VOV4.Bahnar - Kŏng an dêh char Dak Lak ‘nao pơ gơ̆r tơ drong jang tơ ƀơ̆p muh măt joăt joe Tơ băt 90 sơ năm Năr pơ jing Đoàn hơ druh tơ dăm Cộng sản Hồ Chí Minh (26-3-1931 – 26-3-2021). Tơ̆ jơ tơ ƀơ̆p muh măt, rim bơ ngai tang măt hlôi tơ ƀlŏk dơ̆ng tơ drong joăt joe 90 sơ năm pơ jing Đoàn hơ druh tơ dăm Cộng sản Hồ Chí Minh, vang lăng dơ̆ng jơ hngơ̆m đon iung jang, tơ gŭm đơ̆ng sơ năm mơ lôh Kŏng an dêh char lơ̆m ‘măng iung jang, tơ gop vei sơ đơ̆ng chinh trĭ, sơ đơ̆ng tơ pôl lơ̆m dêh char. Hơ drô̆ sơ năm 2020, rim khŭl jang Đoàn lơ̆m kŏng an dêh char hlôi bơ̆ jang kiơ̆ 126 ‘măng tơ pôl ƀăt ‘mêm tơ̆ rim pơ lei, xăh hăm akŏp kơ jă vă jê̆ 3 ti hlak jên; pơ jao 23 kơ suơ̆t hŏk bŏng “Tơ gŭm oh truh tơ̆ hnam trưng” ăn kơ hŏk tro đei tơ drong arih sa mơ mat tat, hăm kơ sô̆ jên hlŏh 82 triệu hlak jên; asong 20.000 blăh che gom muh măt păng tơ mam yua hlŏh 150 triệu hlak jên tơ gŭm kon pơ lei tang găn Covid-19. Hơ dai hăm krao hơ vơn, jang hơ dai chơ 8 tấn tơ mam, 420 triệu hlak jên măt tơ gŭm kon pơ lei tơ ring tŏk bŏk đei ƀơm kơ nê̆ đơ̆ng ‘mi kial hơ bŭt pơ răm; vang plang song vă jê̆ 600 tơ pu pham.

Anĭh jang Đoàn dêh char Kon Tum hơ păh jên hŏk ƀŏng ăn đe ŏh hŏk tro rơ gei

Anih jang Đoàn dêh char Kon Tum ‘nao jang hơ doi hăm anĭh vei lăng pơ tho pơ hrăm dêh char pơ gơ̆r Năr “Hơ iŏh ngôi pơ chơt pran ‘lơ̆ng – Yak tŏk tơ̆ Đoàn”. Lơ̆m năr pơ chơt, đe ŏh hŏk tro đei ngôi pơ chơt lơ tơ drong hơ iă vă tơ băt 90 sơ năm Năr pơ jing Đoàn TNCS Hồ Chí Minh (26/3); pơ gơ̆r hơ ri hơ xoang pơ ư kơ pơ lei pơ la, tĕh đak, pơ ư kơ tơ drong jang Đoàn TNCS Hồ Chí Minh păng hơ iŏh iĕ Việt Nam. Ƀlep ƀât ‘măng mă âu, anih jang đoàn dêh char Kon Tum hơ păh 13 kơ suơ̆t hŏk ƀŏng ăn hŏk tro hŏk rơ gei lơ̆m pơ yan hŏk âu ki.

Thuem hăm Dơ̆ng: Tơ blơ̆