VOV4.Bahnar - Vei kơ jăp bơ ngai mât tơ̆ tơ ring, chă hơ len tơ drong jĭ lơ̆m tơ pôl, atŭm hăm ‘nŏh hơ tŏk tơ drong ƀet vắc-xin tang găn jĭ covid-19 ăn dôm bơ ngai ƀônh tơ pŏh jĭ, ‘nŏh jĭ dôm trong jang tang găn jĭ mă dôm dêh char Tây Nguyên oei bơ̆ jang, dar dĕh pơm pơ hơi tơ drong pơ vang găn, tơ iung dơ̆ng dôm tơ drong jang atŏk tơ iung mŭk drăm, tơ pôl.

Đơ̆ng rŏng 2 giĕng hŭt lê̆ tơ drong pơ vang găn, plt Buôn Ma Thuột, dêh char Dak Lak, hơ nơ̆ng đei ƀôh anih đei bơ ngai jĭ ‘nao lơ̆m tơ pôl. Mă lei, Buôn Ma Thuột ưh đei tơ mât yoa dôm trong jang kiơ̆ tơ drong tơ chơ̆t 16 tơ̆ jơ̆p tơ ring, mă lăp tơ chă bơ ngai jĭ, chĕng găn tơ ring tôch lăp, pơih xă tơ drong set hơ len jĭ păng hơ tŏk tơ drong ƀet vắc-xin tang găn jĭ covid-19. Mă hơ dăh nhen tơ̆ anih ‘nao đei jĭ tơ̆ xăh Ea Kao, plt lăp tơ mât yoa tơ drong tơ chơ̆t 16 hăm xăh âu đơ̆ng ‘năr 2/10, pơ vang găn 4 pơ lei đei jĭ, set hơ len jĭ ăn đĭ đăng kon pơ lei lơ̆m tơ ring pơ vang găn păng ƀet 1000 kơ liêu vắc-xin ăn kon pơ lei.

Ƀok Đoàn Ngọc Thượng, Phŏ Kơ dră vei lăng kon pơ lei plt Buôn Ma Thuột, ăn tơ băt: “Hăm đon tơ chĕng vắc-xin ‘lơ̆ng hlŏh jĭ vắc-xin truh hrôih hlŏh hăm kon pơ lei, kơ na nhôn bơ̆ jang păng athei dêh char tơ gŭm vắc-xin vă jăh ƀet ăn kon pơ lei, pơm thoi yơ vă ƀet đei vắc xin lơ hlŏh, pơ jing tơ drong sơ đơ̆ng, ưh ăn jĭ tơ pŏh truh tơ̆ tơ ring nai.”

Dak Lak sơng kon pơ lei ƀât anih gak gơng 14

Vei kơ jăp, pơm tơ jur tơ ring ƀrê, vei lăng sơ đơ̆ng păng pơih xă tơ ring dreng, ‘nŏh jĭ trong mă rim anih jang chinh trĭ tơ̆ plt Buôn Ma Thuột, dêh char Dak Lak kŭm nhen tơ ring Tây Nguyên oei jang vă tang găn jĭ covid-19. Jĭ dêh char đei kơ sô̆ bơ ngai jĭ lơ hlŏh tơ̆ tơ ring, jô̆ truh giĕng âu ki, Dak Lak đei hlŏh 2000 ‘nu bơ ngai jĭ SARS-CoV-2. Bơ̆ jang ‘lơ̆ng tơ drong chĕng găn tơ ring, hơ met jĭ, truh dang ei, đĭ đei 9/15 tơ ring lơ̆m dêh char Dak Lak tơ plih jing “tơ ring dreng” păng tơ lĕch dôm tơ drong jang atŏk tơ iung mŭk drăm, tơ pôl lơ̆m khei ‘năr ‘nao plơ̆ng”.

Tơ̆ Gia Lai, kŭm găn hrĕnh dôm anih đei jĭ ‘nao lơ̆m tơ pôl, dêh char oei đei năng jĭ tơ ring dreng lơ̆m tĕh đak. Năng jơ hngâm pran, tơ drong arih kơ kon pơ lei ‘nŏh kăl hlŏh, dêh char jang atŏk ming mŭk drăm, tơ pôl tôch kơ chăng. Ƀok Võ Ngọc Thành, Kơ dră vei lăng kon pơ lei dêh char Gia Lai pơ ma hơ dăh:

