VOV4Bahnar- Lơ̆m trong tơlĕch jang ƀet bơ̆ng Tĕh đak tang găn jĭ Covid-19, Quân khu 5 đei pơjao bơ̆ jang sơng iŏk, vei răk, chơ pơdŭ, ƀơk ăn vaccine tang găn Covid-19 ăn 11 dêh char, pơlei tơm lơ̆m tơring Tŏk bŏk păng Tây Nguyên. Dôm năr au ki, khŭl chơ pơdŭ kơ Khŭl vei lăng Hơnĭh mong răk vaccine Quân khu 5 ư̆h kơ ‘nhoen măng năr, hơdrin chơ vaccine trŭh tơ̆ rim tơring, sơđơ̆ng dơ̆ng kơ jăp tôm tơdrong. Dang ei Quân khu 5 hlôi sơng iŏk 14 tong gre chơ vaccine, hơnĭh au iung jang hơdoi hăm hơnĭh bơ̆ jang gre vei răk, lăng hơlen rim kơthŭng gre sơngiĕo, sơđơ̆ng vei răk ‘lơ̆ng pơgang vaccine. Trŭh dang ei, Cục hâụ cần Quân khu 5 hlôi pơgơ̆r chơ ba keh đang hlŏh 10 tân tơmam drăm jang pơgang păng vă jê̆ 300.000 kơliêu vaccine năm tơ̆ rim dêh char, pơlei tơm lơ̆m tơring Tŏk bŏk păng Tây Nguyên. Tơdrong hơdrin đơ̆ng khŭl ƀô̆ đô̆i kơ Quân khu 5 tơgop atŏk kơtang tĕnh koăng ƀet bơ̆ng tang găn jĭ Covid-19, hơdrin kĕ tang găn jĭ hơbŭh.

Tơblơ̆ nơ̆r: Amazưt