VOV4.Bahnar - Dơnŏ anĭh tơm vei lăng Hnam trương pơtho pơhrăm ‘nao pơgơ̆r Hop akŏm trư̆k tuyên pơtôch sơnăm hŏk 2020-2021 păng tơlĕch tơdrong jang hăm pơtho pơhrăm jăl kơ đĕh sơnăm hŏk 2021-2022. Sơnăm hŏk 2020-2021 jing sơnăm hŏk mă tơdrong jang pơtho pơhrăm jăl kơ đĕh đei tơpôl lăng kơ jăp, kơ yuơ ‘nau jing sơnăm blŭng a khŭl au đei tơlĕch jang kiơ̆ jăl pơtho phổ thông sơnăm 2018. Dơnŏ anĭh tơm vei lăng hnam trương pơtho pơhrăm hlôi hơlen sơnăm blŭng a jang kiơ̆ pơtho pơhrăm kiơ̆ kơsơ̆p hla bơar ‘nao đơ̆ng lăm 1 păng athei rim dơnŏ anĭh pơtho jăl mĭnh kăl tơlĕch jang kiơ̆ kơtang trong jang pơgơ̆r pơto pơhrrăm ƀlep hăm tang găn jĭ Covid-19.

Hop akŏm pơtôch sơnăm hŏk 2020-2021 păng tơlĕch trong jang pơtho pơhrăm sơnăm hŏk 2021-2022 hăm jăl kơ đeh

Sơnăm hŏk 2020-2021 jing sơnăm gĭt kăl hlŏh hăm dơnŏ anĭh pơtho pơhrăm pơma atŭm păng jăl mĭnh pơma hơmŏ mư̆h blŭng a lơ̆m tĕh đak jang kiơ̆ Trong pơtho pơhrăm phổ thông ‘nao hăm lăm 1. Đơ̆ng blŭng sơnăm hŏk hloi, tơdrong tơlĕch jang, kơsơ̆p hla bơar ‘nao hăm lăm 1 đei lăng kơ jăp. Đĭ đăng rim hnam trương jăl kơ đĕh lơ̆m tĕh đak hlôi jang kiơ̆ sơđơ̆ng mĭnh hơnĭh 1 lăm. Ƀok. Hoàng Quốc Tuấn, Kơdră chĕp pơgơ̆r Dơnŏ anĭh vei lăng hnam trương pơtho pơhrăm dêh char Lạng Sơn tơbăt:“Dăr lăng, hơmet ăn lăm hŏk đei lăng kơ jăp hlŏh đơ̆ng rŏng lăm 1 ‘nŏh lăm 2, sơđơ̆ng lơ̆m mĭnh lăm 1 hơnĭh vă đe ŏh gơ̆h hŏk prăt năr, sơđơ̆ng ăn tơdrong pơtho pơhrăm kiơ̆ trong pơtho hle”.

Kiơ̆ đơ̆ng yă Trần Thị Minh Thu, Kơdră Hơnĭh vei lăng pơtho pơhrăm jăl mĭnh găh Dơnŏ anĭh vei lăng Hnam trương pơto pơhrăm dêh char Lào Kai, atŭm hăm hơmet tơmam drăm, khŭl ƀok thây kô jei đei lăng kơ jăp, pơtho ming, sơđơ̆ng ăn pơtho kiơ̆ tơdrong ‘nao, kơsơ̆p hla bơar ‘nao: “Trong mă nhôn tơlĕch ăn ‘nŏh ƀok thây kô kăl hơbĕch hơbal, pơtho ‘nŏh pơtho ngơ ngê̆, ‘lơ̆ng hơ iă. Rim ƀok thây kô pơtho tơlĕch ƀai pơtho ăn hŏk tro trŏ ƀlep hăm tơdrong hlô̆h vao kơ hŏk trp vă pơtho trŭh dang yơ ‘nŏh hŏk tro gơ̆h đŏk trŭh dang nŏh păng chĭh tôm trŭh dang nŏh hloi”.

