VOV4.Bahnar - Kŭm lơ̆m ‘năr 01/04, Quốc hội pơ ma dơ nuh tơ̆ hnam hop akŏm tơm găh Hla ar tơ roi tơ băt tơ drong jang jăl jang 2016-2021 đơ̆ng Anih jô̆ hơ len jên teh đak; pơ ma dơ nuh găh tơ drong hơ găt kơ sô̆ bơ ngai tang măt bơ̆ jang kơ jơ nŭm pơ gơ̆r kon pơ lei pơ lei tơm Hà Nội jăl jang 2021-2026. Tơ roi tơ băt găh tơ drong jang đơ̆ng Anih jô̆ hơ len jên teh đak jăl jang 2016-2021 ăn ƀôh, Anih jô̆ hơ len jên teh đak hlôi bơ̆ jang kiơ̆ trong tơ lĕch jang jô̆ hơ len jên hăm lơ jơ nei ‘lơ̆ng, tơ gop gĭt kăl lơ̆m chih pơ keh trong jang tơ gŭm, tang găn sa pơ jĭp păng vei kơ hret ki luơ̆t, hơ tŏk ‘lơ̆ng iŏk yua vei lăng, yua jên hu, mŭk drăm teh đak. Mă hơ dăh ‘noh, lơ̆m jăl jang, Anih jô̆ hơ len jên teh đak athei hơ met ‘lơ̆ng jên hu hloh 353 rơ bâu 700 ti hlak jên; gơ̆ih 20 tơ drong đei ƀôh pơm glăi ăn anih jang Kanh sat dăr hơ len vă dăr hơ len pơm hơ dăh păng phak kiơ̆ tơ drong hơ găt đơ̆ng khôi luơ̆t. Găh iŏk yua jang kiơ̆ apĭnh jô̆ hơ len jên, jăl jang 2016-2021, kơ sô̆ apĭnh găh hơ met ‘lơ̆ng jên hu đơ̆ng Anih jô̆ hơ len jên teh đak hlôi đei rim anih jang bơ̆ jang kiơ̆ ‘noh hloh 237 rơ bâu 500 ti hlak jên, đei 73,6% akŏp kơ sô̆ athei; lơ hla ar hlôi đei Khŭl kơ dră teh đak, rim anih tơm, anih jang păng tơ ring bơ̆ jang kiơ̆ hŭt lê̆, hơ met ming, tơ mơ̆t thim kiơ̆ athei đơ̆ng Anih jô̆ hơ len jên teh đak.

Thuem: Tơ blơ̆