VOV4.Bahnar - Tơ̆ Tây Nguyên, jĭ hơbŭh pơrăm kơtang, mă kăl tơ̆ Dak Lăk jing dêh char hlôi đei trŭh hlŏh mĭnh rơbau ‘nu bơngai jĭ Covid-19, akŏm lơ tơ̆ pơlei pơla kon kông. Tơdrong hơdrin tang găn jĭ kăl vang iung jang, tơgop jơhngơ̆m păng hlô̆h vao trŏ ƀlep đơ̆ng rim kon pơlei:

Kră pơlei Y Yơh Kbuôr (Aê Huy) năm tơ̆ hnam kon pơlei vă pơtho tơbăt trong tang găn jĭ hơbŭh Covid-19

-Buôn Kmrơ̆ng Prŏng A, tơring Ea Tu, pơlei tơm Buôn Ma Thuột, dêh char Dak Lăk đei vă jê̆ 550 ŭnh hnam hăm 2.200 ‘nu măt bơngai, găh lơ bơngai Êđê. Tơdrong jĭ hơbŭh jei hlôi ƀơm kơnê̆ trŭh tơdrong jang sa păng erĭh sa kơ kon pơlei. Hơdrŭh tơdăm năm jang tơ̆ hơtăih, jang kŏng nhân lơ̆m rim kŏng ty, hơnĭh jang kmăi kmŏk tŏk bŏk brŏk vĭh tơ̆ hnam kơ yuơ tơdrong jĭ hơbŭh. Kră pơlei Y Yơh Kbuôr oei tơ̆ ƀuôn Kmrơ̆ng Prŏng A tơroi, đơ̆ng mă ‘măng jĭ hơbŭh Covid-19 ‘măng mă 4 pơrăm dơ̆ng tơ̆ Dak Lăk păng rim dêh char tơjê̆, kră pơlei Y Yơh Kbuôr atŭm hăm kơdră chĕp pơgơ̆r rim koeng, pơlei chă pơrô̆, pơtho khan ăn kon pơlei pơm kiơ̆ rim tơdrong tơchơ̆t tang găn jĭ, pơtho khan ăn rim ŭnh hnam đei ‘nao brŏk đơ̆ng hơtăih năm tơroi tơbăt akau jăn ăn ƀok thây pơgang păng kơ dĭh oei hơdrô̆ lơ̆m hnam. Mư̆h jĭ hơbŭh roi kơtang, kon pơlei jei pơm kiơ̆ kơ jăp nơ̆r pơrô̆ athei đơ̆ng kơdră găh oei hơtăih dĭh băl păng pơm kiơ̆ kơ jăp rim tơdrong tơchơ̆t tang găn jĭ.“Hăm jĭ hơbŭh Covid-19 ‘nŏh lu nhôn bơngai vei lăng pơlei, rim khŭl bơ̆ jang, kră pơlei vang iung jang chă pơtho khan ăn kon pơlei lơ̆m pơlei jang kiơ̆ kơ jăp rim tơdrong tơchơ̆t găh tang găn jĭ hơbŭh. Rim kon pơlei jei mơ̆ng kiơ̆ păng pơm kiơ̆ kơ jăp, đơ̆ng bơngai kră trŭh tơ̆ đe hơ iŏh jei pơm kiơ̆ tang găn jĭ hơbŭh”.

