VOV4.Bahnar - Tơ̆ hơ năp đei ƀôh ư̆h kơ ê đơ̆ng jĭ COVID-19, khŭl kơ dră tơ ring păng rim anih jang kơ pal rim dêh char lơ̆m tơ ring Tây Nguyên hlôi hơ tŏk loi dơ̆ng tơ drong jang tang găn jĭ. Kŭm hăm tơ drong răp găn năm mơ̆t glăi đơ̆ng tơ ring sơ lam, ăn oei hơ drô̆ bơ ngai đei ƀơm truh bơ ngai jĭ COVID-19, anih jang pơ gang, pơ tho pơ hrăm kŭm tơ lĕch lơ trong jang vă tang găn ‘lơ̆ng tơ drong tơ poh lanh đơ̆ng jĭ hơ buh.

Tơ̆ Kon Tum, ƀô̆ đô̆i vei lăng tơ ring sơ lam hlôi hơ tŏk loi dơ̆ng khŭl linh vă tang găn dôm bơ ngai kơ dâu klĕnh 2 păh trong sơ lam tơ til Lào hăm Campuchia. Mă hơ dăh ‘noh, vă jê̆ 100 ‘nu si koan, linh kon pơ lei đei pơ truh ăn kơ 8 Kơ đông linh vei lăng tơ ring sơ lam kơ dêh char Kon Tum. Đại tá Lê Minh Chính, Chính ủy ƀô̆ đô̆i vei lăng tơ ring sơ lam Kon Tum tơ băt, kŭm hăm tơ drong đei hơ tŏk dơ̆ng khul linh, kang ƀô̆, tơ̆ trong sơ lam kơ jung hloh  292km tơ til Lào hăm Campuchia kŭm ling lang iŏk đei tơ drong bơ ngơ̆t truh, pơ lung pơ đĭ găh jơ hngơ̆m đon hăm tơ mam lơ̆m kơ plăh jang kiơ̆ tơ drong jang hơ dai vei lăng tơ ring sơ lam păng tang găn jĭ COVID-19:

            “ ‘Ngoăih kơ trong jang tơ gŭm đơ̆ng Đảng, teh đak, khŭl linh bơ ngơ̆t truh ‘noh Anih jang Đảng dêh char, anih vei lăng kon pơ lei dêh char kŭm nhen rim anih jang hlôi năm ngôi, pơ lung, tơ gŭm ăn ‘nhŏng oh dôm tơ mam pơ gang, dôm tơ mam găh đak yua, găh ŭnh hơ yuh măt ‘năr vă tơ gŭm 1 păh ăn ‘nhŏng oh sơ đơ̆ng bơ̆ jang tơ̆ tơ ring sơ lam. Nhôn kŭm jang kiơ̆ ‘lơ̆ng trong jang 4 kơ tă anih. Tơ̆ dôm hơnih đei đak ro kơ dih ‘noh ‘nhŏng oh bơ̆ jang hơ tŏk jang sa vei rong kon tơ rong vă hơ tŏk ‘lơ̆ng ‘măng sŏng sa ăn kơ ƀô̆ đô̆i păng pơ vei dôm trong jang tơ gŭm nhen tơ̆ Kơ đông linh vă ‘nhŏng oh đei jơ hngơ̆m pran vă bơ̆ jang kiơ̆ ‘lơ̆ng tơ drong jang hơ dai”.

