VOV4.Bahnar - Pơm lêh pơjao bơ̆ jang ƀar păh Tổng Bí thư Nguyễn Phú Trọng, sơ̆ jang kơdră chĕp pơgơ̆r Tĕh đak hăm ƀok Nguyễn Xuân Phúc, Kơdră jang lơ̆m Dơnŏ anĭh tơm Chĭnh trĭ, Kơdră chĕp pơgơ̆r tĕh đak ‘nao đei pơgơ̆r tơ̆ Hơnĭh bơ̆ jang Kơdră chĕp pơgơ̆r Tĕh đak.

Tổng Bí thư Nguyễn Phú Trọng hăm Kơdră chĕp pơgơ̆r Tĕh đak Nguyễn Xuân Phúc atŭm hăm rim kơdră chĕp pơgơ̆r păng kơdră so chĕp pơgơ̆r Đảng, Tĕh đak vang năm Pơml ê̆h pơjao.

Lăng dơ̆ng 2 sơnăm 1 poăt hăm kơchư̆k jang Kơdră chĕp pơgơ̆r tĕh đak, lơ̆m jơ ‘năr đei lơ tơdrong tơnap tap, tơhlăk tơhlĭn, tơdrong jang lơ, Tổng Bí thư ƀô̆h hlôi hơdrin jang tôm tong, đei jơnei rim tơdrong jang, hơnăp jang kiơ̆ tơdrong tơchơ̆t kơ Khôi luơ̆t tơm tĕh đak păng Khôi luơ̆t. Ƀlep lơ̆m jơ ‘năr au, Tổng Bí thư hmach bơnê kơ yă Đặng Thị Ngọc Thịnh, Kơ iĕng Kơdră so chĕp pơgơ̆r tĕh đak, hlôi bơ̆ jang keh kong ‘lơ̆ng rim tơdrong đei pơjao. Tổng Bí thư lui akhan, hăm hơnăp jang kơtang, Kơdră chĕp pơgơ̆r tĕh đak Nguyễn Xuân Phúc hăm Kơ iĕng Kơdră chĕp pơgơ̆r tĕh đak Võ Thị Ánh Xuân gô tĕnh koăng joăt hăm tơdrong jang ‘nao, đei nơ̆r pơrô̆ ‘lơ̆ng, tơtom, jơnei vă Hơnĭh bơ̆ jang ăn Kơdră chĕp pơgơ̆r tĕh đak hơnơ̆ng iung jang ‘lơ̆ng jơhngơ̆m đon tơgoăt tơgoăl, mĭnh jơhngơ̆m đon, tơplĭh ‘nao tơchăr, tơ iung pơjing khŭl Đảng păng hơnĭh bơ̆ jang pran kơtang tôm tong, jang keh đang ‘lơ̆ng rim tơdrong jang đei pơjao.

Tơblơ̆ nơ̆r: Amazưt