VOV4.Bahnar - Năr 17/3, tơ̆ Hà Nội, Quân ủy Trung ương - Dơnŏ anĭh tơm Ƀô̆ đô̆i vei lăng sơlam tĕh đak tơ ƀơ̆p mŭh măt Dôm bơngai mơlô̆h nuih mơng gơ̆h hơgei lơ̆m khŭl ƀô̆ đô̆i sơnăm 2020. Đại tướng Ngô Xuân Lịch, Kơ iĕng bí thư Quân ủy Trung ương, Dơnŏ anih tơm Ƀô̆ đô̆i vei lăng sơlam tĕh đak vang năm păng pơm tơm jơ tơ ƀơ̆p mŭh măt. Sơnam 2020, bơ̆ jang đoàn păng tơdrong jang hơdrŭh tơdăm đei tơlĕch jang kiơ̆ lơ̆m khŭl ƀô̆ đô̆i hăm lơ tơdrong pơgơ̆r ‘lơ̆ng hơ iă. Khŭl hơdrŭh tơdăm ƀô̆ đô̆i kơrŭn đĭ jơhngơ̆m hơmet pơ ‘lơ̆ng tơdrong tơnap tap, iung jang pơting dih băl jang pran kơtang gơ̆h hơgei, pơjei dih băl jang kiơ̆ jơnei tơdrong jang chinh trĭ kơ hơnĭh bơ̆ jang. Sơnăm 2020, kơdră kơpal chĕp pơgŏr tơring hlôi pôk pơ ư vă jê̆ 2.000 ‘nu tơdăm ƀô̆ đô̆i jang ‘lơ̆ng gơ̆h hơgei nuih mơng; khŭl găh Quân ủy Trung ương - Dơnŏ anih tơm Ƀô̆ đô̆i vei lăng sơlam tĕh đak pôk pơ ư 313 ‘nu bơngai mơlô̆h jang gơ̆h hơgei nuih mơng. Jơnŭm khŭl hlôi rơ̆ih iŏk 10 ‘nu hơdrŭh tơdăm gơ̆h hơgei nuih mơng păng 18 ‘nu hơdrŭh tơdăm jang ‘lơ̆ng. Tơ̆ jơ tơ ƀơ̆p mŭh măt, Đại tướng Ngô Xuân Lịch hlôi pôk ăn hla bơar tơchơ̆t tŏk grat si kuan păng tơmơ̆t jang pơm hloi ƀô̆ đô̆i hăm 4 ‘nu bơngai iŏk đei hơnăn lơ̆m khŭl hơdrŭh tơdăm ƀô̆ đô̆i nuih mơng gơ̆h hơgei sơnăm 2020.

Tơblơ̆ nơ̆r: Amazưt