VOV4.Bahnar - Lơ̆m jơ năr chơt hơ iă yak truh năr lêh teh đak, bơ ngai tăh hla lơ̆m teh đak gô chĕp lơ̆m tơ pang ti hla kơ phiê̆u vă rơ̆ih iŏk bơ ngai tang măt ăn kơ kơ dih tơ̆ Kuôk hô̆i păng jơ nŭm pơ gơ̆r kon pơ lei rim tơ ring, ƀok Vương Đình Huệ, Kơ dră kuôk hô̆i, Kơ dră Jơ nŭm vei lăng pôk rơ̆ih teh đak hlôi tơl nơ̆r apĭnh đơ̆ng khŭl chih kơ tơ̆ng ang. Kơ dră Kuôk hô̆i tơ ƀôh đon ‘mĕh vă, bơ ngai tăh hla lơ̆m teh đak chă hơ len lăng mă hơ len găh rim bơ ngai lĕch pơ jei, rơ̆ih iŏk dôm bơ ngai tang măt tơ pă gơ̆h hơ gei, tơ pă mă tơ găl, tơ gop pơm hơ tŏk ‘lơ̆ng păng đei yua tơ drong jang đơ̆ng rim anih jang kon pơ lei rơ̆ih, pơ jing teh đak Việt Nam pran kơ tang, jang đang rim tơ drong hơ găt gĭt kăl mă Đảng bơ̆n hlôi tơ roi ăn tơ̆ tơ drong Tơ chơ̆t hop akŏm bơ ngai tang măt lơ̆m teh đak ‘măng mă 13. Kơ dră Kuôk hô̆i Vương Đình Huệ pơ ma hơ dăh ‘năr 23/5/2021 jĭ 1 năr tôch kơ gĭt kăl kơ teh đak bơ̆n, năr mă bơ ngai tăh hla lơ̆m teh đak bơ̆ jang kiơ̆ tơ drong pơm tơm kơ dih, kơ tă chĕp hla kơ phiê̆u vă rơ̆ih bơ ngai tang măt ăn kơ dih. Tơ drong rơ̆ih iŏk đơ̆ng bơ ngai tăh hla tơ chơ̆t đei bơ ngai lĕch pơ jei hơ yơ jing bơ ngai tang măt Kuôk hô̆i, bơ ngai tang măt Jơ nŭm pơ gơ̆r kon pơ lei rim tơ ring, tơ chơ̆t tơ drong ‘lơ̆ng, đei yua tơ drong jang đơ̆ng rim anih jang kon pơ lei rơ̆ih.

Thuem: Tơ blơ̆