VOV4.Bahnar - Đơ̆ng rŏng 3 năr bơ̆ jang, kơsơ̆ năr 29/12, Hop akŏm Kŏng ang lơ̆m tĕh đak ‘măng mă 77 hlôi pơgơ̆r pơtôch. Iung pơma pơtôch hop akŏm, Kơdră chĕp pơgơ̆r Kŏng ang Tô Lâm pơkă, Kŏng ang rim hơnĭh, tơring kăl hơnơ̆ng tơplĭh ‘nao, sơkơ̆t hơdăh hơnăp jang hơdăh hăm rim hơnĭh, rim kang ƀô̆ lơ̆m bơ̆ jang pơrô̆ pơrôp kon pơlei păng tơ iung pơjing trong jang Pơđĭ kon pơlei vang vei lăng sơđơ̆ng Tĕh đak; atŏk kơtang bơ̆ jang tơbôl, jang hơdoi hăm apŭng plĕnh tĕh; Atŏk kơtang bơ̆ jang ‘lơ̆ng, jơnei rim tơdrong bơ̆ jang.

Kơdră chĕp pơgơ̆r Kŏng ang Tô Lâm iung pơma lơ̆m pơtôch hop akom

Ƀok Tô Lâm athei rim Kŏng ang rim hơnĭh, tơring dăr lăng kơ jăp tơdrong, jang kiơ̆ kơ jăp rim Nơ̆r athei jang kiơ̆, Nơ̆r tơchơ̆t pơrô̆ jang đơ̆ng ban Bí thư, Khŭl kơdră Tĕh đak, Thủ tướng tĕh đak, Dơnŏ anĭh chĕp pơgơ̆r tĕh đak tang găn jĭ hơbŭh Covid-19. Rim hơnĭh kăl pơrô̆ iung jang kơtang năm tơchă rôp bơngai yoch, vei lăng sơđơ̆ng Têt Nguyên đán Nhâm Dần.

Tơblơ̆ nơ̆r: Amazưt