VOV4.Bahnar - Phó Thủ tướng Lê Văn Thành pơ gơ̆r hop akŏm trư̆k tuyê̆n găh tơ drong tơ lĕch trong man Trong gre kơ dâu hrĕnh Bắc –Nam găh Hơ lĕch đơ̆ng 2017-2020. Pơ ma lơ̆m jơ hop akŏm, Phó Thủ tướng Lê Văn Thành ăn tơ băt, ‘nâu jĭ tơ drong jang gĭt kăl kơ tĕh đak lơ̆m 5 sơ năm truh, Anih tơm Chinh trĭ đei nơ̆r pơ tho athei kŏm jên ăn tơ drong jang ‘nâu.

Phó Thủ tướng Lê Văn Thành akhan, dôm tơ drong mơ mat tat, tơ hlăk tăk nhen găh kơ jă jên, anih sir iŏk tơ mam ming man đei sek tơ lang tơ tom. Phó Thủ tướng athei dôm anih tơm, tơ ring tơ rang, athei dôm anih jang đei ƀơm truh jăh pôk rĭ bơ̆n jrăng điên, đing đak, tơ lei kap. Hăm dôm tơ drong vă tơ lĕch jang, Phó thủ tướng athei Anih tơm vei lăng trong nơ năm chă rơih anih jang rơ gei, đei jên jang kơ jăp ăn dôm tơ drong jang, vĕh ver tơ drong trung ương akŏm đĭ jơ hngâm mă lei tơ drong jang oei tam mă đei bơ̆ jang.

Dơ̆ng: Tơ blơ̆