VOV4.Bahnar – Hnam trưng Phôh thŏng Dân tộc ban trŭ Trung hŏk kơ sở Krong tơ̆ tơring ataih yaih xăh Krong, apŭng Kbang, dêh char Gia Lai. Atŭm hăm tơdrong pơtho hŏk, đe thây kô oei akŏm đon băt vă hơvơn hŏk tro kon kông năm hŏk tơ̆ hnam trưng.

 Đơ̆ng pơgê hrôih ‘năr mônh blŭng iĕng, đe thây kô tơ̆ Hnam trưng Phôh thŏng Dân tộc ban trŭ Trung học kơ sở Krong hlôi iung hrŭk ao tơnŏ, ao ‘mi vă năm truh pơlei Tung Gút, ataih đơ̆ng hnam trưng pơhlom 10 km, “tơchă” hŏk tro. Truh ăh kơ̆l pơlei, Đinh Uýt – Kơdră pơlei Tung Gút hlôi gô bơih, atŭm hăm đe thây kô axong rim khul, truh rim hnam vă hơvơn đe oh năm hŏk. Jê̆ 7 jơ pơgê, hlôi đei 6 hŏk tro lơ̆m ti chĕp kơdŭng hơbăn ao tơ oei găh rŏng gre đe thây kô vă chôt vih hŏk tơ̆ hnam trưng. Kơdră thôn Đinh Uýt ăn tơbăt: “’Măng mă âu noh ƀar ‘măng inh jang atŭm hăm đe thây kô vă hơvơn hŏk tro vih tơ̆ hnam trưng, phơ phŏ jang atŭm hăm jơnŭm jang tơpôl, đảng viên tơ̆ pơlei vă hơlêm đe oh chôt vih tơ̆ hnam trưng. Phơ phŏ chă hơvơn tơroi tơ̆ pơlei, phơ phŏ jang atŭm hăm mĕ ƀă đe oh pơtho akhan kon hơ ioh, năm hŏk tơ̆ hnam trưng, jang atŭm hăm đe thây kô hơlêm ăh kơmăng”

Jing minh lơ̆m dôm bơngai pơtho mơlôh hloh kơ hnam trưng, ƀok thây Nguyễn Quốc Triều tơroi, lơ ‘măng xư hăm đe thây kô hư gre rok trong, pơ̆k kiơ̆ trong, hơbăn ao ‘mê̆ pơđĭ ƀenh kơ trôk teh: “Lơ̆m khei năr jang 4 xơnăm noh lơ̆m jăl mă blŭng hrat tơpă, jăl trong nơnăm tơnap tap. Inh kơchĕng truh đe hŏk tro kăl kơ chư noh athei adrin vă tơgŭm ăn đe oh tơ̆ tơring ataih yaih vă đe oh gơh tơrĕk hăm chư, dôm tơdrong hlôh vao vă gơh hiôk hian lơ̆m tơdrong erih”

Ataih đơ̆ng anih tơm apŭng Kbang hloh 40 km, Hnam trưng Phôh thŏng Dân tộc ban trŭ Trung học kơ sở Krong oei kơtă ăh tơring kông. Hnam trưng âu hlôi đei man hloh 17 xơnăm, dang ei đei 14 bơngai pơtho, hăm hloh 322 ‘nu hŏk tro, mă lơ noh bơngai Bahnar. Ƀok thây Phan Danh, Phŏ Kơdră hnam trưng ăn tơbăt, khei năr ki, ăh pơrang jĭ Covid – 19 hơbuh hli, hŏk tro ưh đei kơmăi hŏk trư̆k tuyê̆n, đe thây kô athei chih akŏm hla bar hŏk pơhrăm pơtruh ăn đe oh tơ̆ pơlei. Đơ̆ng tong anê̆ khei 11 âu, hŏk tro pơtoi chôt vih hŏk tơ̆ hnam trưng hŏk kơtă. Chŏng mă kơsô̆ hŏk tro pơdơh hŏk adoi lơ, bơngai pơtho athei năm hơlêm đe oh chôt vih hŏk tơ̆ hnam trưng. Rim ‘măng năm hơvơn jing minh tơdrong hrat. Ƀok thây Phan Danh tơroi: “Đon lăp kơ hŏk pơhrăm đơ̆ng đe oh tam mă kơjung, jô̆ hloi đe mĕ ƀă duh ưh kơ ‘meh kon hơ ioh năm hŏk kơlih dang ei hŏk tro jăl 2 đe oh hlôi tih, hlôi băt pơm jang păng unh hnam lăng đe oh noh jing bơngai jang tơm lơ̆m unh hnam. Minh ƀar noh mĕ ƀă ưh kơ ăn kon năm hŏk. Đei ‘măng ‘nhŏng oh chă năm hơvơn, noh mĕ ƀă ưh kơ lăp đon oei tơpuh lê̆ bơngai pơtho, noh tơdrong chă hơvơn tơnap tap tơpă. Mưh ƀôh hŏk tro chôt vih tơ̆ hnam trưng tam mă xơđơ̆ng noh hnam trưng athei krao akŏm đe thây ko kơtă đơ̆ng kơsơ̆ ‘năr giĕng vă ăh kơmăng noh păng pơgê ‘năr mônh đe thây kô athei năm hơvơn hloi”

Yak hloh dôm tơdrong tơnap tap, đe thây kô tơ̆ Hnam trưng Phôh thŏng Dân tộc ban trŭ Trung học kơ sở Krong duh oei dăp đon dăp bơnôh băt kơ hŏk tro, tơguăt hăm tơdrong jang. Hơbŏ tơdrong hơ iă tih hloh đơ̆ng dôm bơngai pơtho tơ̆ âu noh đe hŏk tro ưh đei prơih lê̆ hnam trưng, prơih lê̆ lăm hŏk, vă tơdrogn erih ning nai kơnh ưh đei pơxuơ̆k pơxuơ̆l hăm tơdrong pơngot rơvĕt hin dơnuh bơih.

Lan chih păng pơre nơ̆r