VOV4.Bahnar - Hŏk tro lơ̆m tĕh đak hlôi mât lơ̆m sơ năm hŏk ‘nao 2021-2022. Mă đơ̆ng dôm tơ ring hơ nơ̆ng akhan vă adrin hơ met pơ ‘lơ̆ng mơ mat tat yoa đơ̆ng jĭ COVID-19 vă pơ gơ̆r pơ tho păng hŏk mă lăp, mă lei oei đei lơ tơ drong pơ ngơ̆t hăm anih pơ tho pơ hrăm păng hŏk tro.

Pơ lei tơm (plt) Hồ Chí Minh, tŏk bŏk jing tơ ring đei jĭ COVID-19 dêh hlŏh lơ̆m tĕh đak, mă đơ̆ng khul kơ dră păng anih jang kơ pal chih hơ dăh đon pơ hnŏng vă pơ gơ̆r pơ tho păng hŏk trư̆k tuyê̆n truh đĭ hŏk ki mônh, mă lei tơ drong chơ chuĕn pơ truh hla ar hŏk ăn hŏk tro oei tôch mơ mat. Lơ̆m nŏh, hla ar hŏk lăm 1, lăm 2 păng lăm 6 kiơ̆ tơ drong pơ tho hŏk pơ hrăm ‘nao, dôm anih ‘nao pơ truh đei hlŏh 60% kơ sơ̆p hla ar ăn dôm hnam trưng. Yoa thoi nŏh, kŭm hăm tơ drong chă trong pơ truh hla ar hŏk ăn hŏk tro, dôm kuơ̆n, apŭng păng hnam trưng athei ƀơk hla ar điên tư đơ̆ng lăm 1 truh lăm 12 tơ̆ internet ăn hŏk tro vă iŏk yoa lơ̆m khei ‘năr ƀât blŭng sơ năm hŏk.

Ƀok Dương Anh Đức, Phŏ Kơ dră vei lăng kon pơ lei plt Hồ Chí Minh ăn tơ băt: “Plt pơ tho ăn dôm hnam trưng roi tơ băt ăn đe mĕ ƀă, băt hơ dăh rim tơ drong đơ̆ng đe ŏh hŏk tro vă chih jô̆ đe ŏh mơ mat tat, ưh đei Internet vă hŏk. Đơ̆ng nŏh đei trong tơ gŭm mă lăp, nhen: krao hơ vơn dôm bơ ngai đei đon ‘lơ̆ng vang tơ gŭm jên, răt kơ măy ăn hŏk tro, gơih kơ phĭu hŏk, hla ar hŏk vă hŏk tro ôn ƀai. Đe hŏk tro âu gơ̆h hŏk pơ hrăm, đei bơ ngai vei lăng mưh đei kơ măy hŏk trư̆k tuyê̆n.”

Đĭ mât lơ̆m sơ năm mă 3 anih pơ tho pơ hrăm pơ gơ̆r pơ tho păng hŏk trư̆k tuyê̆n mưh đei jĭ COVID-19, mă lei lơ tơ ring akhan, tơ drong pơ gơ̆r hŏk trư̆k tuyê̆n đunh ‘nŏh gô ưh ‘lơ̆ng truh tơ drong pơ tho pơ hrăm, jơ hngâm jăn kơ đe hŏk tro, mă loi ‘nŏh jĭ jăl mâm non păng jăl 1. Tơ drong hŏk tro athei hŏk trư̆k tuyê̆n kŭm pơm ăn mĕ ƀă hŏk tro roi mơ mat mưh athei răt tôm kơ măy vă hŏk trư̆k tuyê̆n ƀât mă jên khei đơ̆ng jang xa ‘nŏh roi jur yoa đơ̆ng jĭ COVID. Mă loi, trong pơ tho hŏk âu tôch mơ mat, tơ dăh ưh ‘mĕh pơ ma akhan ưh gơ̆h pơm kiơ̆ tơ̆ tơ ring groi kông, tơ ring mă tơ drong arih xa, tơ pôl oei tôch mơ mat. Yoa thoi nŏh, lơ tơ ring athei dôm anih jang kơ pal tơ chĕng hơ len, pơ ‘nhŏ vắc xin ƀet ăn thây kô păng hŏk tro lơ̆m tĕh đak.

Ƀok Vũ Đại Thắng, Bí thư đảng dêh char Quảng Bình ăn tơ băt: “Jĭ COVID oei tơ pŏh tôch hơ mơt, bơ̆n hrei ‘nâu oei pơ gơ̆r ƀet vắc xin ăn đĭ đăng kon pơ lei. Nhôn tôch tơ rĕk truh tơ drong, vă tơ drong hŏk pơ hrăm kơ kon mon hŏk tro hiôk hian, mă trŏ ‘nŏh bơ̆n athei tơ rĕk truh tơ drong ƀet vắc xin lơ̆m hnam trưng, ‘măn ăn đe mon hŏk tro hơ drol, mă loi ‘nŏh hăm hŏk tro jăl 3.”

