VOV4.Bahnar - Hnam trương pơtho hŏk pơhrăm jang tơbôl jang hơdoi hăm Dơnŏ anĭh tang măt tĕh đak Thái Lan tơ̆ Hà Nội păng Dơnŏ anĭh tang măt Việt Nam tơ̆ BangKok vang pơgơ̆r Pơma dơnŭh tơbăt 45 sơnăm năr pơjing tơbôl Việt Nam-Thái Lan (06/8/1976 - 06/8/2021). Pơma dơnŭh đei pơgơ̆r kiơ̆ trư̆k tuyên păng pơdăh kơtă lơ̆m mạng tơpôl Facebook vă tơ ƀô̆h tơbăt tơdrong tơgoăt tơboăl Việt Nam-Thái Lan ăn kon pơlei pơla. Iung pơma tơ̆ pơgơ̆r blŭng a Pơma dơnŭh, Kơdră tang măt Việt Nam tơ̆ Thái Lan Phan Chí Thành sơkơ̆t hơdăh, hơyak tơbăt 45 sơnăm ‘nŏh jing khei ‘năr gĭt kăl hlŏh vă ƀar tĕh đak atŭm dĭh băl lăng dơ̆ng dôm tơdrong iŏk đei păng lăng trŭh tơ̆ hơnăp kơnh. Hăm jơ ‘năr pơma dơnŭh dĭh băl rơhăo tơpăt, Pơma dơnŭh ư̆h khan lăp vă ƀar păh tơbăt dih băl jơhngơ̆m đon ‘mêm kơ eng dĭh băl ‘lơ̆ng hơ iă kơ ƀar tĕh đak lơ̆m 45 sơnăm au ki, mă lei oei tơbăt hơdăh tơdrong hơdrin pơm kơtang hlŏh dơ̆ng lơ̆m tơgoăt tơgoăl gĭt kăl Jang hơdoi kơtang hlŏh dơ̆ng Việt Nam – Thái Lan. Dôm trong tơlĕch vă jang tơ̆ Pơma dơnŭh hlôi tơ ƀô̆h hơdăh trong tơchăr hơ iă ăn jang hơdoi ‘lơ̆ng liĕm kơ ƀar tĕh đak tơ̆ hơnăp kơnh.

Tơblơ̆ nơ̆r: Amazưt