VOV4.Bahnar - Akŏm atok kơtang pơrô̆ pơrôp đơ̆ng tơlĕch hơvơn “Pơ đĭ kon pơlei vang iung jang tang găn jĭ hơbŭh Covid-19 păng mơ̆t lĕch glăi lơm tĕh đak” vă atŏk kơtang jơhnbgơ̆m đon hlôh vao, sơkơt hơdăh tơdrong jang kơ rim bơngai tơ̆ hơnăp tơdrong hơmơt tơt kơ jĭ hơbuh Covid-19, khŭl ƀô̆ đô̆i vei lăng sơlam tĕh đak hlôi hơvơn jơhngơ̆m pran kon pơlei vang iung iung jang tang găn jĭ hơbŭh păng tơdrong mơ̆t lĕch glăi lơm tĕh đak; tơgop tang găn ư̆h kơ lê̆ ji hơbuh tơpoh lang să đơ̆ng găi ‘ngoăih mơ̆t lơ̆m tĕh đak păng lơ̆m kon pơlei pơla.

Kiơ̆ kơ ‘nŏh, tơdrong jang đei tơlĕch jang kiơ̆ hăm lơ tơdrong tôch hơdăh trŏ ƀlep hăm tơdrong lơ̆m tơring, jang hơdoi hăm rim tơdrong jang, ‘măng hơvơn tơ̆ tơring, sơđơ̆ng ăn rim trong jang tang găn jĭ Covid-19. Pơrô̆ pơrôp, pơtho khan vă rim kon pơlei đei jơhngơ̆m đon lăng ƀlep, tôm tong tơdrong hơmơt đơ̆ng jĭ hơbŭh Covid-19; Pơgơ̆r iung jang vei lăng năng tông tơdrong erĭh sa tơpôl, yak hơdoi hăm kon pơlei erĭh sa tơnap tap kơ yuơ đơ̆ng ƀơm kơnê̆ đơ̆ng jĭ hơbuh Covid-19 pơm ăn. 

Jĭ dêh char đei trong sơlam tĕh đak tăih hlŏh 468km hăm tĕh đak boăl Lào, đei lơ trong tĕh iĕ, tơdrong vei lăng tơdrong sơlam tĕh đak, tang găn đe mơ̆t lĕch glăi hlôi đei Dơnŏ anĭh Ƀô̆ đô̆i vei lăng sơlam tĕh đak dêh char Nghệ An tơlĕch jang kiơ̆ kơtang, jơp jang păng jơnei. Lơ̆m au, lăng kơ jăp trong chă pơrô̆ pơrôp, pơtho khan kon pơlei tơring sơlam tĕh đak. Đại tá Dương Hồng Hải, Kơ iĕng Kơdră chĕp pơgơ̆r Dơnŏ anĭh Ƀô̆ đô̆i vei lăng sơlamn Tĕh đak dêh char Nghệ An tơbăt:“Nhôn jang ‘lơ̆ng bơ̆ jang pơtho tơbăt ăn kon pơlei oei tơ̆ tơring sơlam tĕh đak, vĕh ver chă pơm tơdrong glăi tơgŭm bơngai đơ̆ng tĕh đak Lào mơ̆t lơ̆m teh đak; Pơjing kơthŭng tăh kơthơ tơkêng dôm bơngai pơm glăi lơ̆m rim tơring sơlam tĕh đak, nhôn pơjao ăn Kơ iĕng Ƀĭ thư Đảng tơring ‘nŏh kang ƀô̆ ƀô̆ đô̆i vei lăng sơlam tĕh đak đei pơjao ăn bơ̆ jang tơm chă pơrô̆ pơrôp pơtho khan ăn kon pơlei vang jang tơroi tơbăt hơdăh dôm bơngai đơ̆ng tĕh đak đe mơ̆t klenh lơ̆m teh đak kơ tơring păng dôm bơngai ư̆h kơ đei hla bơar kiơ̆ tơdrong tơchơ̆t”.

