VOV4.Bahnar - Hơ nơ̆ng tơ drong jang ‘Măng hop akŏm mă 11, pơ gê ‘năr 2/4, Quốc hội hlôi pơ drơ̆ng kiơ̆ Tơ drong tơ chơ̆t găh tơ drong song pơ dơh kơ pơm Thủ tướng teh đak Cộng hòa Xã hội Chủ nghĩa Việt Nam hăm ƀok Nguyễn Xuân Phúc. Tơ drong tơ chơ̆t đei Quốc hội pơ drơ̆ng kiơ̆ hăm lơ bơ ngai tang măt  Quốc hội drơ̆ng lăp. Tang măt Quốc hội, Kơ dră Quốc hội Vương Đình Huệ bơ nê păng hơ păh pơ kao ăn ƀok Nguyễn Xuân Phúc. Hơ drol ‘noh, Tổng Bí thư, Kơ dră teh đak Nguyễn Phú Trọng hlôi đŏk hla ar tơ roi tơ̆ hơ năp Quốc hội. Hla ar chih tơ roi rơ đăh, tơ̆ ‘măng hop akŏm mă mônh Quốc hội jăl 14, ƀok Nguyễn Xuân Phúc đei Quốc hội pôk tơ mơ̆t pơm Thủ tướng. Lơ̆m khei ‘năr iŏk kơ chư̆k jang, Thủ tướng Nguyễn Xuân Phúc ling lang jang đang ‘lơ̆ng tơ drong jang đei pơ jao. Gơ̆h ƀôh jăl jang 2016-2021 jing 1 jăl jang gĭt kăl, Khŭl kơ dră teh đak hlôi chĕp kơ̆l pơ gơ̆r teh đak Việt Nam năm klĕch dôm tơ drong mơ mat tat iŏk đei dôm jơ nei ‘lơ̆ng hơ iă. Kŭm lơ̆m pơ gê ‘năr 2/4, Anih chĕp kơ̆l pơ gơ̆r Quốc hội pơ truh kơ Quốc hội song pơ dơh kơ jang pơm Kơ dră teh đak; rim bơ ngai tang măt pơ gơ̆r tăh kơ phiê̆u hrĕp păng mơ̆ng Anih chĕp kơ̆l pơ gơ̆r Quốc hội tơ roi hơ năn đei rơ̆ih vă Quốc hội pôk Kơ dră teh đak.

Thuem: Tơ blơ̆