Khŭl linh vei lăng tơ ring sơ lam tơ roi tơ băt tang găn jĭ COVID-19

 Tơ̆ hơ năp đei ƀôh krê hơ mơt đơ̆ng jĭ hơ buh, Anih vei lăng kon pơ lei dêh char Dak Lak hlôi athei Kơ dră anih vei lăng kon pơ lei rim apŭng, rim xăh kơ chăng jang hơ dai hăm rim anih jang đei ƀơm truh athei tơ mơ̆t yua rim trong jang tang găn jĭ lơ̆m tơ ring đơ̆ng leng gong ‘năr 10/5/2021 ding truh đei tơ roi tơ băt ‘nao. Mă hơ dăh, pơ dơh rim tơ drong hop akŏm, rim tơ drong jang akŏm hloh 30 ‘nu lơ̆m 1 hơ nih ( hơ drô̆ rim hop akŏm tơ ƀơ̆p pơ ma dơ nuh hăm bơ ngai tăh hla jang kiơ̆ tơ drong hơ găt đơ̆ng Anih vei lăng pôk rơ̆ih dêh char); tang găn tơ drong akŏm lơ bơ ngai ‘ngoăih kơ anih bơ̆ jang, hnam trưng hŏk, hnam pơ gang; pơ dơh hloi rim tơ drong jang đei akŏm hloh 30 ‘nu tơ̆ rim hơ nih hơ kŭm pơ hrăm, hơ nih soi tơ beh; pơ dơh đĭ đăng rim tơ drong jang jŏh ayŏ, tơ plŏng kơ dâu, ngôi pơ chơt tơ̆ rim hơ nih tơ pôl; pơ dơh pơ gơ̆r et pơ kong, et sa, et tŏk hnam... oei hăm tơ drong pơ dong ƀŭ bơ ngai lôch athei kon pơ lei pơ gơ̆r hmă, ‘nĕ kơ gan akŏm lơ păng pơm kiơ̆ tơ păt tơ drong gom muh măt, ôp ti.

Truh jơ ‘năr âu, Dak Lak hlôi đei 2 ‘nu jĭ SARS-CoV2, oei hơ dai lơ̆m 1 pôm hnam tơ̆ pơ lei tơm Buôn Ma Thuột. Hơ nih đei 2 ‘nu tơ poh jĭ âu hlôi đei pơ vang găn bơ̆ih. 1 hnam trưng mầm non, hơ nih đei mon hơ ioh F1, oei hơ dai lơ̆m hnam hăm 2 ‘nu bơ ngai jĭ, kŭm hlôi đei tang ‘măng vă pơ gơ̆r prŭih pơ gang pơ lôch pơ rang. Yua đơ̆ng đei 1 ‘nu hơ ioh mầm non ‘noh F1 đơ̆ng bơ ngai jĭ 3237, Anih vei lăng kon pơ lei dêh char Dak lak hlôi tơ chơ̆t ăn rim hnam trưng mầm non tơ̆ pơ lei tơm Buôn Ma Thuột pơ dơh 1 giĕng, vă tơ lĕch jang dôm trong jang tang găn jĭ. Ƀơm truh dôm hŏk tro oei sa lơ̆m tơ ring pơ vang găn, ƀok Đoàn Ngọc Thượng, Phŏ kơ dră anih vei lăng kon pơ lei pơ lei tơm Buôn Ma Thuột tơ băt:

“Hăm tơ drong kơ đe mon hŏk tro dang ei tŏk bŏk hơ met ăn yak mơ̆t lơ̆m pơ long hŏk ki 2 kơ sơ năm 2020-2021 ‘noh nhôn hlôi athei khŭl jang kơ pal dăr hơ len lơ̆m tơ ring ăn oei hơ drô̆ vă đei hơ năn hơ dăh.  Đơ̆ng rŏng kơ đei hơ năn hơ dăh ‘noh nhôn ăn pơlong đơ̆ng rŏng mư̆h dôm đe mon ư̆h kơ vang pơ long atŭm kơ ‘măng pơ long hŏk ki 2 sơ năm hŏk 2020-2021.”

Hơ nih ăn oei hơ drô̆ tơ̆ dêh char Dak Lak

Pơ gê  ‘năr 10/5, Anih vei lăng tơ drong jĭ jăn Dak Lak tơ băt hlôi đei băt hơ dăh hơ len lăng ‘măng mă 1 dôm bơ ngai oei lơ̆m hơ nih kon pơ lei oei đei pơ vang găn ƀơm truh bơ ngai jĭ 3237 păng 3334. Kiơ̆ kơ ‘noh, đĭ đăng dôm bơ ngai tơ̆ tơ ring pơ vang găn tơ̆ trong 189/1 Mai Hắc Đế, phường Tân thành ( pơ lei tơm Buôn Ma Thuột, dak Lak) ‘noh đei 144 ‘nu adoi đei băt hơ dăh hơ len lăng ‘măng mă 1 ư̆h kơ đei pơ rang jĭ SARS -CoV-2.