- Jang kiơ̆ tơdrong joăt tơgoăt tơgoăl, ‘mêm kơ eng dĭh băl kơ hơdrung Việt Nam, đơ̆ng blŭng đei jĭ hơbŭh hloi, bơngai Êđê tơ̆ tơring Čuôr Dăng, apŭng Cư̆ M’Gar, dêh char Dak Lak hlôi vang tơgŭm djru kơdră tơring păng rim khŭl vang tang găn jĭ, tơgum djru dĭh băl yak hlŏh tơnap tap. Kon pơlei vang tơra tơmam drăm tơgŭm ăn kon pơlei oei tơ̆ rim tơring ăn oei hơdrô̆ kiơ̆ Nơ̆r athei jang kiơ̆ 16 đơ̆ng Thủ Tướng Tĕh đak. Ƀok Y- Ƀhêñ Ayun (Aê Nik)- buôn Čuôr Dăng A, apŭng Cư Mgar, dêh char Dak Lak tơbăt:“Ĭnh tôch hơ iă lăng ƀô̆h jơhngơ̆m đon ‘lơ̆ng kơ kon pơlei lơ̆m pơlei bơ̆n dau vang kơrŭn jơhngơ̆m yak hlŏh jĭ hơbŭh Covid-19, tơgŭm djru dôm pơlei anai tŏk bŏk oei hơdrô̆, yak hlŏh tơdrong tơnap tap, băt tơgŭm djru dĭh băl lơ̆m mơmat tat. Hơpơi rim jơhngơ̆m đon ‘lơ̆ng, tơgoăt tơgoăl dĭh băl kơ bơngai Êđê bơ̆n ling lang chĕp kơjăp lơ̆m khei ‘năr tơnap tap lơ̆m erĭh sa.”

- Vă tang găn jĭ Covid-19, hrei au, tơ̆ rim pơlei pơla, kon pơlei jei băt hơdăh pơm kiơ̆ kơ jăp 5K. Dôm năr au, năm trŭh tơ̆ tơring atăih yăih A Dơ̆k, apŭng Đak Đoa, dêh char Gia Lai ling lang ƀô̆h kon pơlei gom ƀŏ mư̆h lĕch tơ̆ trong. Mŏ Rmah Seo, pơlei Biă Tih, tơring A Dơk, apŭng Đak Đoa tơroi găh tơdrong tang găn jĭ đơ̆ng kon pơlei.“ Đơ̆ng mă đei jĭ hơbŭh Covid-19 pơrăm kon pơlei tăr văr dêh, hlŏh kơtơ̆ng ang lơ̆m brŏ au tgo ‘nŏh mă băt ‘nau jing tơdrong jĭ tôch hơmơt tơt kơna kon pơlei sa roi hli hlŏh dơ̆ng. Mă lei, đei kơdră chĕp pơgơ̆r tơring hơnơ̆ng chă pơtho tơbăt ‘nŏ kon pơlei jei hơnơ̆ng pơm kiơ̆ chă gom ƀŏ, pơm kiơ̆ 5K tang găn jĭ. Tơdăh ư̆h kơ đei tơdrong kiơ kăl lei kon pơlei oei lơ̆m hnam, ư̆h gan chă lĕch tơ̆ nai. Lơ ŭnh hnam jei băt chă răt răk tơmam drăm sa. Kon pơlei brŏk đơ̆ng tơring đei jĭ lăp pơm đang oei hơdrô̆ mư̆h brŏk tơ̆ hnam jei oei hơdrô̆ lơ̆m hnam hloi, rim ƀok thây pơgang jei hơnơ̆ng năm dăr lăng. Hơpơi tơdrong jĭ au hrôih yak hlŏh vă kon pơlei jang sa, hơpơi tĕh đak tơgŭm djru ăn dôm bơngai đei ƀơm răm đơ̆ng jĭ hơbŭh pơrăm”.