Yak hơdoi hăm Ƀô̆ đô̆i vei lăng sơlam tĕh đak, găh lơ kon pơlei rim tơring sơlam tĕh đak jei kơdĭh atŏk kơtang jơhngơ̆m đon kơ chăng lăng tang găn jĭ hơbŭh Cvid-19 nhen gom ƀŏ tơ̆ hơnĭh kơdrơ̆m bơngai, pruih pơgang pơlôch sơmach tăp dăr pơlei pơla. Mă kăl pơm “măt lăng” kơ Ƀô đô̆i vei lăng sơlam tĕh đak mưh iung jang hơlen băt hơdăh tơdrong, tơroi tơbăt tơtom ƀô̆h dôm bơngai mơ̆t lĕch glăi lơ̆m tơring.

Tơ̆ hơnăp tơdrong jĭ hơbuh Covid-19 pơrăm kơtang, Ƀô̆ đô̆i vei lăng sơlam tĕh đak dêh char Quảng Bình hlôi pơjing 14 hơnĭh gak tơ̆ rim trong nơnăm lơm tơring sơlam tĕh đak hăm teh đak boăl Lào vă tang găn dôm bơngai đơ̆ng tơring đei jĭ mơ̆t lơ̆m teh đak. Thiếu tá Lê Ngọc Gia, Kơdră jang chĭnh trĭ Kơđông Ƀô đô̆i vei lăng sơlam tĕh đak Làng Ho, găh Dơnŏ anih Ƀô̆ đô̆i vei lăng sơlam tĕh đak dêh char Quảng Bình tơbăt, lơ̆m khei năr tơnap tap, ƀô đô̆i đei kon pơlei oei tơ̆ tơring sơlam tĕh đak vang tơgŭm djru tôch kơtang:“Nhôn tôch chhôk hơ iă, mă đơ̆ng tơ̆ tơring sơlam tĕh đak mă kơđông bơ̆n vei lăng, tơdrong erĭh sa kơ kon pơlei oei tơ ƀơ̆p tôch kơ lơ tơdrong tơnap tap mă lei kon pơlei hlôi vang tơgop tơmam drăm, jơhngơ̆m đon atŭm hăm ƀô̆ đô̆i. Lơ̆m khei năr kơnh nhôn gô jang ‘lơ̆ng hlŏh dơ̆ng bơ̆ jang tang găn jĭ hơbŭh Covid-19”.

Hăm trong jang “Tang găn jĭ hơbuh nhen lĕ tang găn ayăt”, rim ƀô̆ đô̆i kơ Dơno anĭh Ƀô̆ đô̆i vei lăng sơlam tĕh đak dêh char Quảng Bình tơplĭh dĭh băl gak 24/24 jơ (‘nŏh jing gak prăt măng prăt năr) lơ̆m rim hơnĭh gak tơ̆ trong sơlam tĕh đak hăm tĕh đak boăl Lào. Rim ƀô̆ đô̆i ư̆h kơ hli tơdrong mơnat tat hrat hrĭn, oei sa kơtă lơm bri, tep pơdơ̆h hăm hơnhŭn. Yă Hồ Thuỷ, bơngai Vân Kiều oei tơ̆ pơlei Eo Bù-Chút Mút, tơring Lâm Thủy, apŭng Lệ Thủy, dêh char Quảng Bình tơroi tơbăt, lăng ƀô̆ đô̆i oei kơtă lơ̆m bri kơdrơ̆ng tơring sơlam tĕh đak tôch mơmat tat kơna kon pơlei vang chă tơgŭm djru vă đe sư jang keh đang tơdrong jang:“Tơdăh ƀô̆h tơmoi găn hlŏh tơring sơlam tĕh đak ‘noh nhôn năm tơroi hloi ăn ƀô̆ đô̆i vei lăng sơlam tĕh đak vă đe ‘nhŏng băt hơdăh, tang găn tơtom. Vang atŭm hăm ƀô̆ đô̆i tang găn jĭ hơbŭh Covid-19 hoei mơ̆t lơ̆m pơlei pơla bơ̆n”.

