VOV4.Bahnar - Kơsơ̆ năr 8/4, pơm lê̆h pơjao tơdrong jang kơ Thủ tướng tĕh đak đei pơgơ̆r tơ̆ Hơnĭh bơ̆ jang Khŭl kơdră tĕh đak, ƀar păh Thủ tướng Phạm Minh Chính hăm Kơdră chĕp pơgơ̆r Tĕh đak Nguyễn Xuân Phúc - Thủ tướng so păng tơbăt hơdăh Tơdrong tơchơ̆t pôk tơmơ̆t 2 ‘nu Kơ iĕng Thủ tướng hăm mĭnh ƀar ‘nu kơdră dơnơm, khŭl bơ̆ jang lơ̆m Khŭl kơdră chĕp pơgơ̆r Tĕh đak jăl jang 2021 - 2026.

Kơdră chĕp pơgơ̆r Tĕh đak Nguyễn Xuân Phúc hăm Thủ tướng Phạm Minh Chính pôk pơkao ăn rim kơdră Tĕh đak jăl jang2016 - 2021

Iung pơma tơ̆ jơ pơm lê̆h, Kơdră chĕp pơgơ̆r tĕh đak Nguyễn Xuân Phúc hmach chơt hơ iă ăn Thủ tướng ‘nao Phạm Minh Chính, rim Kơ iĕng Thủ tướng, Kơdră dơnơm, Kơdră hơnĭh bơ̆ jang ‘nao đei sơng iŏk Tơdrong tơchơ̆t Pôk tơmơ̆t. Adoi pơma tơbăt jơhngơ̆m đon bơnê kơ Dơnŏ anĭh tơm Chĭnh trĭ, Ban Bí thư, Ban Chấp hành Trung ương, Kuô̆k hô̆i, Mặt trận Tổ quốc Việt Nam, rim hơnĭh bơ̆ jang găh khŭl chĭnh trĭ păng rim răih kon pơlei pơla hlôi tơgŭm djru, jang hơdoi, pơjinbg rơvơn păng tơgŭm djru vă Khŭl kơdră chĕp pơgơ̆r tĕh đak jăl jang 2016 - 2021 jang keh đang tơdrong jang hlôi tơlĕch ăn, tơgŭm ăn kon pơlei, tơgop lơ̆m tơdrong iŏk đei jơnei kơ Khŭl kơdră Tĕh đak 5 sơnăm au ki, hơnhăk tĕh đak yak năm tơ̆ mĭnh jăl trong gĭt kăl hlŏh.

Tơblơ̆ nơ̆r: Amazưt