Hơnơ̆ng pơjing trong bơ̆ jang krao tơmơ̆t, pơtho pơhrăm ming vă đei tôm ƀok thây kô, sơđơ̆ng ăn pơtho pơhrăm ‘lơ̆ng hơ iă.

Lơ̆m khei ‘năr đei jĭ hơbŭh Covid-19 pơrăm kơtang, lơ̆m dơnŏ anĭh pơtho pơhrăm hlôi jang kiơ̆ ƀar trong jang ting ring: mĭnh păh tơlĕch jang rim trong jang tang găn jĭ adoi tơlech jang hloi Tơdrong jang pơtho pơhrăm phổ thông 2018 hăm lăm 1. Lăng hơlen pơtôch hŏk pơ hrăm kơ hŏk tro lơ̆m tĕh đak sơnăm hŏk 2020-2021 đei ƀô̆h, 41% hŏk tro hŏk gơ̆h trong pơtho hle; 15% hŏk tro hŏk hơ iă, 41% hŏk keh đang păng 15% hŏk tro tim mă keh đang. Pơting hăm trong pơtho hơdrol au ki đei ƀô̆h, kơsô̆ hŏk tro tim mă keh đang dôm ăi.mă lei kơsô̆ hŏk tro hŏk gơ̆h hlôi đei tŏk lơ. Ƀok Nguyễn Hữu Độ, Kơ iĕng Kơdră Dơnŏ anĭh tơm vei lăng Hnam trương pơtho pơhrăm akhan, ‘nau jing hơyak blŭng a vă jang kiơ̆ trong pơtho pơhrăm phổ thông ‘nao hăm khŭl lăm 2 lơ̆m sơnăm hŏk 2021-2022. Lơ̆m au tơdrong kăl lăng kơ jăp ‘nŏh kăl atŏk tơ iung kơtang hlŏh dơ̆ng khŭl ƀok thây kô pơtho pơhrăm.“ ‘Măn ăn atŏk tơ iung khŭl ƀok thây kô pơtho, dôm đe ƀok thây, kô pơtho chă pơtho kăl đei trong pơtho hơgei, jơhngơ̆m đon phăl mă kăl ‘nŏh kăl đei hŏk pơhrăm ming trong pơtho pơhrăm, băt hơdăh hlô̆h vao hăm trong pơtho 'nao kiơ̆ trong pơtho hŏk atŏk jơhngơ̆m đon hlô̆h vao. ‘Nau jing tơdrong kăl hlŏh vă đei jơnei tơdrong tơplĭh ‘nao trong pơtho pơhrăm phổ thông”.

Atŭm hăm iung jang păng mĭnh ƀar tơdrong đei ƀôh ‘lơ̆ng hơ iă, sơnăm blŭng tơlĕch jang tơdrong pơtho pơhrăm phổ thông 2018 đơ̆ng lăm 1, khŭl ƀok thây kô pơtho păng kang ƀô̆ vei lăng tim mă gơ̆h hơgei hơtŏ dĭh băl, mă kăl tơ̆ rim tơring tơnap tap. Măt bơngai ƀok thây kô pơtho păng kang ƀô̆ vei lăng oei đei tơdrong đei tơring rơkăh, đei tơring ư̆h kơ măh. Mĭnh ƀar tơring tơ ƀơ̆p tơnap tap găh trong bơ̆ jang, kon jên tơmơ̆t jang, kĭ pơ kăp tơmơ̆t ƀok thây kô pơtho; đei tơring tơchă ư̆h kơ đei tôm ƀok thây kô mơ̆t jang pơtho pơhrăm. Tơmam drăm mĭnh ƀar hơnĭh tim mă tơgăl vă jang kiơ̆ trong jang păng tơdrong ‘mĕh vă tơgŭm ăn hŏk pơhrăm anai. Sơnăm hŏk 2020-2021, lơ̆m tĕh đak đei 14.786 hnam trương pơtho pơhrăm jang kiơ̆ Trong pơtho pơhrăm phổ thông tơ̆ jăl kơ đĕh, hăm 16.323 hnam trương, pơtho ăn vă jê̆ 9 triu ‘nu hok tro, tŏk hlŏh 150.000 ‘nu hok tro lơ̆m sơnăm hŏk 2019-2020.

