VOV4.Bahnar - Sơnăm hŏk ‘nao 2021-2021 hlôi vă trŭh, mă lei jĭ hơbŭh ei hơnơ̆ng pơrăm kơtang. Lơ dêh char, pơlei tơm hlôi tơlĕch trong pơgơ̆r pơm lê̆h mơ̆t hŏk păng pơtho hŏk pơhrăm trư̆k tuyên. Hăm hŏk tro jăl ƀar, jăl pêng rŏ năng hlôi vă joăt ƀiơ̆ bơih păng tĕnh koăng lăp hăm tơdrong hŏk pơhrăm trư̆k tuyên lơ̆m sơnăm hŏk ‘nao. Mă lei hăm jăl kơđĕh, lơ mĕ ƀă jĭ tôch tơtăm “hơyak” blŭng a kơ kon hơ ‘lơ̆p bơ̆n. Vă băt hơdăh hlŏh dơ̆ng tơdrong đei ƀơm kơnê̆ đơ̆ng jĭ hơbŭh pơrăm trŭh hăm đe hŏk tro lăm 1 păng nơ̆r pơtho tơbăt đơ̆ng Dơnŏ anĭh tơm vei lăng Hnam trương pơtho pơhrăm, bơngai chă chĭh kơtơ̆ng ang ăn Radiô NPMVN oei tơ̆ Tây Nguyên pơma dơnŭh hăm ƀok  Thái Văn Tài, Kơdră chĕp pơgơ̆r Hơnĭh bơ̆ jang vei lăng Pơtho jăl Kơđĕh găh Dơnŏ anih tơm vei lăng Hnam trương pơtho pơhrăm.

Ƀok Thái Văn Tài, Kơdră chĕp pơgơ̆r Hơnĭh bơ̆ jang vei lăng Pơtho jăl Kơđĕh găh Dơnŏ anih tơm vei lăng Hnam trương pơtho pơhrăm

- Ƀok ăi, jĭ hơbŭh Covid-19 tŏk bŏk roi năr roi pơrăm kơtang tơ̆ lơ dêh char, pơlei tơm. Mĭnh ƀar dêh char, pơlei tơm tơchơ̆t khei ‘năr mơ̆t tơ̆ hnam trương lơ̆m năr 1/9, găh mĭnh ƀar tơring pơdơ̆h ‘mơ̆i kơ yuơ oei hơmơt đei tơdrong jĭ hơbŭh Covid-19. Ih tơroi lăng trong pơgơ̆r hok pơhrăm kơ hŏk tro jăl kơ đĕh, mă kăl lăm 1 đei ƀơm kơnê̆ lơ liơ?

Ƀok Thái Văn Tài: Lơ̆m chĭh pơ prŏ jơ ‘năr hŏk pơhrăm ‘nŏh Dơnŏ anĭh tơm vei lăng Hnam trương pơtho pơhrăm hlôi lăng trŭh pơm sơđơ̆ng ăn khei ‘năr hŏk pơhrăm kơ sơnăm au hăm jăl kơđĕh păng hăm lăm 1 ‘nŏh lơ liơ bơih. Hơdrô̆ hăl jăl kơđĕh ‘noh rim tơring hơlen tôch kơtang, ƀơ̆t jơ ‘năr ayơ sơđơ̆ng ‘nŏh pơgơ̆r pơtho pơhrăm hloi. Lơ̆m tơdrong gơ̆h tơchơt đơ̆ng Dơnŏ anĭh vei lăng kon pơlei dêh char gơ̆h tơchơ̆t ăn pơgơ̆r mơ̆t hok blŭng păng năr pơtôch sơnăm hŏk, lơ̆m khei ‘năr hrô̆ih ƀiơ̆ dăh mă klui ƀiơ̆ pơtêng hăm khei ‘năr hlôi đei hơmet hơdrol ăn sơnăm hŏk ‘nŏh 15 năr. Lơ loh, hăm khei ‘năr lơ lŏh, rim tơring gơ̆h tơchơt khei ‘năr ăn rim hŏk tro năm tơ̆ hnam trương hŏk pơhrăm tơ̆ rim tơring, đei ‘măng kiơ̆ rim hnam trương hloi. Tơ̆ dôm tơring ayơ đei sơđơ̆ng, hoei đei jĭ hơbŭh pơrăm ‘nŏh bơ̆n ăn hŏk tro năm hŏk. Tơring ayơ tŏk bŏk oei hơmơt đei jĭ hơbŭh pơrăm  ‘nŏh pơdơ̆h ‘mơ̆i vă sơđơ̆ng jơhngơ̆m pran jăng grăng akau ăn đe hŏk tro. Kơ yuơ lơ loh, hăm rim đe oh lăm 1 ‘nŏh ‘ngoăih sơđơ̆ng khei ‘năr lơ lŏh ‘nŏh bơ̆n jei lăng trŭh tơdrong ‘lơ̆ng, đe hăp jĭ tim gan tơchĕng trŭh tơdrong ‘mĕh hŏk pơhrăm, tơplĭh hle trong hŏk pơ hrăm đơ̆ng mâm non tŏk hŏk jăl kơ đĕh.

