VOV4.Bahnar - Akhan khul kơ dră tơ ring oei ưh kơ văn yoa hăt tang găn jĭ Covid-19 păng hơ met ăn tơ drong pôk rơih, tơ drong sir, kôch iŏk tơ mam bri brăh glăi luơ̆t đei lơ tơ̆ xăh Hiệp An, apŭng Đức Trọng (Lâm Đồng). Ưh hơ ker, ưh kơ đei ôn kiơ, đe sir iŏk tơ̆ kơ măng păng năr pơ dơ̆h hơ tuch giĕng nhen adrol ki hloi, tơ drong sir, kôch iŏk tĕh, tơ mo glăi luơ̆t đei ƀôh hơ nơ̆ng, đei hơ nih lăp hơ tăih kơ Dơ nŏ anih vei lăng kon pơ lei xăh 2, 300 met đĕch.

Tơ̆ 1 anih sir iŏk tĕh, tơ mo glăi luơ̆t tơ̆ xăh Hiệp An

Ƀât jơ ƀôt tĕh choh jang xa 283, hla ar la kak tĕh 6A jê̆ bri ‘long hơ ngo jing ‘lơ̆ng, dôm jĭt rơ bâu khô̆i tĕh tơ mo hlôi đei 1 ‘nu tơ ngla tuh mong, akŏm vă chơ tĕch tơ̆ nai. Kơ tă tơ̆ âu, tơ drong sir kôch iŏk tĕh, tơ mo oei đei hơ nơ̆ng, pơm ăn tơ ring âu jing 1 anih bơ̆ jang tih. Ƀât nhôn ‘nao truh, lơ gre tih, kơ măy kơ mŏk phă tơ mo păng lơ công nhân jang thuê broa brônh kơ dâu dih dih. Ưh kơ đunh, tơ̆ âu tơ tă pă pôm kơ măy ngăl đĕch, ưh đei ƀôh tơ ‘ngla yơ.

Dôm jĭt rơ bâu khô̆i tĕh tơ mo tơ̆ âu hlôi đei chơ tĕch hlot

Anih sir iŏk tơ mam bri brăh âu bơ̆ jang lơ khei ‘nâu bơih, jê̆ tơ ring kon pơ lei oei xa, hơ tăih kơ Dơ nŏ anih vei lăng kon pơ lei xăh tam mă truh 2km, mă lei khul kơ dră xăh Hiệp An lăp sek phak jên 1 ‘măng vă pơ trŏ lơ̆m ‘năr 27/4 đĕch. Ƀok Uông Thanh Hải, kăn ƀô̆ vei lăng tĕh xăh Hiệp An pơ ma akhan, tơ drong ưh kơ ƀôh đe pơm glăi ‘nŏh yoa dôm bơ ngai âu jang ôn, oei khul kăn ƀô̆ xăh ‘nŏh ưh kơ lơ păng iŏk jang lơ tơ drong pha ra hai:

“Nhôn, bơ ngai jang ‘nŏh tŏ sĕt kơ na ưh kĕ vei lăng đĭ đăng tơ drong sir, kôch iŏk tĕh, đang kơ ‘nŏh tĕh iŏk tơ mo glăi kơ luơ̆t âu. Mă tơ pă tơ drong jang lơ dêh hnang pơ têng hăm kơ sô̆ bơ ngai jang nhôn. Hơ dai hăm ‘nŏh, mưh nhôn năm truh, đe hao gre kơ dâu veh tơ̆ nai bơih, ưh đei rôp tom măt ‘nŏh ưh gơ̆h sek tơ lang tơ drong glăi sir iŏk tơ mam bri brăh glăi luơ̆t”.

Kăn ƀô̆ vei lăng ‘nŏh tơ pŭ tơ drong glăi đơ̆ng nai, mă lei tơ̆ 1 anih pha jê̆ trong gre 20, hơ tăih kơ Dơ nŏ anih vei lăng kon pơ lei xăh Hiệp An lăp 2, 300 met đĕch kŭm đei tơ drong nhen thoi âu ‘năi. Lơ gre kôch tĕh tih nŏng kơ vŏk kôch, sir iŏk tơ mam bri brăh glăi luơ̆t kơ tă tơ̆ kơ ‘năr hloi mă lei khul kơ dră tơ ring năng nhen ưh kơ băt yă kiơ. Lăp gô nhôn truh pơih tơ ƀôh rup păng apinh, anih sir iŏk tơ mam bri brăh âu hăm đei hla ar asong jang ưh ‘nŏh kơ dră chĕp kơ̆l xăh Hiệp An ‘nao pơ gơ̆r ăn khul jang năm dăr lăng, chih hơ dăh tơ drong glăi păng pơm hla ar sek phak jên.

Gre kôch tĕh, tơ mo glăi luơ̆t ưh kơ tom kơ dâu vĕh

Ƀok Hồ Hữu Hiếu, Kơ dră vei lăng kon pơ lei xăh Hiệp An pơ ma hơ dăh, khul kơ dră tơ ring ưh đei lăng pơ hơi dăh mă jang ưh tơ năp, ưh kĕ găn tơ drong sir iŏk tơ mam bri brăh glăi luơ̆t âu ôh. Ƀok akhan, tơ drong ‘nâu đei yoa tơ ring xă, trong mơ mat, dôm bơ ngai pơm glăi đa năm sir iŏk tĕh, tơ mo lơ̆m năr pơ dơ̆h, tơ̆ kơ măng kơ na ưh kơ ƀôh. Mă lei, ƀok Hồ Hữu Hiếu kŭm akhan, xăh vă adrin găn đĭ tơ drong ‘nâu:

“Khei ‘năr âu ki, Dơ nŏ anih vei lăng kon pơ lei xăh hlôi sek tơ lang lơ tơ drong glăi. Mă lei, yoa Hiệp An đei tơ ring tĕh xă, trong yak mơ mat, dôm bơ ngai pơm glăi đa tơ gĕch jang ƀât năr pơ dơ̆h, jang ‘ngoăih kơ jơ jang tĕh đak, tơ̆ kơ măng vă chă sir iŏk tĕh, tơ mo glăi luơ̆t. Tơ̆ hơ năp kơnh, xăh Hiệp An vă sek tơ lang tơ păt dôm bơ ngai pơm glăi, vei sơ đơ̆ng ‘lơ̆ng, găn lê̆ tơ drong kôch chưk tĕh, kŭm nhen sir iŏk tơ mam bri brăh glăi luơ̆t tơ̆ xăh.”

“Vă sek tơ lang tơ păt” vă vei lăng ‘lơ̆ng tơ drong sơ đơ̆ng dơ̆ng, nơ̆r pơ ma đơ̆ng Kơ dră chĕp kơ̆l xăh Hiệp An, apŭng Đức Trọng, dêh char Lâm Đồng oei ăn ƀôh, adrol ki xăh vei lăng tam mă kơ jăp. Tơ drong ‘nŏh sơ tơ blang tơ ƀôh ăn tơ drong sir iŏk tĕh, tơ mo glăi luơ̆t tơ̆ âu, oei đei hơ nơ̆ng nhen thoi tơ drong nol hăm tơ pôl păng khôi luơ̆t.

            Quang Sáng: Chih

Dơ̆ng: Tơ blơ̆