang, pơm kiơ̆ kơjăp Tơchơ̆t Hop akŏm mă 13 kơ Đảng păng Hop akŏm rim đảng ƀô̆ tơ̆ tơring. Tơ̆ hop akŏm, tang măt ăn Anih jang Nô̆i vŭ dôm dêh char, plei tơm pơma đam găh dôm tơdrong tơnap tap, tơdrong tơjruh lơ̆m pơm kiơ̆ dôm Tơchơ̆t đơ̆ng Khul kơpal teh đak găh axong tơdrong jang, kơsô̆ bơngai jang biên chê̆, kơsô̆ bơngai pơm jang; Pơkăp anih jang hanh chĭnh kơ teh đak... Rim bơngai tang măt pơkăl, Anih tơm Nô̆i vŭ kăl đei hla bar pơtho hơdăh hloh dơ̆ng vă dôm tơring, anih jang tơlĕch pơm jang.  

Pơma ăh jơ pơtôch hop akŏm, Ƀô̆ trưởng Anih tơm Nô̆i vŭ Phạm Thị Thanh Trà pơkăl: dôm khei jê̆ đĭ xơnăm, Anih jang Nô̆i vŭ dôm dêh char, plei tơm athei pơm kiơ̆ kơjăp tơchơ̆t Hop akŏm mă 13 kơ Đảng, kơ Anih tơm nô̆i vŭ, rim tơring vă tơplih 'nao trong pơm jang; tơmơ̆ng nơ̆r tơgop đơ̆ng tơring, hơnơ̆ng pơma dơnuh găh kơtơ̆ng ang hăm Anih tơm Nô̆i vŭ vă đei trong xek tơlang tơnăp.

Lan chih păng pơre nơ̆r