VOV4.Bahnar - Kŭm hăm tĕh đak, ‘năr brei, bơ ngai tăh hla lơ̆m tơ ring Tây Nguyên năm pôk rơih bơ ngai tang măt Quốc hội jăl XV păng bơ ngai tang măt Jơ nŭm pơ gơr kon pơ lei jơ̆p tơ ring đơ̆ng 2021 – 2026. Đ’Nâu tơ pă jĭ Năr chơt hơ iă kơ đĭ  đăng kon pơ lei, tơ ƀôh hơ dăh tơ drong gơ̆h jang păng hơ năp athei jang đơ̆ng rim bơ ngai tăh hla lơ̆m tơ drong chă rơih dôm bơ ngai tang măt, rơ gei, đei đon ‘lơ̆ng, tơ găl dơ̆ng tang ăn jơ hngâm đon hơ pơi ‘mĕh păng tơ drong pơm tơm đơ̆ng kon pơ lei.

Tơ̆ Gia Lai, đơ̆ng pơ gê hrôih ‘năr 23/5, đơ̆ng rŏng kơ pơ gơ̆r lêh đang, bơ ngai tang măt tơ̆ 1.437 anih pôk rơih tơ̆ 220 xăh, găh 17 apŭng, thĭ xăh, pơ lei tơm pơ gơ̆r tăh hla. Đơ̆ng rŏng kơ jang đang tơ drong gơ̆h jang păng hơ năp athei jang đơ̆ng kơ dih, mŏ Kay, tơ̆ xăh Đăk Ta Ley, apŭng Mang Yang, dêh char Gia Lai, pơ ma:

 “Năr pôk rơih bơ ngai tang măt Quốc hội păng Bơ ngai tang măt Jơ nŭm pơ gơ̆r  kon pơ lei jơ̆p tơ ring, ĭnh tôch hơ iă đei chĕp kơ phĭu năm pôk rơih. Inh hơ mĕng chă rơih đei dôm bơ ngai rơ gei, đei jơ hngâm đon ‘lơ̆ng, pơ ngơ̆t truh tơ drong jang mŭk drăm ăn kon pơ lei păng mă loi ‘nŏh tơ rĕk truh tơ drong arih xa kơ đe druh dăm, pơ tho, chă tơ drong jang păng tơ gŭm ăn druh dăm iung jang xa.”

Jĭ xăh đei 78% bơ ngai tăh hla ‘nŏh jĭ bơ ngai K’ho, tơ drong pôk rơih tơ̆ Đạ Nhim, apŭng Lạc Dương, dêh char Lâm Đồng đei pơ gơ̆r tôch hơ iă, tơ ƀôh hơ dăh tơ drong pơm tơm đơ̆ng kon pơ lei. Ƀok Cil Yũ Ha Giảng, 63 sơ năm, tơ̆ plei Liêng Bông, xăh Đạ Nhim akhan, tơ drong pôk rơih ‘măng mă âu tôch gĭt kăl hăm pơ lei pơ la, yoa ƀok lui, dôm bơ ngai đei pôk pơm bơ ngai tang măt Quốc hội păng Jơ nŭm pơ gơ̆r kon pơ lei jơ̆p tơ ring gô dơ̆ng tang ăn đon hơ pơi ‘mĕh đơ̆ng kon pơ lei. Đe sư vang tơ gop nơ̆r pơ jing lơ trong jang, tơ drong tơ gŭm lăp hăm yăn âu, lơ̆m noh đei vei lăng sơ đơ̆ng tơ drong arih xa tơ pôl, sut pơ đĭ pơ ngot, tơ jur tơ nuh hin păng chă tơ drong jang, pơm sơ đơ̆ng tơ drong arih xa kơ kon pơ lei.

“Kon pơ lei tôch hơ iă mưh năm pôk rơih bơ ngai tang măt Kuôk hô̆i păng bơ ngai tang măt Jơ nŭm pơ gơ̆r kon pơ lei jơ̆p tơ ring. Hăm kon pơ lei nhôn, tơ drong chă rơih dôm bơ ngai rơ gei, đei jơ hngâm đon ‘lơ̆ng vă chĕp kơ̆l tĕh đak. Nhôn lui pôk rơ̆ih ‘măng âu gô iŏk đei yua ‘lơ̆ng hơ iă”.

Khŭl linh vei lăng tơ ring sơ lam Dak Lak jang đang pôk rơ̆ih

Pơ gê ‘năr 23/5, Năr chơt hơ iă pôk rơ̆ih kơ đĭ đăng kon pơ lei tơ̆ 660 anih tăh kơ phiê̆u lơ̆m dêh char Kon Tum kŭm pơ gơ̆r lơ̆m jơ năr chơt hơ iă. Đơ̆ng rŏng 1.100 ‘nu bơ ngai tăh hla plei Kon Hra Chót, găh Anih pôk rơ̆ih kơ sô̆ 6, phường Thống Nhất, pơ lei tơm Kon Tum tăh hla kơ phiê̆u pôk blŭng a, bơ ngai tăh hla  A Huy chhôk hơ iă tơ băt:

            “ Ĭnh jĭ kră pơ lei plei  Kon Hra Chót. Plei nhôn chhôk hơ iă rơ̆ih iŏk dôm bơ ngai tang măt Kuôk hô̆i, Jơ nŭm pơ gơ̆r kon pơ lei gơ̆h hơ gei. Tơ dăh bu đei pôk pơm lơ̆m Jơ nŭm pơ gơ̆r kon pơ lei, Kuôk hô̆i kŭm ‘mĕh ăn pơm liơ tơ gŭm ăn kon pơ lei.”