“Trong jang tang găn jĭ lơ̆m chăl ‘nao kŭm đei pơ tho tôch rơ đăh. Mưh bơ̆n tam mă kĕ ƀet tôm vắc xin ăn hlŏh 70% kon pơ lei ‘nŏh, 1 păh nhôn hơ nơ̆ng apinh Trung ương tơ gŭm thim vắc xin vă ƀet mă hrĕnh; tơ drong nai ‘nŏh oei hơ nơ̆ng jang kiơ̆ ‘lơ̆ng trong jang 5K. ‘Ngoăih kơ ‘nŏh athei tơ chĕng, găn đơ̆ng ‘ngoăih, dôm anih gak hơ len jĭ tơ̆ trong mât lơ̆m dêh char athei jang mă ‘lơ̆ng, vei lăng mă kơ jăp. Mă 2 athei jang mă ‘lơ̆ng tơ drong vei lăng tơ̆ lăm; dăr hơ len, vei lăng, sek tơ lang dôm tơ drong glăi, ưh gơ̆h hŭt đon kơ chăng, lăng pơ hơi.”

Tơ drong lei lăi băl đơ̆ng jĭ covid-19 tơ̆ dôm dêh char Tây Nguyên ‘nŏh dôm anih ‘nao đei jĭ tơ tă bơ ngai truh đơ̆ng ‘ngoăih ngăl. Nhen tơ̆ Lâm Đồng, truh dang ei lơ̆m kơ sô̆ 288 ‘nu bơ ngai jĭ Covid-19 ‘nŏh đei vă jê̆ 1/3 jĭ bơ ngai huơ̆r gre, phŭ gre tih chơ tơ mam vih vât tơ̆ dôm dêh char păng bơ ngai đei ƀơm truh đe sư. Dêh char tơ lĕch trong jang vei kơ jăp gre tih păng bơ ngai huơ̆r gre, phŭ gre tih tơ̆ anih gak mât lơ̆m dêh char truh anih tơ jur tơ mam, pơm ăn anih oei hơ dai, tơ gŭm ƀet vắc-xin hơ drol ăn dôm bơ ngai âu…

Vă tang găn jĭ, dang ei dôm dêh char Tây Nguyên oei hơ nơ̆ng vei kơ jăp bơ ngai đơ̆ng ‘ngoăih mât tơ̆ tơ ring. Kăl loi đơ̆ng ‘năr 1/10, mưh dôm dêh char, plt găh Pơ băh pơm pơ hơi tơ drong pơ vang găn, kơ sô̆ bơ ngai vih tơ̆ pơ lei tŏk lơ, dôm tơ ring athei tơ chĕng truh dôm trong jang sơng kon pơ lei vih tơ̆ pơ lei. Tơ̆ hop akŏm Khul kơ dră chĕp kơ̆l đảng ƀô̆ dêh char Dak Nông pơ gơ̆r ‘năr 1/10, Kơ dră vei lăng kon pơ lei dêh char Hồ Văn Mười, tơ tăm, tơ drong mơ mat hlŏh hrei ‘nâu jĭ pơm thoi yơ sơng iŏk kon pơ lei oei đom lơ̆m tơ ring đei jĭ, ưh đei lê̆ đe sư vih tơ̆ pơ lei mơ̆ng kơ vă:

“Dak Nông jĭ trong đơ̆ng Pơ băh tŏk tơ̆ Tây Nguyên, tơ drong kăl ‘nŏh dang ei bơ̆n sơng kon pơ lei vih thoi yơ, ưh gơ̆h lê̆ kon pơ lei vih kơ dih mơ̆ng kơ vă, tơ dăh năm athei hơ met năm mă ‘lơ̆ng nhen adrol ki. Dak Nông hrei ‘nâu đei 2 tơ drong ưh kơ pran, mă 1 ‘nŏh tơ drong jang pơ gang, mă 2 ‘nŏh jang tam rơ gei vă gơ̆h pơm ‘lơ̆ng ăn kon pơ lei vih tôch lơ ‘nŏh tôch mơ mat.”

Hơ tŏk tơ drong ƀet vaccine tang găn jĭ covid-19

Kiơ̆ kơ sô̆ chih jô̆ blŭng a đơ̆ng Anih pơ gơ̆r jang tang găn jĭ COVID -19 dêh char Dak Lak, đơ̆ng ‘năr dơ̆ng 2-10 truh ‘năr dơ̆ng 3-10 đei dang 7.000 tŏ gre lơ kơ loăi hăm vă jê̆ 10.000 ‘nu bơ ngai đơ̆ng dôm dêh char găh Pơ băh vih păng năm brih dêh char Dak Lak. Lơ̆m nŏh, hơ drô̆ kon pơ lei dêh char đei vă jê̆ 3000 ‘nu bơ ngai. Vă pơm ‘lơ̆ng ăn tơ drong tang găn jĭ COVID -19, đĭ đăng kon pơ lei vih tơ̆ dêh char đei chơ mât tơ̆ anih oei atŭm tơ̆ Hnam trưng tĕh đak rong hŏk tro kon kông Nơ Trang Lơng vă test hrĕnh. Đơ̆ng rŏng kơ ‘nŏh khul jang kơ pal klăih song bơ ngai kiơ̆ apŭng păng dôm tơ ring vă ăn gre chơ iŏh kon pơ lei kơ dih păng ăn mât tơ̆ anih oei hơ drô̆ kiơ̆ tơ drong hơ găt.

