VOV4.Bahnar - Pơyan ƀa phang sơnăm 2020 - 2021, apŭng Lăk dêh char Dak Lăk rei pơtăm hlŏh 5.300 ha ƀa đak, găh să tơ̆ rim tơring: Buôn Triết, Dak Liêng păng tơring Buôn Tría. Tŏk bŏk lơ̆m khei ‘năr yoă prĕh ƀa, kon pơlei tơ̆ au tôch chơt hơ iă kơ yuơ sơnăm au ƀa plei, tech măt

Tơdrong rei pơtăm păng yoă prĕh ƀa đei jang hăm kmăi kmŏk ngăl

Hơngŭr vang jang hăm ŭnh hnam pơdŭ ƀa đơ̆ng chŭn na, yă Nguyễn Thị Phán, oei lơ̆m Buôn Tung 1, tơring Buôn Triết, chơt hơ iă tơroi, ‘mi rŏ tŏ hơlăng kơna ƀa jing ‘lơ̆ng, plei ăl. Pơyan au, yă rĕi pơtăm hlŏh 4 ha ƀa hơdrĕch Đài Thơm 8. Bơngai mơdro năm răt tơ̆ chŭn na hloi kơna tơdrong chă yoă prĕh păng tĕch mơdro tôch rơvơn. Yă Phán chă hơlen, rŏ năng ŭnh hnam jang sa iŏk đei 150 trĭu hlak jên lơ̆m pơyan ƀa au.“Nhen ĭnh pơtăm Đài Thơm ‘nŏh lơ̆m 1 sao yoă prĕh đei 1 tân 2 tă. Găh kơ jă tĕch mơdro ‘noh sơnăm au măt ƀiơ̆ pơtêng hăm sơnăm sơ̆, bơngai mơdro năm răt kơna yoă prĕh đang dang yơ ‘nŏh kŏng dôm nŏh hloi. Găh kơ jă tĕch sơnăm au măt ƀiơ̆, tĕch ƀônh kơ hlot ƀiơ̆”.

Atăih kơ ‘nŏh ư̆h kơ măh dang yơ, ŭnh hnam ƀok Nguyễn Công Hùng, oei lơ̆m thôn Mê Linh 2, tơring Buôn Triết, jei tŏk bŏk mơ suơ̆t chă yoă prĕh ƀa. Ƀok tơroi, ŭnh hnam đei 5 ha chŭn, đơ̆ng lơ sơnăm kơ au hơnơ̆ng chă rĕi pơtăm hơdrĕch ƀa ST-24. Sơnăm au, atŭm hăm rei pơtăm ƀa, ƀok tơplĭh 5 sao chŭn na vă pơtăm ƀum iĕ. Tơdrong chơt hơ iă glŏh gloi dơ̆ng mư̆h pơyan rô̆ au jei đei iŏk lơ, găh kơ jă ‘nŏh đơ̆ng 8-10.000 hlak jên lơ̆m 1 kĭ. Ƀa jei đei plei kơ jăp, kơ jă măt ƀiơ̆ pơtêng hăm rim sơnăm.“Sơnăm au ƀa plei ƀiơ̆, lơ̆m 1 sao iŏk đei đơ̆ng 1 tân 2 trŭh 1 tân 3 ƀa hơdrĭh, yoă prĕh đang ‘nŏh kŏng tĕch hloi, hăm kơ jă dang 6.700 hlak jên lơ̆m 1 kĭ. Bơngai mơdro năm tơ̆ chŭn na răt ƀa kon pơlei”.

Kon pơlei chhôk hơ iă kơ yuơ sơnăm au ƀa lei dơ̆ng, tĕch măt dơ̆ng

Jĭ tơring chŏh jang sa, đei chŭn na să hlŏh apŭng Lăk, lơ̆m pơyan ƀa phang sơnăm au, tơring Buôn Triết rei pơtăm đei 2.000 ha ƀa đak. Kiơ̆ đơ̆ng ƀok Bùi Mạnh Hải, Kơdră chĕp pơgơ̆r Dơnŏ anĭh vei lăng kon pơlei tơring Buôn Triết tơbăt, sơnăm au ‘mi rŏ tŏ hơlăng, đak măh mau kơna ƀa blŭh vơ̆ jing ‘lơ̆ng, plei ăl. Jô̆ hơtŏ lơ̆m 1 ha kĕch yoă đei 9 tân; Mă kăl, mĭnh ƀar hơdrĕch ƀa nhen Đài Thơm 8, ST-24, ST-25 plei ăl hlŏh đei đơ̆ng 12-13 tân. Bơngai mơdro năm răt ƀa tơ̆ chŭn na hloi, hăm kơ jă đơ̆ng 5.800 – 7.000 hlak jên lơ̆m 1 kĭ. Pơtêng hăm sơnăm sơ̆ kơ jă au hăp măt ƀiơ̆ 1.000 hlak jên lơ̆m 1 kĭ. “Đei tĕh đak lăng ba kơ jăp tơmơ̆t jên jang pơm trong tơm tơring adoi nhen mĭnh ƀar trong năm tơ̆ chŭn na kơna tôch rơvơn ăn kon pơlei chă chơ pơdŭ ƀa. Mă ƀar dơ̆ng dang ei ‘năr tŏ hơlăng kơna kon pơlei chă yô̆ prĕh ƀa sơđơ̆ng. Tơring Buôn Triết joăt jang ƀa adoi pơm kiơ̆ ƀlep khoa hŏk kih thuơ̆t păng đei tơdrong vang chă pơtho tơbăt đơ̆ng Hơnĭh jang pơtrŭt chŏh jang sa păng rim bơngai khoa hŏk kơna mĭnh ƀar hơdrĕch ƀa chă rei pơtăm lơ̆m tơring tôch jing ‘lơ̆ng păng plei ăl”.

Lơ ŭnh hnam pơgĕnh sơ̆k ƀa vă tĕch măt hlŏh ƀiơ̆

Jei kiơ̆ đơ̆ng ƀok Hải, vă tơgŭm ăn kon pơlei jang sa sơđơ̆ng, kơdră tơring hlôi pơgơ̆r pơtho tơbăt kih thuơ̆t chŏh jang sa, chă rơ̆ih hơdrĕch, pơlôch sơdrông. Adoi, tơring jei tơgŭm djru rim hơp tak xah kĭ pơkăp răt iŏk rim hơnĭh pơm tơlĕch ƀa hơdrĕch ‘lơ̆ng păng rim hơp tak xah răt iŏk ƀa. Gơnơm đơ̆ng lơ lŏh, dôm sơnăm tơ jê̆ au, ƀa hơnơ̆ng plei ăl păng roi năr roi đei plei kơ jăp hlŏh. Kon pơlei jei jang kiơ̆ ƀlep khoa hŏk kih thuơ̆t, jang sa hăm kmăi kmŏk kơna tơdrong vei lăng păng yoă prĕh roi năr roi tĕnh koăng. Atŭm hăm ‘long pơtăm kăl, ƀa hlôi tơchă đei hơnĭh dơ̆ng kơ jăp lơ̆m groi kông au, tơgop pơm sơđơ̆ng măh mai phe sa ƀa sŏng păng jang sa iŏk yua dơ̆ng ăn kon pơlei.

Bơngai chĭh: H’Xíu H’Mốc

Tơblơ̆ nơ̆r: Amazưt