VOV4.Bahnar - Đơ̆ng hơ tuch khei 8 truh dang ei, dêh char Dak Nông hlôi ăn hŏk tro năm hŏk kơ tă tơ̆ hnam trưng hŏk. Jang hơ dai kơ jăp hăm rim khŭl linh lơ̆m tơ drong jang tang găn jĭ covid-19, anih jang vei lăng găh pơ tho pơ hrăm dêh char Dak Nông, tơ băt, đơ̆ng hơ tuch khei 8/2021, mơ̆ng kiơ̆ tơ drong jĭ hơ buh tơ̆ rim tơ ring mă dêh char tơ mơ̆t yua tơ tĕnh rim trong jang hŏk pơ hrăm vei sơ đơ̆ng. ‘Noh jĭ jang hơ dai tơ drong hŏk trực tuyến - kơ tă, klăih song trong hŏk tro năm tơ̆ hnam trưng hơ tăih băl 50-50, dăh mă hŏk pha ra kiơ̆ năr mônh - pêng - đăm, ƀar - puăn- drou lơ̆m giĕng.

Lăp dôm tơ ring tŏk bŏk athei ăn oei hơ drô̆, ưh kơ ăn yak vih vơ̆t mă athei hŏk trực tuyến. Ƀơ̆t pơ gơ̆r hŏk kơ tă, Dak Nông hlôi hơ len lăng tơ̆ dôm hnam trưng đei hŏk tro truh đơ̆ng lơ tơ ring. Gơ nang đơ̆ng trong jang âu mă Năr pơ gơ̆r mơ̆t hŏk blŭng ‘năr 5/9, dêh char hlôi chă ƀôh hŏk tro jĭ covid-19, păng tơ chă  hơ lơ̆k đei hơ nih jĭ lơ̆m tơ pôl vă tang găn. Dang ei, “vă pơm lăp sơ đơ̆ng, tơ tĕnh, vei lăng đei yua jĭ hơ buh Covid-19”, Dak Nông hlôi tŭn hrĕnh tơ drong ƀet vắc-xin, tŭn pran tơ roi tơ băt hơ tŏk ‘lơ̆ng đon băt kơ chăng đơ̆ng đĭ đăng kon pơ lei lơ̆m tang găn jĭ hơ buh.

Thuem: Tơ blơ̆