-Jĭ hơbŭh Covid-19 pơrăm kơtang pơm ăn tơdrong erĭh sa kơ kon pơlei đei ƀơm kơnê̆. Mă lei kon pơlei hơnơ̆ng pơm kiơ̆ kơ jăp nơ̆r pơkă 5K đơ̆ng Dơnŏ anĭh tơm vei lăng jang pơgang vă atŭm hăm Đảng, Tĕh đak tơpŭh hŭt jĭ hơbŭh. Mŏ H’Lan oei tơ̆ bon Ka La Dơng, tơring Quảng Khê, apŭng Đak Glong, dêh char Dak Nông tơbăt:“Đơ̆ng đei jĭ hơbŭh lơ̆m tơring pơma hơdrô̆ păng lơ̆m tĕh đak pơma atŭm, lơ̆m pơlei bơ̆n pơm kiơ̆ kơ jăp bơ̆ jang tang găn jĭ hơbŭh Covid-19. Kon pơlei hơnơ̆ng năm tơroi tơbăt jơhngơ̆m jăn ăn ƀok thây pơgang. Ŭnh hnam ayơ đei kon sau jang sa hơtăih tơ̆ dêh char anai, mư̆h brŏk ‘nŏh đei chă pơtho khan ăn kơ đe sư năm tơroi tơbăt akau jăn hăm ƀok thây pơgang hlo, vă khŭl bơ̆ jang ăn đe sư oei hơdrô̆ kiơ̆ tơdrong tơchơ̆t. Mư̆h rim dêh char găh pơbăh pơm kiơ̆ oai hơtăih dĭh băl tơ ƀơ̆p tơnap tap găh phe sa ƀa sŏng, kon pơlei lơ̆m pơlei mă đơ̆ng oei kơ ƀăh kơ ƀôch jei chă hơvơn vang tơra kon jên, ‘nhot sa, plei ‘long, ƀum vă tơgŭm ăn kon pơlei tơring jĭ hơbŭh pơrăm”.

-Jing apŭng hơdrar hăm pơlei tơm Đà Lạt, tơring tŏk bŏk đei jĭ hơbŭh Covid-19 hăm lơ bơngai jĭ tơpŏh lơ̆m pơlei pơla, apŭng Lạc Dương (Lâm Đồng) hlôi bơ̆ jang kơ jăp gak tang găn tơ̆ rim tơring hơdrar vă vei lăng năng tông tơring sơđơ̆ng hoei chă tơpŏh jĭ jăn. Tơ̆ hơnĭh gak tang găn jĭ Covid-19 tơ̆ trong Glung 27B, jăl trong sơlam hăm phương 12, pơlei tơm Đà Lạt, hlŏh 30 ‘nu bơngai tơplĭh dĭh băl gak vei lăng prăt măng prăt năr, lơ̆m au găh lơ bơngai kon kông. Kiơ̆ đơ̆ng ƀok Kră Jăn Ha Khiêu, hơdrung K’ho pơm kŏng ang tơroi, atŭm hăm rim bơngai anai, ƀok đei pơjao bơ̆ jang gak tơ̆ hơnĭh au đơ̆ng blŭng đei jĭ hơbŭh hloi. Tơdrong jang mă đơ̆ng mơmat tat, glĕh hrat, mă kăl lơ̆m jơ ‘năr ‘mi hngach, mă lei kơ yuơ tơdrong sơđơ̆ng ăn kon pơlei, rim bơngai jei hơdrin vang tơpŭh hŭt jĭ hơbŭh.“Kiơ̆ đơ̆ng kơdră pơjao ăn, ĭnh vang gak atŭm hăm ‘nhŏng ŏh tơ̆ hơnĭh gak au, bơ̆ jang dăr lăng vă tang găn jĭ, vei lăng năng tông tơring sơđơ̆ng kơ apŭng adoi nhen vei lăng jơhngơ̆m pran jăng grăng akau ăn kon pơlei. Tơdrong jang nhôn ‘nŏh dăr lăng rim gre kơdau trong au, athei đe sư pơm kiơ̆ tơroi tơbăt jơhngơ̆m pran jăng, mă kăl dăr lăng hơlen rim bơngai đơ̆ng tơring anai mơ̆t tơ̆ rim pơlei, vă tang găn jĭ, ư̆h kơ lê̆ jĭ tơpŏh lơ̆m pơlei pơla, vă kon pơlei sơđơ̆ng jơhngơ̆m jang sa”.

Tơblơ̆ nơ̆r: Amazưt