Jĭ COVID-19 tơ pŏh tôch hơ mơt lơ̆m sơ năm 2020 păng 8 khei sơ năm 2021 kŭm ƀơm ưh ‘lơ̆ng truh tơ drong pơ tho pơ hrăm ‘nao tơ̆ lơ tơ ring, mă loi tơ̆ tơ ring mơ mat tat ưh đei tôm jên vă răt hơ met tơ mam, kơ măy pơ tho, hŏk pơ hrăm. Tơ̆ hop akŏm lơ̆m tĕh đak pơ tôch sơ năm hŏk păng tơ lĕch tơ drong jang lơ̆m sơ năm hŏk ‘nao đơ̆ng anih pơ tho pơ hrăm ‘nao âu, 1,2 tơ ring athei anih jang kơ pal set hơ len, kơ dŭn khei ‘năr hŏk kiơ̆ tơ drong hŏk pơ hrăm ‘nao hăm lăm 10.

Ƀok Nguyễn Đức Trung, Kơ dră vei lăng kon pơ lei dêh char Nghệ An đei nơ̆r pơ ma: “Apinh Anih tơm vei lăng pơ tho pơ hrăm hơ len năng, chih tơ roi rim tơ drong păng kơ dŭn ‘mơ̆i khei ‘năr pơ tho hŏk kiơ̆ hla ar hŏk ‘nao ăn lăm 10 đơ̆ng sơ năm hŏk 2022-2023 jing hŏk lơ̆m sơ năm hŏk 2025-2026 dơ̆ng, yoa 2 tơ drong. Mă 1 ‘nŏh khei ‘năr âu yoa jĭ COVID kơ na tơ ring tam mă gơ̆h hơ met ‘lơ̆ng tôm tơ drong, mă loi ‘nŏh găh hla ar hŏk, đang kơ ‘nŏh jĭ pơ tho ming ăn khul thây kô, tơ drong ‘nâu kŭm tôch mơ mat tat hăm tơ ring. Mă 2, vă pơm ‘lơ̆ng sơ năm ‘nâu đĭ đăng pơ tho kiơ̆ hla ar hŏk ‘nao hăm lăm 6, vă truh 3 sơ năm đơ̆ng rŏng dơ̆ng bơ̆n pơ tho hŏk hăm lăm 10 thoi ‘nŏh sư lăp ƀiơ̆, pơm ‘lơ̆ng ăn tơ drong pơ tho hŏk ƀiơ̆.”

Yă Nguyễn Thị Quyên Thanh, Phŏ Kơ dră vei lăng kon pơ lei dêh char Vĩnh Long akhan: “Hŏk tro lăm 9 sơ năm ‘nâu năm hŏk ƀât tơ drong jĭ oei tơ pŏh tôch krê. Mưh bơ̆n tơ lĕch trong pơ tho vă gơ̆h kơ jăp ‘lơ̆ng ‘nŏh athei pơ tho kiơ̆ hla ar hŏk hrei ‘nâu, sơ năm đơ̆ng rŏng đe ŏh hŏk kiơ̆ hla ar hŏk ‘nao, thoi nŏh đe ŏh hăm kĕ hŏk, hăm sơ đơ̆ng jơ hngâm druh kiơ̆ tơ drong hŏk ‘nao ‘nŏh ưh. Nhôn athei Anih tơm tơ chĕng hơ len mă brĕ, kơ lih yoa tơ drong đei yoa đơ̆ng đe ŏh hŏk tro, găh đon hlôh vao, gơ̆h hơ gei mưh hŏk kiơ̆ hla ar hŏk ‘nao, đơ̆ng nŏh vă đei trong tơ chĕng hơ len păng tơ lĕch nơ̆r hăm Kuô̆k hô̆i chă tơ plih dăh mă hơ met ming tơ drong Tơ chơ̆t 51.”

Mă đơ̆ng băt lơ̆m khei ‘năr tĕh đak oei tôch mơ mat tat yoa đơ̆ng jĭ COVID-19, lơ trong jang tih tam gơ̆h sek tơ lang dang ei hloi, mă lei hơ pơi ‘mĕh dôm anih vei lăng, khul kơ dră tơ ring păng anih pơ tho pơ hrăm tơ̆ tơ ring vang chă trong hơ met pơ ‘lơ̆ng vă đe ŏh jăh năm hŏk tơ̆ hnam trưng, hŏk tơ̆ anih sơ đơ̆ng ‘lơ̆ng huei krê jĭ tơ pŏh, athei đei trong "arih xa hơ dai" đunh đai hăm tơ drong jĭ.

Minh Hường: Chih

Dơ̆ng: Tơ blơ̆