Dơnŏ anĭh tơm vei lăng Hnam trương pơtho pơhrăm hlôi tơlĕch ăn 5 tơdrong jang hăm lơ trong jang hơdăh ăn pơtho pơhrăm jăl kơ đĕh sơnăm hŏk 2021-2022. Mă hơăh, hơnơ̆ng tơlĕch sơđơ̆ng ‘lơ̆ng trong pơtho pơhrăm phổ thông 2018 hăm lăm 1, lăm 2 păng jang kiơ̆ jơnei pơtho pơhrăm phổ thông đơ̆ng lăm 3 trŭh lăm 5. Lơ̆m khei ‘năr đei jĭ hơbŭh, Kơdră chĕp pơgơ̆r Dơnŏ anĭh tơm vei lăng Hnam trương pơtho pơhrăm Nguyễn Kim Sơn akhan, sơnăm hŏk truh au kơnh, lơ̆m hơnĭh pơtho pơhrăm akŏm rim trong jang vă dă ƀiơ̆ đei tơdrong ư̆h kơ ‘lơ̆ng hơ iă ăn pơtho pơhrăm tơ̆ hơnăp jĭ hơbŭh. Kơrŭn jơhngpơ̆m jang keh đang ‘lơ̆ng, rim hnam trương sơđơ̆ng dơ̆ng kơ jăp tơ̆ hơnăp jĭ jăn: “Ĭnh pơma hơdăh ‘nŏh bơ̆n kăl tơplĭh trong hle ăn pơtho pơhrăm, mă lei tơdrong kăl hlŏh ‘nŏh tơplĭh ‘nao yă kiơ, tơplĭh lơ liơ, tơplĭh vă pơm kiơ? Bơ̆n tơplĭh kiơ̆ lơ̆m chăl hle, dôm tơring ư̆h sơđơ̆ng lơ̆m tang găn jĭ ‘nŏh tơplĭh kiơ̆ trong hle. Tang găn jĭ hơbŭh, hơmet pơ ‘lơ̆ng tơdrong đei ƀơm kơnê̆ đơ̆ng jĭ hơbŭh”.

Dơnŏ anĭh tơm vei lăng Hnam trương pơtho pơhrăm athei rim tơring kăl đei trong jang dăr lăng dơ̆ng măt bơngai hŏk tro lơ tŏ sĕt lơ liơ kơ yuơ đei ƀơm kơnê̆ đơ̆ng jĭ hơbŭh. ‘Ngoăih tơdrong ‘lơ̆ng kăl đei lăng kơ jăp trŭh tơdrong tơgŭm djru rim đe ŏh năm hŏk, mă kăl mư̆h tơdrong erĭh sa kơ rim ŭnh hnam đei ƀơm kơnê̆ đơ̆ng jĭ hơbuh Covid-19. Mă kăl, tơlĕch lơ trong pơtho pơhrăm vă hơmet pơ ‘lơ̆ng, tơ jră tang găn rim tơdrong đei ƀơm kơnê̆ đơ̆ng jĭ hơbuh Covid--19. Tơlĕch jang hloi rim trong jang vă pơgơ̆r pơtho hŏk ‘lơ̆ng hơ iă trŏ lăp hăm khei ‘năr đei jĭ hơbŭh păng tơdrong kĕ sơđơ̆ng đơ̆ng dơnŏ anĭh pơtho pơhrăm adoi nhen dôm tơdrong đei ƀô̆h yan au kơ bơngai hŏk.

Bai chĭh đơ̆ng VOV

Tơblơ̆ nơ̆r: Amazưt