Ƀok Trịnh Quang Trí, Kơ dră Anih vei lăng tơ drong jĭ jăn dêh char Dak Lak ăn tơ băt: ‘măng mă âu, kon pơ lei vih, bu bu kŭm đei ƀet tôm 2 jrŭm vắc xin păng set hơ len jĭ ‘nŏh ưh đei jĭ SARS –CoV-2, kŭm hăm dôm bơ ngai hlôi đei ƀet jrŭm mă 1, set hơ len ưh đei jĭ păng unh hnam gơ̆h pơm anih ăn đe sư oei hơ drô̆ kiơ̆ tơ drong hơ găt đơ̆ng Anih tơm vei lăng jang pơ gang, đei dêh char asong oei hơ drô̆ tơ̆ hnam ngăl. Kon pơ lei tam đei ƀet vắc xin, gô đei ăn oei hơ drô̆ đơ̆ng rŏng kơ test hrĕnh tơ̆ anih truh akŏm hloi. Kŭm kiơ̆ ƀok Trịnh Quang Trí, hăm hlŏh 3000 ‘nu bơ ngai vih tơ̆ Dak Lak lăp dôm năr đech, anih jang pơ gang akŏm đĭ jơ hngâm vă bơ̆ jang khăm hơ len, tơ tom chă ƀôh bơ ngai F0, găn tôch ai jĭ tơ pŏh.

“Hrei ‘nâu anih jang pơ gang kĕ test hrĕnh vă set hơ len jĭ ăn đĭ đăng kon pơ lei vih. Mă lei hăm kơ sô̆ bơ ngai tôch lơ păng bơ̆n sơng tơ̆ 1 anih ưh kơ xă, tơ drong nai dơ̆ng ‘nŏh tŏ ‘mi kial đơ̆ng ‘năr brei truh dang ei ‘mi hơ nơ̆ng, pơm mơ mat ăn khul jang pơ gang set hơ len jĭ. Yoa thoi nŏh ‘năr brei đei dôm anih ‘nao đei jĭ lơ̆m plt kŭm nhen tơ̆ Buôn Hồ, dôm khul jang pơ gang hăt hot set hơ len jĭ tơ̆ dôm anih âu yoa thoi nŏh bơ̆ jang lơ̆m dôm năr âu ki kŭm tôch gleh hrat, mơ mat tat. Mă lei gơ măng brei CDC hlôi ăn hlŏh 30 ‘nu kăn ƀô̆ jang pơ gang jur set hơ len jĭ păng pơ gê ‘nâu hlôi tơ plih ăn đe kăn ƀô̆ âu bơih.”

Dang ei dôm dêh char Tây Nguyên oei athei vei lăng kơ jăp tơ̆ dôm anih gak tơ̆ trong gre vă găn ưh ăn jĭ tơ pŏh. Tơ drong ‘nâu gơ̆h tơ gŭm vei lăng tơ ring dreng, pơ jing tơ drong ‘lơ̆ng ăn dôm tơ ring tơ̆ lăm pơm pơ hơi ƀiơ̆ tơ drong pơ vang găn, dar dĕh tơ iung ming dơ̆ng tơ drong jang mŭk drăm, tơ pôl. Mă lei dôm anih gak vei lăng kơ hret dêh hnang kŭm pơm tơ lĕch tơ drong hrăt hrot tơ̆ trong gre lơ̆m 1,2 jơ, ƀơm kơ nê̆ truh tơ drong yak vih vât, chơ chuĕn tơ mam tơ̆ dôm tơ ring. Gơ̆h ƀôh, mưh kơ sô̆ kon pơ lei đei ƀet vắc-xin tang găn jĭ covid-19 tam mă lơ, kơ sư̆k bơ̆ jang tam mă pran, ‘nŏh tơ drong pơm pơ hơi ƀiơ̆ tơ drong pơ vang găn tơ̆ dôm dêh char Tây Nguyên oei athei bơ̆ jang mă kơ chăng, lăp bơ̆ jang kơ tă lơ̆m tơ ring sơ đơ̆ng đĕch, vă pơm ‘lơ̆ng tôch ai ăn tơ drong arih xa, jang mŭk drăm, tơ pôl.

         Minh Huệ - Nam Trang: Chih

Dơ̆ng: Tơ blơ̆