VOV4.Bahnar -  Lơ̆m giĕng âu ki, tơ̆ tơ ring Tây Nguyên (mă loi ‘noh jĭ 2 dêh char Dak Lak păng Kon Tum) hơ nơ̆ng đei lơ bơ ngai jĭ Covid-19, lơ̆m noh tơ tăm hloh ‘noh jĭ dôm hơ nih bơ ngai jĭ ‘ngoăih tơ pôl. Tơ̆ hơ năp tơ drong ‘nâu khŭl kơ dră păng khŭl jang kơ pal hlôi hơ tŏk loi dơ̆ng vei lăng vă tang găn tơ poh jĭ. Khŭl ƀak si hnam pơ gang Chợ Rẫy kŭm hlôi năm truh tơ̆ Dak Lak vă tơ gŭm tang găn jĭ Covid -19.

Tơ̆ dêh char Kon Tum đơ̆ng rŏng đei ƀôh dôm jĭt ‘nu bơ ngai jĭ SARS-CoV-2 lơ̆m tơ pôl, đơ̆ng giĕng hơ drol, khŭl jang kơ pal kơ dêh char hlôi pơ gơ̆r chĕng gơ var tơ ring pơ rang jĭ, tơ chă dôm bơ ngai F1, F2, F3 vă tang găn tơ poh COVID-19 lơ̆m tơ pôl păng tơ̆ dôm hơ nih ăn oei hơ drô̆ akŏm. Lăp đơ̆ng rŏng kơ ‘noh, Anih vei lăng kon pơ lei dêh char Kon Tum hlôi pơ gơ̆r ‘măng hop akŏm trực tuyến hăm 10 apŭng, pơ lei tơm păng 102 xăh, phường, thị trấn kơ dêh char. Pơ ma pơ gơ̆r tơ̆ ‘măng hop akŏm hăt hot âu, ƀok Lê Ngọc Tuấn, Kơ dră Anih vei lăng kon pơ lei dêh char Kon Tum athei rim tơ ring jang kiơ̆ ‘lơ̆ng gơ var tơ ring pơ rang jĭ, kŭm hăm ‘noh jang kiơ̆ ‘lơ̆ng tơ drong jang vei lăng tơ poh COVID-19 lơ̆m tơ pôl păng tơ̆ dôm hơ nih ăn oei hơ drô̆ akŏm:

        “Dôm hơ nih ăn oei hơ drô̆ akŏm ‘noh tôch kơ lơ bơ ngai, rŏ lăng đei ƀôh tơ poh băl đơ̆ng bơ ngai ‘nâu tơ̆ bơ ngai to lơ̆m hơ nih ăn oei hơ drô̆. Khŭl jang vei lăng hơ nih ăn oei hơ drô̆ athei hơ tŏk loi dơ̆ng dăr hơ len hơ nih ăn oei hơ drô̆ akŏm, hơ nih ăn oei hơ drô̆ hơ met. Ăn oei hơ drô̆ tơ̆ hnam hơ tŏk Grŭp jang COVID tơ pôl, pơ đĭ hloi khŭl jang chĭnh trĭ dăr hơ len. Tơ dăh chă ƀôh bơ ngai hơ yơ ăn oei hơ drô̆ tơ̆ hnam pơm kiơ̆ ưh kơ tơ păt ‘noh athei ăn oei hơ drô̆ akŏm.”

Mĭnh hơ nih hơ len lăng jơ hngơ̆m pran tơ pôl đơ̆ng rŏng ăn oei hơ dỏŏ akŏm tơ̆ phường Lê Lợi, pơ lei tơm Kon Tum