Khŭl sơng hơvơn kon pơlei mơ̆t lơ̆m tĕh đak tơ̆ ‘Măng sơlam tĕh đak apŭng plĕnh tĕh Cha Lo, dêh char Quảng Bình tơbăt, vă vei lăng kơ jăp dôm bơngai mơt lĕch tơ̆ rim tơring sơlam tĕh đak, Khŭl Kơdră chĕp pơgơ̆r Ƀô̆ đô̆i vei lăng sơlam tĕh đak dêh char Quảng Bình hlôi pơjing 14 hơnĭh gak tơ̆ rim trong nơnăm năm tơ̆ tĕh đak Lào. Đại tá Trịnh Thanh Bình, Kơdră chĕp pơgơ̆r Đô̆ đô̆i vei lăng sơlam tĕh đak dêh char Quảng Bình tơbăt, atŭm hăm bơ̆ jang pơtrui, Đô̆ đô̆i vei lăng sơlam tĕh đak dêh char Quảng Bình hơnơ̆ng chă pơrô̆ pơrôp pơtho khan ăn kon pơlei tơring sơlam tĕh đak vang iung jang tang găn jĭ hơbŭh Covid-19:“Rim khŭl gak iung jang dăr lăng kơ hret hăm dôm bơngai mơ̆t lĕch adoi pơgơ̆r năm pơtrui ‘moi kiơ̆ sơlam tĕh đak. Atŭm hăm ‘nŏh jei iung jang chă pơrô̆ pơrôp, pơtho khan ăn kon pơlei băt hơdăh găh trong tang găn jĭ hơbŭh, adoi ƀơk ăn che gom ƀŏ păng iung jang chă hơpuih pơ ‘lơ̆ng, pruih pơgang pơlôch sơlam tơ̆ rim pơlei”.

Găh lơ kon pơlei oei tơ̆ tơring sơlam tĕh đak vang iung jang hơdoi hăm khŭl ƀô̆ đô̆i vei lăng năng tông tơring sơlam tĕh đak sơđơ̆ng dơ̆ng kơ jăp, tơgop tang găn jĭ hơbŭh Covid-19, ‘nŏh oei đei lơ bơbgai pơgơ̆m lơ̆m tơdrong jang kơ dĭh, vă chă tơgŭm dŏng dôm bơngai kơnê̆. Rŏ năng bu bu jei oei ƀlŏk tơ jê̆ au, tang găn kĕ khŭl ba 200 ‘nu bơngai mơ̆t glăi lơ̆m tĕh đak ‘moi kiơ̆ trong sơlam tĕh đak Bản Lầu (apŭng Mường Khương, dêh char Lào Cai) dôm tơdrong pơm hơlĕnh pơdăr đơ̆ng khŭl kơnê̆ hlôi ƀô̆h hơdăh. Mă kăl, bơngai gak vei lăng sơlam tĕh đak tơgŭm djru lơ ‘măng rim bơngai kơnê̆ ba rim bơngai kơdau jăk mơ̆t oei kĕ hlot ‘nŏh tă bơngai vei lăng pơlei - jĭ bơngai vang iung jang tang găn jĭ hơbŭh atŭm hăm khŭl Ƀô̆ đô̆i vei lăng sơlam tĕh đak.

Kơ yuơ lơ lŏh, tơdăh kơ dĭh rim kon pơlei ư̆h kơ hlô̆h vao ƀlep, tôm tong găh tơdrong hơmơt tơt kơ tơdrong jĭ hơbŭh Covid-19 hăm kơ dĭh bơ̆n păng kon pơlei pơla lei, mă đơ̆ng khŭl Ƀô̆ đô̆i vei lăng sơlam tĕh đak đei rơbau klong măt, pơjing đei kơ hrĕng rơbau ‘nu bơngai bơ̆ jang gak vei lăng tơ̆ rim trong nơnăm lei jei ư̆h kơ kĕ tang găn dôm trong hơlĕnh pơdăr đơ̆ng khŭl kơnê̆ chă sơng ba dôm bơngai kơdau jăk mơ̆t oei glăi ‘mơ̆i.

VOV4 chĭh ƀai

Bơngai tơblơ̆: Amazưt