VOV4.Bahnar – Pơgê năr 4/6, xơng iŏk kơsô̆ jên tơgŭm 300 trĭu hlj đơ̆ng kang ƀô̆, bơngai jang kơ Rađiô nơ̆r pơma Việt Nam, Kơdră Anih jang Trung ương Măt trâ̆n tôh kuôk Việt Nam Đỗ Văn Chiến bơnê kơ tơdrong tơroi tơbăt đơ̆ng Rađiô nơ̆r pơma Việt Nam lơ̆m tơdrong jang tang găn păng tơjră pơrang jĭ Covid19, tơgŭm kon pơlei jâ̆p teh đak băt hơdăh tơdrong hơbuh hli đơ̆ng pơrang jĭ păng pơm kiơ̆ tơnăp dôm tơdrong pơkăl đơ̆ng Anih tơm Y tê̆. Pơjao kơsô̆ jên 300 trĭu hlj tơgŭm kiơ̆ Anih jang Trung ương Măt trâ̆n tôh kuôk Việt Nam, Phŏ Kơdră dơnơm Rađiô nơ̆r pơma Việt Nam Vũ Hải Quang ăn tơbăt, rim kang ƀô̆, bơngai jang, bơngai chih akŏm kơtơ̆ng ang pơre nơ̆r, bơngai jang kơ Rađiô nơ̆r pơma Việt Nam tơgŭm hăm kơsô̆ jên 300 trĭu hlj hăm tơdrong 'meh vă tơgop jơhngơ̆m vă atŭm hăm Đảng, Teh đak, Jơnŭm pơgơ̆r teh đak tang găn tơdrong tơpoh lang xă đơ̆ng pơrang jĭ lơ̆m tơpôl. Kơdră Anih jang Trung ương Măt trâ̆n tôh kuôk Việt Nam Đỗ Văn Chiến xơkơ̆t gô tơbang hơdăh jene mong, iŏk yua trŏ tơdrong kăl, trŏ khôi luơ̆t dôm tơdrong tơgop vă răt vaccine COVID-19.

Lan chih păng pơre nơ̆r