        Tơ̆ hop akŏ, yao ƀan tơ drong jang tơ roi tơ roi tơ băt hăm chih kơ tơ̆ng ang khei 10 âu ki, đei Khŭl tơ roi tơ băt Anih jang Đảng dêh char Kon Tum, ƀok Nguyễn Đình Cầu, Phŏ Chánh Văn phòng Anih vei lăng kon pơ lei dêh char Kon Tum tơ băt, tơ ring hơ nơ̆ng pơ vei hơ nih răp găn vei lăng jĭ tơ̆ rim trong gre mơ̆t lơ̆m dêh char. ‘Nâu jĭ dôm hơ nih vei lăng jĭ mă ưh kơ sĭ hơ nih răp găn vei lăng trong nơ năm kơ na dêh char gô ưh kơ yăih hŭt. Tơ pă yan âu ăn ƀôh, khŭl jang kơ pal hlôi chă ƀôh 1,2 ‘nu bơ ngai jĭ SARS-CoV-2 tơ̆ Hơ nih răp găn vei lăng jĭ kơ sô̆ 1 Sao Mai, pơ lei tơm Kon Tum păng Hơ nih răp găn vei lăng jĭ kơ sô̆ 2 kông krang Lò Xo, apŭng Đăk Glei tơ̆ trong Hồ Chí Minh. Hăm tơ drong tơ poh jĭ COVID-19 lơ̆m dôm hơ nih ăn oei hơ drô̆ păng ‘ngoăih tơ pôl, ƀok Nguyễn Đình Cầu, Phŏ Chánh Văn phòng Anih vei lăng kon pơ lei dêh char Kon Tum tơ băt:

        “Đơ̆ng rŏng ăn oei hơ drô̆ akŏm 14 năr ‘noh tơ̆ hơ nih ăn oei hơ drô̆ tôch kơ lơ bơ ngai hơ len lăng 3 ‘măng tă ưh kơ đei ƀôh jĭ ngăl. Mă lei đei dôm bơ ngai brŏk 2,3 năr đơ̆ng rŏng; 4, 5 năr đơ̆ng rŏng ‘noh pơ tơm đei ƀôh pơ rang jĭ. Tơ drong  ‘nâu tơ lĕch ăn 1 tơ drong vă khan khei ‘năr ƀơm jĭ đunh, đang kơ ‘noh ‘ngoăih kơ đei 1 tơ drong rŏ lăng dơ̆ng ‘noh ưh kơ băt hăm tơ poh băl ưh. Tơ drong mă 2 đơ̆ng rŏng kơ năm ăn oei hơ drô̆ akŏm brŏk ăn oei hơ drô̆ tơ̆ hnam bơ ngai brŏk tam mă pơm kiơ̆ ƀlep tơ drong hơ găt, ưh tơ păt lê̆ pơm tơ poh lanh ăn tơ pôl. Tơ drong mă dăr hơ len đơ̆ng rim Grŭp jang COVID tơ pôl jang tam mă tơ năp.”

        Tơ̆ hơ năp tơ drong kon pơ lei đĭ khei ‘năr ăn oei hơ drô̆ akŏm găh jang kiơ̆ ăn oei hơ drô̆, kiơ̆ hơ len lăng jơ hngơ̆m jăn tơ̆ hnam mă chă ƀôh jĭ hăm SARS-CoV-2 hơ nhăk truh tơ poh lanh jĭ ăn tơ pôl, 1,2 apŭng, pơ lei tơm kơ dêh char Kon Tum athei kon pơ lei apĭnh kơ dih oei dơ̆ng tơ̆ anih ăn oei hơ drô̆ akŏm 7 năr dơ̆ng.

            Tơ̆ Dak Lak, giĕng âu ki jing hơ nih tơ tŏ găh Covid-19, ƀơ̆t hơ nơ̆ng chă ƀôh lơ bơ ngai jĭ lơ̆m tơ pôl, mă loi ‘noh jĭ tơ̆ pơ lei tơm Buôn Ma Thuột. Mă kăl ‘noh đei 1 năr chih iŏk 174 ‘nu jĭ COVID-19, ‘nâu jĭ kơ sô̆ jĭ lơ hloh đơ̆ng hơ drol truh dang ei jô̆ đơ̆ng ‘măng jĭ mă 4 đei ƀôh. Lơ̆m noh đei dôm jĭt ‘nu đei chă ƀôh lơ̆m tơ pôl, akŏm găh lơ tơ̆ dôm apŭng Cư Mgar, Krông Buk, thị xã Buôn Hồ păng pơ lei tơm Buôn Ma Thuột. 

