VOV4.Bahnar - “Rim tơring ư̆h pơhơi, ư̆h kơ chăng, tơlĕch jang hơmet ăn trong jang mư̆h đei jĭ Covid-19 pơrăm lơ̆m tơring”. ‘nau nơ̆r pơma hơdăh đơ̆ng Kơdră chĕp pơgơ̆r Hơnĭh tơm vei lăng jang pơgang Nguyễn Thanh Long tơ̆ Hop akŏm trư̆k tuyên “Atŏk kơtang bơ̆ jang tang găn jĭ Covid-19” hăm 63 dêh char, pơlei tơm pơgơ̆r pơgê năr 16/4. Iung pơma tơ̆ hop akŏm, Kơdră chĕp pơgơ̆r Hơnĭh tơm vei lăng jang pơgang Nguyễn Thanh Long pơma hơdăh: Tơdrong pơrang jĭ Covid-19 oei hơnơ̆ng pơrăm kơtang lơ̆m apŭng plĕnh tĕh, tơdrong jang tang găn jĭ lơ̆m sơnăm au oei jing tơdrong long tĭh tên hăm rim tĕh đak păng pơđĭ Việt Nam. Kiơ̆ đơ̆ng Kơdră Hơnĭh tơm vei lăng jang pơgang, Việt Nam hlôi yak hlŏh 3 ‘măng jĭ hơbŭh, trŭh dang ei hlôi 21 năr tĕh đak bơ̆n pă đei ƀô̆h bơngai ayơ tơpŏh jĭ Covid-19 lơ̆m kon pơlei, dôm tơdrong oei sa kơ kon pơlei nhen lĕ vĭh hơlơ̆k hiôk hian nhen so. Đơ̆ng rim ‘măng jĭ hơbŭh pơrăm hlôi ƀô̆h lơ trong jang ‘lơ̆ng vă tang găn kĕ jĭ hơbŭh Covid-19. Ƀok Nguyễn Thanh Long  pơma hơdăh: Tơring oei hơmơt tơt hlŏh dang ei ‘nŏh tơring sơlam tĕh đak găh Pơmơ̆t pơbăh păng rim dêh char Tây Nam bộ. Kơ yuơ lơ lŏh, rim tơring kăl atŏk kơtang bơ̆ jang vei lăng kơ jăp tơring sơlam tĕh đak. Dơnŏ anĭh tơm vei lăng jang pơgang hlôi jang hơdoi hăm Dơnŏ anĭh tơm Ƀô̆ đô̆i vei lăng sơlam tĕh đak atŏk kơtang khŭl bơ̆ jang năm bơ̆ jang tơ̆ rim hơnĭh gak tơring sơlam tĕh đak.

Tơblơ̆ nơ̆r: Amazưt