VOV4.Bhanar -  Drung kơsơ̆ năr 8/11, tơ̆ Hnam Kuô̆k hô̆i, Kơdră chĕp pơgơ̆r Kuô̆k hô̆i Vương Đình Huệ vang năm Pơm lê̆h tơbăt Tơdrong tơchơ̆t đơ̆ng Dơnŏ anĭh chĕp pơgơ̆r Kuô̆k hô̆i găh tơdrong pơjing Khŭl Nghĭ sy tơgoăt tơgoăl Việt Nam, khŭl drŏ kăn jang Kơdră tang măt Kuô̆k hô̆i păng Khŭl Kơdră tang măt Kuô̆k hô̆i sơnăm mơlô̆h. Khŭl Nghĭ sy tơgoăt tơgoăl Việt Nam đei 45 Khŭl nghĭ sy tơgoăt tơgoăl ƀar păh Việt Nam hăm Kuô̆k hô̆i/Nghĭ viên rim tĕh đak. Khŭl drŏ kăn jang Kơdră tang măt Việt Nam đei rim drŏ kăn jang Kơdră tang măt Kuô̆k hô̆i apĭnh vang mơ̆t. Khŭl kơdră tang măt Kuô̆k hô̆i sơnăm mơlô̆h đei rim bơngai jang lơ̆m khŭl au ‘nŏh kơdră tang măt Kuô̆k hô̆i Việt Nam đơ̆ng 45 sơnăm năm tơ̆ sơnăm ‘lơp. Kơdră chĕp pơgơ̆r khŭl au ‘nŏh Bí thư Trung ương Đoàn Hơdrŭh tơdăm Kŏng san Hồ Chí Minh Nguyễn Anh Tuấn. Iung pơma tơ̆ pơm lê̆h tơbăt, Kơdră chĕp pơgơ̆r Kuô̆k hô̆i Vương Đình Huệ lui, ‘moi kiơ̆ tơdrong jang tơbôl kơ rim hơnĭh bơ̆ jang kơ Kuô̆k hô̆i păng rim khŭl nghĭ sy tơgoăt tơgoăl, bơngai drŏ kăn jang kơdră tang măt Kuô̆k hô̆i, kơdră tang măt Kuô̆k hô̆i sơnăm mơlô̆h, bơ̆ jang tơdrong jang tơbôl kơ Kuô̆k hô̆i gô roi năr roi gơ̆h hơgei, tơgop hơnăp jang pơm gơng rơgŏh klŏh klĕch gĭt kăl lơ̆m tơgoăt tơgoăl jang hơdoi nghĭ viên.

Tơblơ̆ nơ̆r: Amazưt