Giĕng âu ki, Anih vei lăng kon pơ lei rim dêh char Dak Nông, Lâm Đồng, Kon Tum hlôi đei hla ar athei găh tơ drong pơ dơh bơ̆ jang 1,2 tơ drong pơ vih pơ văn vă jang kiơ̆ tơ păt dôm trong jang tang găn jĭ Covid-19. Kiơ̆ kơ ‘noh, 1,2 tơ drong pơ vih pơ văn ư̆h kơ kăl tơ pă nhen hơ nih mơ dro et sa hơ ri hơ soang, karaoke, tơ drong pơ chơt điện tử đei hơ mơt kơ tơ poh jĭ Covid-19 lơ lơ̆m dêh char athei pơ dơ̆h kơ bơ̆ jang. Anih pơ gơ̆r jang tang găn jĭ tơ̆ bơ ngai kơ dêh char Dak Nông athei rim khŭl jang kơ pal păng anih jang joăt jang hơ tŏk loi dơ̆ng jang hơ dai dăr hơ len jĭ hơ buh tơ̆ rim tơ ring ‘măng jang sơ lam, tơ ring sơ lam teh đak. Anih jang kơ pal hơ tŏk loi dơ̆ng tơ drong jang hơ len lăng, dăr lăng tơ drong bơ̆ jang kiơ̆ gom muh măt, ngôi hơ tăih băl tơ̆ dôm hơ nih tơ pôl, mă loi ‘noh jĭ hơ nih tơ mang lăng; pơm kiơ̆ phak kơ hret dôm bơ ngai pơm glăi kiơ̆ tơ drong hơ găt.

Kon pơ lei dêh char Dak Nông tơ roi tơ băt y tế

Kŭm lơ̆m giĕng âu ki, tơ̆ tơ ring Tây Nguyên đei 1,2 ‘nu athei ăn oei hơ drô̆ yua kơ đei ƀơm truh bơ ngai jĭ Covid-19. Mă hơ dăh ‘noh, Hnam pơ gang apŭng hlôi jang kiơ̆ ăn oei hơ drô̆ 1 ‘nu  F1 hăm bơ ngai jĭ COVID-19 tơ̆ dêh char Vĩnh Phúc păng tŏk bŏk hăt hot pơ gơ̆r tơ chă tang găn jĭ. Đei 6 ‘nu ngôi tơ jê̆ hăm F1 tơ̆ apŭng Sa Thầy kŭm hlôi đei ăn oei hơ drô̆ vă hơ len lăng. Oei tơ̆ Dak Lak, giĕng âu ki, Hnam pơ gang thị trấn Ea Pốk, apŭng Cư M’gar đei sơng iŏk 1 ‘nu năm tơ roi tơ băt y tế brŏk đơ̆ng pơ lei tơm Đà Nẵng. Bơ ngai âu đei ƀôh tơ drong jĭ Covid-19 nhen hiĕn, yuh, lĕch đak muh... Lăp đơ̆ng rŏng đei tơ roi tơ băt, bơ ngai âu hlôi đei iŏk pham gơ̆ih ăn Anih jang Vệ sinh dịch tễ Tây Nguyên vă hơ len lăng păng tŏk bŏk gô ăn ƀôh thoi yơ. Dang ei bơ ngai âu hlôi ăn năm oei hơ drô̆ tơ̆ khoa hơ met găh jĭ tơ poh kơ Hnam pơ gang apŭng Cư M'gar.

VOV Tây Nguyên

Thuem: Tơ blơ̆