VOV4.Bahnar - Sơnăm au jing sơnăm blŭng a hlŏh 150 ŭnh hnam bơngai Mông oei tơ̆ dơnau choh jang sa Krông Pach Thượng, dêh char Dak Lăk đei sơng sơnăm ‘nao tơ̆ pơlei hle. Rim kơdră chĕp pơgơ̆r đơ̆ng tơring trŭh tơ̆ dêh char lăng ba kơ jăp păng roi năr pơjing hơyak pran kơjăp vă kon pơlei sơđơ̆ng erĭh sa, jang sa, pơkă ăn mĭnh tơdrong erĭh sa hiôk hian ‘lơ̆ng liĕm hlŏh.

Năr blŭng sơnăm 2022, ‘nhŏng Ma Văn Cỡ, hơdrung Mông, oei lơ̆m pơlei Yang San, tơring Cư̆ San, apŭng Ea Kar dêh char Dak Lăk năm lăng chŭn. Chŭn na să 5 sao ‘nao rei ƀa Phang hlŏh mĭnh poăt khei, ‘nhŏng đei ƀơk ăn kiơ̆ tơdrong pơjing oei tơ̆ pơlei hle kơ Tơdrong jang Pơnơ̆t đak Krông Pach thượng. Mĭnh păh ‘nŏh hơboong thoong đak ƀơ ƀlông kơ đak, mĭnh păh ‘nŏh tĕh chŭn na rơhŭ, ƀa tŏk bŏk blŭh vơ̆ jơ ƀlĭk, ‘nhŏng Cơ̆ akhan rŏ năng pă đei tơtăm găh kơ ƀăh phe sa ƀa sŏng bơih. Dơ̆ng tơ̆ pơnơ̆ chŭn na, ‘nhŏng tơmang lăng tơ̆ pơlei, chơt hơ iă tơbăt, Tĕh đak tơlĕch ăn pơjing pơlei hle lơ lau jĭ tôch kơ lăp,hơvĕn jang sa tơ jê̆ pơlei oei, tôch rơvơn ăn kon pơlei chă jang sa. Đơ̆ng rŏng 6 khei yông năm oei tơ̆ pơlei hle, ŭnh hnam ‘nhŏng hlôi sơđơ̆ng erĭh sa, hnam oei ming man ‘lơ̆ng liĕm. ‘Nhŏng Cơ̆ lui, hăm tơdrong tơgŭm djru đơ̆ng Tĕh đak atŭm hăm tơdrong hơdrin đơ̆ng rim ŭnh hnam, tơdrong erĭh sa kơ kon pơlei gô roi năr roi đei ƀô̆h ƀiơ̆:“Kon pơlei mơ̆t oei tơ̆ au hlôi tơchơ̆t lôch erĭh tơ̆ au bơih, dang ei hơdrin jang sa đĕch, tơplĭh găh erĭh sa. Jei hmach ăn đĭ đăng ‘nhŏng ŏh, kon pơlei năm oei tơ̆ au đei tơdrong erĭh sa sơđơ̆ng păng jang sa pŭn ai.”

Ƀok Vàng Seo Sàng, thôn trơng pơlei hle Yang San, tơring Cư̆ Ea Lang, apŭng Ea Kar, dêh char Dak Lăk tơbăt, tơdrong kon pơlei hlôh vao găh năm oei tơ̆ pơlei hle oei mĭnh dơnơ̆ng dơ̆ng mĭnh hơnĭh mĭnh ‘măng hloi ăn kơ hrĕng ŭnh hnam, hăm rơbau ‘nu măt bơngai ‘nŏh tơdrong tôch mơmat tat păng kăl đei khei ‘năr ‘mơ̆i. Khei năr au ki, rim kơdră tơring jei hlôi hơdrin vă tơgŭm ăn kon pơlei păng dôm ŭnh hnam lĕch vĕh đơ̆ng tơring đak lơ̆p dơnau Krông Pach Thượng, găh tơring Cư̆ San, apŭng Mdrăk năm oei tơ̆ tơring Cư̆ Ea Lang, apŭng Ea Kar. ‘Măng blŭng, rim ŭnh hnam năm oei tơ̆ pơlei hle hlôi sơđơ̆ng erĭh sa. Mă kăl, tơdrong pơm ăn ŭnh hơyŭh, trong nơnăm, hnam trương, hnam pơgang lơ̆m pơlei hle jĭ tôch ‘lơ̆ng hơ iă, kon hơ ‘lơ̆p đei hŏk pơhrăm kơtă hơnĭh hloi, tơgŭm ăn kon pơlei sơđơ̆ng jơhngơ̆m jang sa. Hrei au rim ŭnh hnam kon pơlei năm oei hlôi đei ƀơk ăn tĕh chŭn na ƀa đak păng tŏk bŏk gô chang ƀơk ăn dơ̆ng tĕh mir. Mă lei kon pơlei jei hoei chă gô chang tơgŭm djru ‘mơ̆i, hăm kon jên hrŭ ăn dang 1 ti hlak jên lơ̆m 1 ŭnh hnam mư̆h lĕch vĕh đơ̆ng tơring dơnau đak lơ̆p, lơ ŭnh hnam hlôi năm tơchă răt mir. Tơdrong jang sa tơ̆ au tôch rơvơn kơ yuơ đak măh mai đơ̆ng pơnơ̆t đak Ea Rơt, mĭnh păh găh Tơdrong vă jang Pơnơ̆t đak Krông Pach Thượng, đei hơlen tơmơ̆t jên jang pơ yua pơtrŭh đak ăn tơring pơlei hle jĭ tôch trŏ lăp. Dơ̆ng tŏk bŏk pơlei hle, ƀok Vàng Seo Sàng lui akhan, tơnap mă đei pơlei hle đei hnam ‘lơ̆ng liĕm nhen pơlei hle au. Dôm tơdrong rơvơn găh lơ tơdrong tơgŭm ăn kon pơlei đei jơhngơ̆m chă jang sa, atŏk tơ iung:“Ĭnh lui kon pơlei gô hơdrin jang sa kơ yuơ kôn mon kon hơ ‘lơ̆p. Kon pơlei erĭh sa tơ̆ au ‘nŏh jĭ đei trong chă yak hiôk hian păng pơ đĭ bơ̆n ŭnh hơyŭh, đing pơro đak păng hnam trương hŏk jei đei ngăl, kon pơlei hơdrin jang sa vă đei ƀô̆h ƀiơ̆.”

