VOV4.Bahnar – Khei năr âu ki, atŭm hăm jơnŭm pơgơ̆r tơring păng anih jang kơpal, dôm anih jang găh tơdrong khop tơ̆ dêh char Dak Lak duh hlôi đei lơ tơdrong jang kăp gĭt, vang glơng tơnap tap hăm kon pơlei tơ̆ tơring ƀơm răm đơ̆ng pơrang jĭ Covid-19. Lơ̆m ‘măng hơbuh jĭ mă 4 âu, Jơnŭm jang tang măt Tin Lành dêh char  Dak Lak hlôi axong jê̆ 5.500 tơpu tơmam ăn kon pơlei tơ̆ tơring hơbuh pơrang jĭ, hăm kơjă jên hloh 1 tih 500 trĭu hlj. Atŭm hăm noh, Anih jang y tê̆ - tơpôl kơ Anih pơgơ̆r khop Tin Lành Việt Nam Tơring pơbăh duh tơgŭm ăn dôm unh hnam đei bơngai ƀơm  F0 păng F1 tơ̆ dêh char Dak Lak dôm tơpu tơmam, hăm kơjă kăp  700 trĭu hlj.  

Khei năr âu ki, lơ tong gre chơ ‘nhăk tơmam drăm ‘mêm kơ eng đơ̆ng khul jang tơpôl  - Jơnŭm jang găh Khop Tin Lành dêh char Dak Lak hlôi truh hăm kon pơlei tơring pơm kiơ̆ pơkăp oei tơklăh, tơring pơkăp pơvei kơyuơ Covid-19, axong tơmam ăn kon pơlei tơ̆ 26 thôn – pơlei lơ̆m tơring kơ dêh char Đăk Lăk. Noh jing dôm tơring kon pơlei tơnap tap kơyuơ athei pơm kiơ̆ pơkăp oei tơklăh vă tang găn păng tơjră pơrang jĭ Covid-19.

Xăh Čư Né, apŭng Krong Ƀŭk, jing minh lơ̆m anih hơbuh pơrang hli hlơt hloh tơ̆ Dak Lak lơ̆m khei năr âu ki. Lơ̆m noh, dôm unh hnam tơ̆ dôm pơlei nhen Đrao, pơlei Dhiă, pơlei Mui, pơlei Kdrô duh pơm kiơ̆ pơkăp pơvei vă tơjră pơrang jĭ.

Tơ̆ âu, atŭm hăm tơdrong tơgŭm đơ̆ng dôm anih jang tơpôl lơ̆m tơring, kon pơlei oei đei khul jang tơpôl kơ Jơnŭm jang găh Khop Tin Lành dêh char  Dak Lak hlôi axong jê̆ 1.000 tơpu tơmam. Chih tơbăt tơdrong jang kăp gĭt âu, ƀok Y Hiệp Êban – Ƀĭ thư anih jang Đảng xăh Čư Né ăn tơbăt: tơdrogn erih kon pơlei hlôi tơnap tap, dang ei pơrang jĭ hơbuh noh roi tơnap hloh dơ̆ng, tơdrong tơgŭm, vang glơng đơ̆ng dôm anih jang ‘mêm bơnat tơpă tơgăl kơ pôk bơnê: “Xăh Čư Né nhôn chơt hơ iă kơyuơ đei tơdrong tơgŭm đơ̆ng dôm anih jang găh tơdrong khop. Mă kăl noh Jơnŭm jang găh Khop Tin Lành dêh char Dak Lak hlôi tơgŭm tơring nhôn tơmam drăm kăp gĭt ăn kon pơlei. Inh tang măt ăn Đảng ƀô̆ bơnê kơ anih jang, mă kăl noh Jơnŭm jang găh Khop Tin Lành dêh char Dak Lak”

Khei 8 âu ki, đơ̆ng rŏng kơ test renh lơ̆m tơring hlôi đei lơ bơngai ƀơm SARS-CoV2, tôm xăh Cư Bao, thĭ xăh Buôn Hồ, dêh char Đăk Lăk athei pơkăp pơvei, pơm kiơ̆ Tơchơ̆t kơsô̆ 16 đơ̆ng Thủ tướng teh đak. Ưh adrô̆ tơnap găh tơmam xŏng xa ăn kon pơlei, mă tơmam xa ăn kon tơrong – ier bip adoi jing khăi. Ƀôh thoi noh, jơnŭm pơgơ̆r tơring, dôm anih jang tơpôl păng dôm bơngai jang ‘mêm bơnat hlôi tenh kuăng tơgŭm tơtom. Ƀok Y Ban Ayun, Kơdră pơlei Krum A, xăh Cư Bao, thĭ xăh Buôn Hồ ăn tơbăt: “Inh xô̆ hơ̆k kơlih dôm bơngai jang ‘mêm bơnat hlôi axong tơmam tơgŭm ăn kon pơlei. Lơ̆m khei năr pơrang jĭ hơbuh âu ki đei tơmam tơgŭm ăn tơdrong erih nhen mì tôm, phe, xĭk... Bơnê kơ Anih jang tang măt hlôi pơtruh dôm tơmam drăm; kơdih po inh xô̆ hơ̆k păng kon pơlei lơ̆m pơlei adoi xơđơ̆ng jơhngơ̆m mơ̆n”.

Băt hơdăh pơkăp “tơjră pơrang nhen tơjră ayăt” đơ̆ng Jơnŭm pơgơ̆r teh đak, hăm pơkăp tơgŭm dih băl, kon khop Tin Lành tơ̆ Đăk Lăk hơnơ̆ng tơƀôh xơnong jang tơnăp hăm tơpôl.

