VOV4.Bahnar - Hăm tơ drong hơ met tôch ‘lơ̆ng, kơ na mă đơ̆ng đei lơ tơ ring tôch hơ tăih yăih, tơ drong pôk rơih tơ̆ dôm dêh char Tây Nguyên oei pơ gơ̆r tôch hơ iă hăm ƀĕnh jơ hngâm đon čhôk ‘nă. Kơ tă tơ̆ dôm anih oei hơ drô̆ yoa jĭ Covid-19, tơ ring oei pơ vang găn yoa đei bơ ngai jĭ, bơ ngai tăh hla oei tôch hơ iă bơ̆ jang tơ drong gơ̆h jang păng hơ năp athei jang đơ̆ng kon pơ lei.

Dak Lak đei kơ sô̆ bơ ngai tăh hla lơ hlŏh tơ̆ Tây Nguyên, hăm hlŏh 1,3 triu ‘nu bơ ngai tăh hla găh 46 hơ drĕch hơ drung

Bơ ngai tăh hla Nguyễn Ngọc Liên, tơ̆ anih pơ vang găn yoa jĭ Covid-19, phường Tân Thành, plt Buôn Ma Thuột, dêh char Dak Lak, tơ roi: “Mă đơ̆ng tơ̆ anih oei hơ drô̆ ră, mă lei nhôn tôch hơ iă, đei ăn jang ‘lơ̆ng hơ năp jang đơ̆ng kơ dih. Nhôn tơ chĕng hơ len vă chă rơih dôm bơ ngai tang măt rơ gei, đei jơ hngâm đon ‘lơ̆ng hlŏh.”

Jô̆ truh 11 jơ ‘năr dơ̆ng (23/5), tơ drong pôk rơih tơ̆ Tây Nguyên đei pơ gơ̆r tôch sơ đơ̆ng ‘lơ̆ng. Lơ tơ ring tơ̆ Tây Nguyên chih jô̆ bơ ngai năm tăh hla tôch lơ, nhen Lâm Đồng, đei 5/12 apŭng, plt đei hlŏh 80% bơ ngai tăh hla năm pôk rơih. Cát Tiên, apŭng hơ tăih yăih hlŏh đei loi 90%. Tơ̆ Dak Lak, apŭng Cư Kuin, đĭ đăng bơ ngai tăh hla năm pôk rơih ngăl.

Dơ̆ng: Tơ blơ̆