Ƀok Mã Văn Cương, Kơ iĕng Kơdră chĕp pơgơ̆r tơring Cư Ea Lang, apŭng Ea Kar, dêh char Dak Lăk tơbăt, dang ei hlôi đei 160/230 ŭnh hnam kon pơlei oei tơ̆ tơring Cư̆ San, apŭng Mdrăk năm oei tơ̆ pơlei hle kơsô̆ 1 Tơdrong jang Pơnơ̆t đak Krông Pach thượng. Đĭ đăng ŭnh hnam năm oei tơ̆ au jei đei kơdră chĕp pơgơ̆r tơring ăn khŭl jang vă tơgŭm ăn kon pơlei pơm hnam, roi năr roi sơđơ̆ng erĭh sa tơ̆ pơlei hle. Kơdĭh ƀok Cương đei pơjao jang hloi Ƀĭ thư kơ pơlei hle, đơ̆ng nŏh, băt hơdăh tơdrong hơpơi ‘mĕh vă đơ̆ng kon pơlei, tơtom xek tơlang rim tơdrong au dăh mă chă apĭnh kơdră kơpal. Hrei au, đĭ đăng rim tơdrong tĭh găh tơdrong erĭh sa, oei sa kơ pơlei hle hlôi đei hơmet pơ ‘lơ̆ng. Dang ei lăp pă găh tĕh jang sa, hlôi ƀơk kon pơlei lơ̆m 1 ŭnh hnam 5 sao chŭn na, pă 5 sao mir kông tok bŏk gô kơdră kơpal ƀơk ăn. Lăp pă mĭnh tơdrong au dơ̆ng lei pơlei hle đei sơđơ̆ng ‘lơ̆ng hơ iă bơih. Vă hơlêm kon pơlei mư̆h sơng sơnăm ‘nao blŭng a tơ̆ pơlei hle, apŭng păng tơring tơlĕch ăn kon jên bơ̆ jang, chă hơvơn lơ̆m tơpôl, hơmet ăn rim tơnô̆ tơmam drăm, răt nhŭng, răt iĕr tơgŭm ăn kon pơlei sơng sơnăm ‘nao phĭ tơtŏ dơnŏ ‘lơ̆ng, sơđơ̆ng jơhngơ̆m:“Apŭng jei jang hơdoi hăm tơring păng khŭl jang chĭnh trĭ pơlei, tơ̆ au jei pơjing keh đang bơ̆ih, đơ̆ng chi ƀô̆, khŭl vei lăng pơlei hlôi đei pơjing đơ̆ng khei 9/2021 bơih, jĭ tôm tong bơih. Tơgŭm ăn kon pơlei hăm tơmam drăm, chă hơvơn dơ̆ng mĭnh ƀar hơnĭh mơdro sa lơ̆m tơring vă đei rim tơnô̆ tơmam drăm. Hơdrin vă kon pơlei sơng Têt, puih mak chơt hơ iă ‘nă hal.”

Sơnăm ‘nao 2022 hlôi rau, tơdrong erĭh sa kơ kon pơlei oei tơ̆ pơlei hle kơsô̆ 1 Pơnơ̆t đak Krông Pach Thượng, tơring Cư Ea Lang, apŭng Ea Kar, dêh char Dak Lăk roi năr roi ‘lơ̆ng liĕm tơ̆ trong sơđơ̆ng oei sa, sơđơ̆ng jang sa. Dôm pơbŭng hnam kơ jăp ‘lơ̆ng hlôi păng tŏk bŏk tơ iung pơjing, dôm chŭn na ƀa đak hlôi blŭh vơ̆ ƀlĭk ƀlăk, dôm pơgar krô̆i kam, pơgar krô̆i pung păng rim ‘long sa plei jei hlôi đei pơtăm hăm jơhngơ̆m đon lui tơdrong erĭh sa ‘lơ̆ng hơ iă hlŏh kơ kon pơlei oei lơ̆m pơlei hle tơ̆ Cư Ea Lang gô ƀô̆h hrôih.

Bơngai chĭh: Công Bắc

Tơblơ̆ nơ̆r: Amazưt