Khŭl bơ̆ jang kơ Hnam pơ gang Chợ rẫy hơ len lăng tơ̆ Khoa kâp kư̆u hơ met bơ ngai jĭ ăl Hnam pơ gang Đa khoa tơ ring Tây Nguyên

        Tơ̆ hơ năp tơ drong ‘noh, giĕng âu, khŭl ƀak si kơ Hnam pơ gang Chợ Rẫy hlôi năm truh tơ̆ Dak Lak vă tơ gŭm tơ jră jĭ Covid -19. Lơ̆m pơ gê mă blŭng ƀơ̆t truh tơ̆ Dak Lak, khŭl bơ̆ jang kơ Hnam pơ gang Chợ Rẫy hlôi đei jơ bơ̆ jang hăm kơ dră chĕp kơ̆l păng khŭl y ƀak si kơ Hnam pơ gang Đa khoa Tơ ring Tây Nguyên. Ƀak si Nguyễn Đại Phong, Kơ dră chĕp kơ̆l Hnam pơ gang Đa Khoa Tơ ring Tây Nguyên tơ băt: dôm nơ̆r tơ gop đơ̆ng Khŭl bơ̆ jang găh tơ drong khăm hơ len, ăn oei hơ drô̆ păng hơ met bơ ngai jĭ gô tơ gŭm Hnam pơ gang jang đang ‘lơ̆ng ƀiơ̆ lơ̆m tơ drong hơ met bơ ngai jĭ Covid -19:

        “Khŭl Hnam pơ gang Chợ rẫy đe sư đei hlôh vao tôch kơ lơ lơ̆m tơ drong hơ met jĭ Covid -19 tơ̆ pơ lei tơm Hồ Chí Minh kŭm nhen tơ̆ tơ ring găh pơ băh, tơ ring tŏk bŏk dang ei năm tơ̆ âu đe sư hlôi tơ gŭm Hnam pơ gang Đa khoa tơ ring Tây Nguyên ƀôh đei đĭ đăng dôm tơ drong ưh kơ ‘lơ̆ng mă hnam pơ gang jang. Tơ drong gĭt kăl đe sư gô tơ gŭm ăn Hnam pơ gang găh tơ drong jang hơ met păng đĭ đăng dôm tơ mam kơ măy kơ mŏk kŭm nhen tơ mam ưh kơ măh đe sư gô đei tơ gop nơ̆r tơ gŭm đơ̆ng Hnam pơ gang Chợ rẫy kŭm nhen Anih tơm vei lăng găh tơ drong jang pơ gang.”

Giĕng âu ki, khŭl kang ƀô̆ jang pơ gang kơ Hnam pơ gang Chợ Rẫy hlôi pơ gơ̆r dăr hơ len dôm hnam pơ gang pơm gia, dôm hơ nih hơ met, hơ nih ăn oei hơ drô̆; tơ gop nơ̆r trong jang ăn dêh char lơ̆m tơ drong klăih song tơ̆ng hơ met, vei lăng bơ ngai jĭ; vang akŏm dôm ‘măng hop akŏm hăm Anih pơ gơ̆r jang tang găn jĭ Covid-19 dêh char Dak Lak; hop akŏm  trực tuyến hăm khŭl jang pơ gang păng kơ dră chĕp kơ̆l kơ dêh char, rim anih jang pơ gang... Păng dang ei, dôm đe ƀak si điều dưỡng kơ Hnam pơ gang Chợ Rẫy hơ nơ̆ng oei dơ̆ng 1 giĕng vă tơ gŭm dêh char Dak Lak lơ̆m tơ drong jang tang găn jĭ păng vei lăng, hơ met bơ ngai jĭ Covid-19.

VOV Tây Nguyên

Thuem: Tơ blơ̆