Hơ drol ‘noh, lơ̆m ‘năr 22/5, đei tơ drong drơ̆ng lăp đơ̆ng Anih vei lăng pôk rơ̆ih teh đak, vă jê̆ 12 rơ bâu ‘nu bơ ngai tăh hla tơ̆ Tây Nguyên hlôi pơ gơ̆r pôk rơ̆ih hrôih tơ̆ 63 grŭp pôk rơ̆ih, lơ̆m noh đei dôm kang ƀô̆ - khŭl linh rim kơ đông ƀô̆ đô̆i vei lăng tơ ring sơ lam, kon pơ lei 6 xăh sơ lam păng tơ ring mơ mat tat dêh hloh. Đei hơ met ăn ‘lơ̆ng păng pơ gơ̆r tơ păt, pôk rơ̆ih hrôih tơ̆ Tây Nguyên hlôi kĕh đang hăm vă jê̆ 100% ‘nu bơ ngai tăh hla năm pôk. Bơ ngai tăh hla Cao Trung Hiếu, kơ đông linh vei lăng tơ ring sơ lam Đăk Ruê, ƀô̆ đô̆i vei lăng tơ ring sơ lam Dak Lak tơ băt ‘măng mă blŭng bơ̆ jang tơ drong gơ̆h jang păng tơ drong jang pôk rơ̆ih.

“Ĭnh ƀôh chơt hơ iă păng ‘nă hal yua kơ ‘nâu ‘măng mă blŭng ĭnh đei năm tăh kơ phiê̆u pôk bơ ngai tang măt Kuôk hô̆i păng Jơ nŭm pơ gơ̆r kon pơ lei rim tơ ring. Hơ drol kơ pôk ĭnh hlôi đŏk đe chih tơ roi tơ drong bơ̆ jang, arih sa dôm bơ ngai lĕch pơ jei, hlôi hơ len lăng rơ̆ih iŏk. Ĭnh hlôi rơ̆ih iŏk đei dôm bơ ngai gơ̆h hơ gei tơ găl tang măt ăn bơ ngai tăh hla nhôn. Hơ mĕng rim bơ ngai lĕch pơ jei đơ̆ng rŏng kơ đei pôk gô đei gop đon gơ̆h hơ gei pơ jing tơ ring sơ lam Dak Lak pơ ma hơ drô̆ păng tĕh đak pơ ma atŭm roi ‘năr roi pơ drŏng pran.”

Bơ ngai tăh hla plei Kon Hra Chót, phường Thống Nhất, pơ lei tơm Kon Tum tăh kơ phiê̆u

Hơ drô̆ tơ̆ dêh char Kon Tum, kŭm hăm bơ̆ jang kiơ̆ tơ drong gơh jang đơ̆ng kơ dih, khŭl linh vei lăng tơ ring sơ lam oei iŏk jang vei sơ đơ̆ng tơ pôl, kŭm hăm 3 xăh sơ lam ‘noh jĭ Đăk Plô, Đăk Nhoong păng Đăk Long pơ gơ̆r ‘lơ̆ng pôk rơ̆ih hrôih tơ̆ tơ ring. Lăp lơ̆m pơ gê ‘năr 22/5, hloh 10.000 ‘nu bơ ngai tăh hla 6 xăh mơ mat tat dêh hloh păng 6 kơ đông ƀô̆ đô̆i vei lăng tơ ring sơ lam tơ̆ 2 apŭng Đăk Glei, Ngọc Hồi, dêh char Kon Tum hlôi jang đang pôk rơ̆ih hrôih, hăm vă jê̆ 12 rơ bâu ‘nu bơ ngai tăh hla năm pôk, iŏk đei kơ sô̆ vă jê̆ 100%. Bơ ngai tăh hla A No, năm tăh kơ phiê̆u tơ̆ anih pôk rơ̆ih kơ sô̆ 2, xăh Đăk Long, apŭng Đăk Glei, dêh char Kon Tum, tơ băt:

“Kon pơ lei năm pôk tôch chhôk ‘nă. Rim bơ ngai năm tôm đĭ hloi. Yua kơ ‘nâu jĭ hơ năp jang kơ rim ‘nu kon pơ lei, rơ̆ih iŏk đei dôm bơ ngai tơ găl vă tang măt ăn jơ hngơ̆m đon hơ pơi ‘meh đơ̆ng kon pơ lei.”

Pôk rơ̆ih Kuôk hô̆i jăl 15 păng jơ nŭm pơ gơ̆r kon pơ lei rim tơ ring jăl jang 2021-2026 pơ gơ̆r lơ̆m khei ‘năr jĭ covi-19 đei ƀôh mơ mat, tôch kơ hơ mơt tơ poh jĭ đơ̆ng păh to tơ ring sơ lam, kơ na hơ năp jang đơ̆ng kang ƀô̆ khŭl linh vei lăng tơ ring sơ lam ‘noh jĭ tơ drong jang hơ dai, pơ gơ̆r pôk rơ̆ih ƀlep luơ̆t hai, vei sơ đơ̆ng tơ ring sơ lam păng tang găn jĭ hơ buh hai, vă năr pôk rơ̆ih tơ pă jing năr chơt hơ iă kơ teh đak. Lơ̆m năr chơt hơ iă tih kơ teh đak, lơ̆m tơ ring Tây Nguyên đei hloh 4 triệu 55 rơ bâu ‘nu bơ ngai tăh hla, kŭm vă jê̆ tôm 54 hơ drĕch hơ drŭng kơ teh đak, bơ̆ jang kiơ̆ tăh kơ phiê̆u tơ̆ 5725 anih pôk rơ̆ih.

Thuem: Tơ blơ̆