- Kiơ̆ kơ ih tơroi ‘nŏh đe hŏk tro lăm mĭnh ‘nŏh dôm bơngai gĭt kăl hlŏh hăm lei ưh ă. Đe sư tơplĭh tơdrong hŏk pơhrăm đơ̆ng mâm non jing hŏk jăl kơ đĕh mă lei tơ̆ mĭnh ƀar tơring đe ŏh tă đei ƀơm kơnê̆ đơ̆ng jĭ hơbŭh Covid-19 pơrăm dơ̆ng kơna tim mă gơ̆h atŭm hăm ƀok thây kô yak mơ̆t tơ̆ hnam trương ưh deh. Mư̆h lei Dơnŏ anĭh tơm vei lăng Hnam trương pơtho pơhrăm hlôi hơlen trŭh tơdrong kiơ hăm rim đe hŏk tro lăm 1 lơ̆m sơnăm hŏk ‘nao au, hŏ ƀok?

Ƀok Thái Văn Tài: Nhôn hlôi pơm đang hla bơar pơtho tơbăt trong vă bơ̆ jang kơ hnam trương, trong vă pơgơ̆r sơnăm hŏk. Hăm ƀok thây kô pơtho ‘nŏh ƀơ̆t măt ‘nŏh bơ̆n hơmet ăn hơdrol trong vă pơtho, mă kăl tơ̆ lăm 1 găh tơdrong môn hŏk tiếng Việt, Toán. Găh rim tơdrong hŏk anai ‘nŏh pơjing kơ toei ƀiơ̆ vă sơđơ̆ng ‘lơ̆ng hơ iă ăn đe ŏh ƀiơ̆. Păng mĭnh tơdrong kăl dơ̆ng ‘nŏh pơgĕnh lơ̆m khei ‘năr sơđơ̆ng vă atŏk jơ pơtho, hŏk kơtă ăn lăm 1. Păng tơdăh đei tơdrong jĭ hơbŭh pơđunh khei ‘năr, hŏk tro hŏk tơ̆ hnam lei bơ̆n jang kiơ̆ trong jang “pơdơ̆h năm tơ̆ trương mă lei ưh pơdăh hok”. Hăm lăm 1, lăm 2 ‘nŏh bơ̆n kăl lăng kơ jăp trŭh tơdrong iŏk yua kmăi kmŏk lơ liơ vă đe mĕ ƀă hŏk tro păng hŏk tro,  lớp 1, lớp 2 ƀônh hlô̆h vao, ƀônh joăt. Tơgŭm lơ liơ ‘nŏh vă joăt vei kơ jăp tơdrong hŏk pơhrăm.

- Tơ̆ hơnăp jĭ hơbŭh lơ lau, rŏ năng đe hŏk tro oei hơnơ̆ng hŏk trư̆k tuyên, ư̆h kơ gơ̆h vă hŏk akŏm tơ̆ hnam trương. Mă lei, hŏk trư̆k tuyên hăm đe hŏk tro jăl kơ đĕh ‘nŏh jĭ tôch mơmat tat. Dơnŏ anĭh tơm vei lăng pơtho pơhrăm kăl pơkă athei kơ chăng yă kiơ hăm rim tơring, mă kăl tơring mơmat tat găh kmăi kmŏk pơre nơ̆r, hŏ ƀok?

Ƀok Thái Văn Tài: Dơnŏ anĭh tơm vei lăng pơtho pơhrăm hlôi pơjing trong pơtho đei 51 kơsô̆ atŭm hăm 51 tơdrong hŏk lơ̆m tivi păng gô đei chĭh pơtrŭh jơ̆p lơ̆m rim trang mạng tơpôl vă tơgŭm ăn rim hŏk tro lơ̆m khei ‘năr oei tơ̆ hnam ‘nŏh bơ̆n chă pơtho ăn 51 tơdrong hŏk au. Păng ƀok thây kô kăl pơtho tơbăt ăn mĕ ƀă hŏk tro lơ̆m khei ‘năr oei tơ̆ hnam ‘nŏh lăng kơ jăp ăn hŏk tiêng Việt ‘moi kiơ̆ lơ̆m kmăi. Mă ƀar ‘nŏh, dôm tơring tơnap tap bơ̆n pơtho kiơ̆ lơ trong phara dĭh băl. Pơ tĭh gia nhen pơtrŭh ăn kơ phĭu, jei gơ̆h chă pơma dơnŭh dĭh băl ƀar păh rim tơring vă pơm lơ liơ vei kơ jăp trong pơtho pơhrăm. Păng bơ̆n jei băt, tơdăh bơ̆n hơmet ăn ‘lơ̆ng jei gô tơgŭm ăn đe ŏh gơ̆h chă hŏk kơ dĭh păng jang hơdoi hăm đe mĕ ƀă hŏk tro vă trong pơtho pơhrăm ‘lơ̆ng hơ iă ƀiơ̆.

Mă kăl bơ̆n pơgĕnh dôm jơ ‘năr gĭt kăl sơđơ̆ng ‘nŏh bơ̆n akŏm pơtho ăn lăm 1, lăm 2. Tơdăh tơring ayơ ‘nŏh chă pơtho pơhrăm ư̆h kơ tom keh đang trong pơtho pơhrăm kơ yuơ đei tơdrong au to lei tơring tơroi tơbăt ăn Dơnŏ anĭh tơm vă pơm pơđunh khei ‘năr pơtho pơhrăm dơ̆ng, vă jang keh đang tơdrong pơtho pơhrăm ăn đe ŏh.

- Lei ah, bơnê kơ ƀok Thái Văn Tài, Kơdră chĕp pơgơ̆r Hơnĭh bơ̆ jang vei lăng Pơtho jăl Kơđĕh găh Dơnŏ anih tơm vei lăng Hnam trương pơtho pơhrăm.

Ƀai chĭh đơ̆ng VOV1

Amazưt tơblơ̆ nơ̆r