VOV4.Bahnar - Tơ̆ hop akŏm trư̆k tuyê̆n pơ tôch tơ drong jang kơ Anih tang găn sar bar – Anih jang kơ Khul kơ dră pơ gơ̆r jang kơ tĕh đak găh tang găn sar bar sơ năm 2021 păng tơ lĕch tơ drong jang sơ năm 2022 pơ gơ̆r kơ sơ̆ 30/12 tơ̆ Hà Nội, dôm bơ ngai tang măt drơ̆ng nơ̆r akhan, athei bơ̆ jang mă pran păng đei yoa ƀiơ̆ tơ̆ hơ năp dôm tơ drong đei ưh ê đơ̆ng sar bar. Sơ năm 2021, sar bar đei jơ̆p lơ̆m plei tĕh, tôch krưp krĕnh păng ưh ê pơm hiong răm lơ găh bơ ngai păng tơ mam drăm. Tơ̆ tĕh đak bơ̆n đei 841 ‘măng sar bar, hăm 18 lơ̆m đĭ đăng 22 kơ loăi sar bar. Sar bar pơm ăn 108 ‘nu bơ ngai lôch, hiong hơ kâu; hiong răm pơ hlom dang 5.200 ti hlak jên. 

Vang lăng dơ̆ng dôm tơ drong tam mă pran ‘lơ̆ng kŭm nhen tơ lĕch trong tang găn sar bar lơ̆m sơ năm 2022 đei yoa lăp hăm yăn âu, dôm bơ ngai tang măt akhan, jĭ Covid 19 oei tôch hơ mơt, dôm tơ drong sar bar tih nhen: ‘mi kial hơ bŭt, đak lơ̆p, đak tơ jroh, tĕh hơ lih, tŏ phang pơ đang, tĕh dơ drŏ… tôch dêh lơ̆m sơ năm 2021 hơ nơ̆ng jing tơ drong krê ƀơm truh tơ̆ tĕh đak bơ̆n, tơ drong jang tang găn sar bar đei tơ lĕch roi dêh yoa thoi nŏh athei hơ tŏk tơ drong đei yoa đơ̆ng anih jang tang găn sar bar đơ̆ng tơ ring hloi. Kiơ̆ kơ ‘nŏh, hơ tŏk tơ drong pơ tho pơ hrăm, kơ sư̆k jang ăn kăn ƀô̆ tang găn sar bar, mă loi jĭ Khul jang tơ̆ tơ ring.

Dơ̆ng: Tơ blơ̆