VOV4.Bahnar - Tơbăt 96 sơnăm Năr Khŭl chĭh kơtơ̆ng ang kĕch mang Việt Nam (21/6), pơgê năr 18/6, lơ khŭl tang măt hlôi trŭh hmach chơt hơ iă, hơlêm ăn kang ƀô̆, bơngai chĭh kơtơ̆ng ang, bơngai chĭh akŏm, bơngai jang hiup brŏ kơ Radiô Nơ̆r Pơma Việt Nam. Năm ngôi păng hmach chơt hơ iă kơ Radiô Nơ̆r Pơma Việt Nam, rim khŭl tang măt bơnê tơdrong vang iung jang hơdoi đơ̆ng Radiô Nơ̆r Pơma Việt Nam ling lang yak hơdoi hăm hơnih tơm, hơnih bơ̆ jang păng tơring jang kiơ̆ pơrô̆ tơbăt trong bơ̆ jang đơ̆ng Đảng păng tĕh đak trŭh hăm kơdrơ̆m bơngai mơ̆ng brŏ, kon pơlei lơ̆m tĕh đak, mă kăl kon pơlei oei tơ̆ tơring atăih yăih, kon pơlei kon kông, tơring sơlam tĕh đak, achon dơsĭ. Kơdră chĕp pơgơ̆r Radiô Nơ̆r Pơma Việt Nam sơkơ̆t hơdăh: Radiô Nơ̆r Pơma Việt Nam ling lang tơbăt hơdăh ƀlep, tơpăt, pơchŏh trong dôm tơdrong mŭk drăm-chĭnh trĭ-tơpôl kơ tĕh đak. Kơdră chĕp pơgơ̆r Radiô Nơ̆r Pơma Việt Nam ‘mĕh vă lơ̆m khei năr kơnh, rim hơnĭh tơm, hơnih bơ̆ jang kơ Trung ương, rim tơring gô hơnơ̆ng iung jang hơdoi kơ jăp hăm Radiô Nơ̆r Pơma Việt Nam, tơgăl hăm tơdrong ‘mĕh vă băt kơtơ̆ng ang đơ̆ng kơdrơ̆m kon pơlei.

Tơblơ̆ nơ̆r: Amazưt