Kiơ̆ tơdrong kĕ đei, phơ phŏ chă tơra phe, ‘nhot, plei ‘long, đei bơngai tơra jên vă tơgŭm ăn kon pơlei tơ̆ tơring hơbuh pơrang jĭ Covid-19 găn hloh tơnap tap. Pơmai H’Oanh Ayun (bơngai Ê Đê) tơ̆ pơlei Jung, xăh Ea Yông, apŭng Krông Pač kơchĕng, atŭm jơhngơ̆m hăm teh đak lơ̆m tơdrong tang găn păng tơjră pơrang jĭ Covid-19 jing tơdrong “plang ăn hloh kơ iŏk đei”: “Atŭm jơhngơ̆m hăm teh đak, lơ̆m tơdrong tơgŭm kon pơlei ƀơm tơnap tap kơyuơ đơ̆ng pơrang jĭ Covid-19 hơbuh hli, pơlei Jung nhôn duh chă hơvơn kon khop tinh lành chă tơra phe, mì tôm, jên hu vă tơgŭm ăn kon pơlei oei ƀơm tơnap tap kơyuơ đơ̆ng Covid-19. Nhôn pơm kiơ̆ tơdrong hơvơn đơ̆ng jơnŭm pơgơ̆r tơring, atŭm băl tơjră pơrang Covid. Ăh năm axong tơpu tơmam nhôn adoi pơm kiơ̆ tôm pơkăp vei vêr dơh po, unh hnam păng bơngai nai”

Mŭk sư Lemous Philemol – Kơdră Jơnŭm jang găh Khop Tin Lành dêh char Dak Lak ăn tơbăt: đơ̆ng mă pơrang jĭ Covid-19 hơbuh hli hlơt mă 4 tơ̆ Dak Lak, khul jang tơpôl kơ Jơnŭm jang găh Khop Tin Lành dêh char Dak Lak hlôi axong jê̆ 5.500 tơpu tơmam, rim tơpu tơmam đei: phe, minh kơthŭng mi tôm, đak măm, rơmă, xĭk hăm kơsô̆ jên đơ̆ng 200 - 300 rơbâu hlj. Hăm kơjă hloh 1,5 tih hlj. ‘Nguaih kơ dôm tơmam axong ăn kon pơlei tơring hơbuh pơrang jĭ, Jơnŭm jang găh Khop Tin Lành dêh char Dak Lak duh hlôi axong tơmam đơ̆ng Anih jang mŭk drăm – tơpôl đơ̆ng Anih pơgơ̆r khop Tin Lành Việt Nam Tơring pơbăh ăn dôm unh hnam bơngai lui đei ƀơm F0, F1 tơ̆ dêh char Dak Lak. Kơjă tơpu tơmam axong ăn đe  F0 păng F1 tơ̆ Đak Lăk lơ̆m khei năr âu ki noh 700 trĭu hlj, đei phe, păng jên. ‘Nguaih kơ noh, Jơnŭm jang găh Khop Tin Lành dêh char Dak Lak duh axong khul ƀak sih tơroi online ăn dôm bơngai kăl băt găh pơrang jĭ Covid-19, trong vei lăng kơdih po ƀơ̆t chă ƀơm F0 dăh mă F1, F2… Mŭk sư Lemous Philemol ăn tơbăt:  “Lơ̆m khei năr pơrang jĭ Covid 19 hơbuh hli, mă hăt noh ‘măng hơbuh mă 4 âu hlôi tơpoh lang xă jâ̆p teh đak. Pơrăm truh tơdrong erih tơpôl. Rim bơngai kiơ̆ dôm tơdrong khop jâ̆p tơring năm tơchă akŏm hơlêm, hơvơn tơgŭm tơmam drăm. Đei lơ tơdrong jang ‘mêm kơ eng kăp gĭt atŭm jơhngơ̆m vă tơjră pơrang jĭ. Inh lăng ƀôh dôm bơngai jang noh ƀak sih, kang ƀô̆ linh dăh mă đe pơmai oh drăkăn chă akŏm tơmam tơgŭm ăn kon pơlei tơring hơbuh pơrang jĭ. Đon bơnôh ‘mêm kơ eng hlôi pơm lơ bơngai ƀrơ̆k jơhngơ̆m lơ̆m khei năr pơrang jĭ hơbuh hli âu. Nhôn duh hlôi tơgop tŏ xĕt jơhngơ̆m po vă vang glơng tơdrogn hrat hăm dih băl”

Atŭm hăm tơdrong jang ‘mêm bơnat, tơgŭm kon pơlei tơring hơbuh pơrang yak hloh tơnap tap, khei năr âu ki, Jơnŭm jang găh Khop Tin Lành dêh char Dak Lak hơnơ̆ng tơbăt hăm Dôm jơnŭm khop Tin Lành tơ̆ tơring pơm kiơ̆ tơnăp pơkăp 5K đơ̆ng Anih tơm Y tê̆ păng dôm trong pơkăp tơjră pơrang jĭ Covid-19. Dôm tơdrong hơkŭm khop adoi đei pơgơ̆r trư̆k tuyê̆n. Đe mŭk sư, kơdră khul tơbăt ăn kon pơlei nĕ akŏm lơ bơngai, mă kăl noh ưh đei pơgơ̆r et xa âu to. Dôm tơdrong jang kăp gĭt đơ̆ng Jơnŭm jang găh Khop Tin Lành dêh char Dak Lak hlôi tơgop pơlan xă đon bơnôh ‘mêm kơ eng, atŭm jơhngơ̆m tang găn păng tơjră pơrang jĭ  Covid-19.

Lan chih păng pơre nơ̆r